حالىق ءارتىسىنىڭ ەڭبەگى جوعارى باعالاندى
مەملەكەت باسشىسى قاسىم-جومارت توقايەۆ مادەنيەت مايتالمانىن مەرەيتويىمەن قۇتتىقتاپ، ونەرگە سىڭىرگەن ەڭبەگىن جوعارى باعالادى. الىبەك دىنىشيەۆتىڭ جارتى عاسىرعا جۋىق اتقارعان قىزمەتىنە ريزاشىلىعىن ءبىلدىردى، دەپ حابارلايدى Almaty-akshamy.kz. اقوردا سايتىنا سىلتەمە جاساپ.
«قازاقتىڭ ماڭدايىنا بىتكەن ەڭ دارىندى تۇلعالارىمىزدىڭ ءبىرىسىز. ءبارىمىز ءسىزدى ماقتان تۇتامىز. قازاقستاندا دا، شەت مەملەكەتتەردە دە ءوزىڭىزدى بىلمەيتىن ادام جوق. الەمدىك دەڭگەيدە ءسىزدىڭ ونەرىڭىزدى ءبارى جوعارى باعالايدى. پەداگوگ رەتىندە دە، قوعامدىق جۇمىستاردا دا بەلسەندىسىز. تاۋەلسىز ەلىمىزدىڭ دامۋىنا سىڭىرگەن ەڭبەگىڭىز وراسان. وسى قىزمەتىڭىزدى ەسكەرە وتىرىپ، وتاندىق مادەنيەتتى دامىتۋ مەن مۋزىكا ونەرىن دارىپتەۋدەگى ايرىقشا ەڭبەگىڭىز ءۇشىن جوعارى دارەجەلى ەرەكشەلىك بەلگىسى – «قازاقستاننىڭ ەڭبەك ەرى» اتاعىن بەرۋ تۋرالى شەشىم قابىلداندى. مەن ونى لايىقتى شەشىم دەپ ەسەپتەيمىن»، – دەدى قازاقستان پرەزيدەنتى.
قازاقستاننىڭ حالىق ءارتىسى الىبەك دىنىشيەۆ مەملەكەت باسشىسىنا ەڭبەگىن باعالاپ، قۇرمەت كورسەتكەنى ءۇشىن العىسىن ءبىلدىردى.
«مەنىڭ شىعارماشىلىعىمدى باعالاپ، كورسەتىپ جاتقان قۇرمەتىڭىز ءۇشىن العىس ايتامىن. ءوزىڭىز ايتقانداي، ەلىمىزدىڭ دە، شەت مەملەكەتتەردىڭ دە ساحناسىندا ونەر كورسەتىپ كەلە جاتقانىما 45 جىل بولعان ەكەن. 70 جاس مەرەيتويىما جوعارى دارەجەلى «قازاقستاننىڭ ەڭبەك ەرى» اتاعىن بەرىپ جاتىرسىزدار. شەكسىز ريزاشىلىعىمدى بىلدىرەمىن»، – دەدى الىبەك دىنىشيەۆ.
پرەزيدەنتىمىز قاسىم-جومارت توقايەۆ قابىلداۋ سوڭىندا الىبەك دىنىشيەۆكە دەنساۋلىق، كاسىبي جانە قوعامدىق جۇمىسىنا تابىس تىلەدى.