اباي اتىنداعى قازۇوبت وركەسترىنىڭ ارتىستەرى «تورتەۋگە جاعىمدى اڭگىمە» اۆتورلىق باعدارلاماسىن ورىندادى.
العىس ايتۋ كۇنىنە وراي «پانا» الەۋمەتتىك بەيىمدەۋ ورتالىعىندا «GATOB QUARTET» ىشەكتى اسپاپتار كۆارتەتى قايىرىمدىلىق كونسەرتىن وتكىزدى، دەپ حابارلايدى Almaty-akshamy.kz
اباي اتىنداعى قازۇوبت وركەسترىنىڭ ارتىستەرى اسەم قالمان، وكسانا نۇرشايەۆا، نۇرلان ساعىمبايەۆ جانە ايدار قۇسپانوۆ جۇرتشىلىق ءسۇيىپ تىڭداعان توپتىڭ «تورتەۋگە جاعىمدى اڭگىمە» اۆتورلىق باعدارلاماسىن ورىندادى. مەرەكەلىك كونسەرتتە وڭدەۋدەگى اتاقتى كۇيلەر مەن قازاق كومپوزيتورلارىنىڭ اندەرى، كۆارتەتتىڭ تانىمال كلاسسيكا مەن حح عاسىر شىعارمالارى ورىندالدى. احمەت جۇبانوۆ پەن لاتيف ءحاميديدىڭ «اباي» وپەراسىنداعى ايگىلى «قارلىعاش» ءانى استور پياسسوللانىڭ شىعارمالارىمەن قاتار ءجۇردى. «دون جۋان» وپەراسىنان تانىس اۋەن باعدارلامادا ۆولفگانگ امادەي موسارتتىڭ شىعۋىن بەلگىلەدى، ال بۇل تاڭعاجايىپ مۋزىكالىق كالەيدوسكوپتىڭ تەك ۇزىندىلەرى عانا.
اباي اتىنداعى قازۇوبت ىشەكتى اسپاپتار كۆارتەتى – وزىندىك ەرەكشە دارالىعى بار قالىپتاسقان ۇجىم. وركەستر ارتىستەرى تەاتر قويىلىمدارىنىڭ باي رەپەرتۋارىنداعى مۋزىكالىق ماتەريالداردى مەڭگەرىپ قانا قويماي، بەلسەندى كونسەرتتىك ءىس-شارالاردى دا جۇرگىزەدى. انسامبلدە ويناۋ ونەرى وتە كۇردەلى. ول ءوز ويىنىڭىزدى باقىلاۋدى عانا ەمەس، سونىمەن قاتار ارىپتەستەرىڭىزبەن ۇنەمى ءوزارا ارەكەتتەستىكتە بولۋ قاجەتتىلىگىن قامتيدى. بۇل دەگەنىڭىز - مۋزىكالىق تەپە-تەڭدىكتى سەزىنۋ، ءسىزدىڭ اسپابىڭىزبەن بىرگە ويناپ جاتقان اسپاپتاردى تىڭداۋ، دىبىستىڭ كەز كەلگەن وزگەرىستەرىنە جىلدام جاۋاپ بەرۋ.
جاڭادان باستاعان پيانيست سۇلتان ساعىنىش اباي قۇنانبايەۆتىڭ «كوزىمنىڭ قاراسى» ءانىنىڭ وڭدەۋىن، سونىمەن قاتار زاماناۋي حيتتەردى ورىنداپ، كورەرمەندەردى ءوز ونەرىمەن قۋانتتى.
«پانا» الەۋمەتتىك بەيىمدەۋ ورتالىعىنىڭ تۇرعىندارى – تۇراقتى مەكەنجايى جوق، ايىرىلعان الەۋمەتتىك مارتەبەسىن قالپىنا كەلتىرگىسى كەلەتىن ادامدار. ورتالىقتا تۇراتىنداردىڭ دەنى ەگدە جاستاعى ادامدار، كوبىنىڭ دەنساۋلىعىندا اقاۋ بار. كونسەرت تىڭدارماندارى ءار شىعارمانى ۇزاق جانە جىلى قول سوعۋمەن قوشەمەتتەپ وتىردى، كونسەرت سوڭىندا راحاتتانىپ العان اسەرلەرى ءۇشىن ونەرپازدارعا شەكسىز العىستارىن ءبىلدىرىپ، جوعارى كاسىبي ورىنداۋداعى اسەم اۋەندى قايتا تىڭداۋعا تىلەك ءبىلدىردى.
GATOB QUARTET ۇجىمى – قازاقستانداعى اكادەميالىق باعىتتاعى تانىمال ىشەكتى اسپاپتار كۆارتەتى. ول اباي اتىنداعى قازۇوبت-دا، قالا مەن رەسپۋبليكانىڭ كونسەرتتىك الاڭدارىندا ءجيى تارتىمدى اۆتورلىق باعدارلامالارىمەن ونەر كورسەتەدى. توپتىڭ باسىم باعىتتارىنىڭ قاتارىندا كلاسسيكالىق مۋزىكا سالاسىنداعى اعارتۋشىلىق جانە تانىمالدىلىق شارالار، حالىقتىڭ الەۋمەتتىك وسال توپتارىنا ارنالعان قايىرىمدىلىق كونسەرتتەر بار.