الماتىدا «تازا قازاقستان» رەسپۋبليكالىق اكسياسى اياسىندا العاشقى ەكولوگيالىق حاب اشىلدى، دەپ حابارلايدى almaty-akshamy.kz
ەكو-حاب قالاعان ادام كەلە الاتىن كرەاتيۆتى كەڭىستىك بازاسىندا اشىلدى. كەلۋشىلەر پلاستيكالىق ىدىستار، سۋسابىنداردىڭ بوساعان قۇتىلارىن، شىنى بوتەلكەلەردى اكەلە الادى.وسى قالدىقتاردان حوش ءيىستى شىراق، ىستىق تاعام استىنا قويىلاتىن زات، الماتىنىڭ سيمۆولى الما تۇرىندە جاسالعان قابىرعا ساعاتى سىندى سۋۆەنيرلەر جاسالادى.
كرەاتيۆتى ەكو-حابتى قۇرۋشىلاردىڭ ويىنشا، مۇنداي ىزگى شارا قوقىستى مىندەتتى تۇردە ءبولۋ جانە قورشاعان ورتاعا ۇقىپتى قاراۋ قۇندىلىقتارى مادەنيەتىن قالىپتاستىرۋعا ىقپال ەتەدى.
«ەكو-حابتىڭ يدەياسى الماتىدا ەكولوگيالىق جوبالار ءۇشىن الاڭ بەرۋ بولىپ تابىلادى. ءبىز ەكولوگياعا ەرەكشە ءمان بەرەتىندەردىڭ ءبىر جەردە جينالۋىنا مۇمكىندىك بەرەمىز. باسقا قابىلداۋ ورىندارىنان ايىرماشىلىعى، مۇندا تەك قوقىس قالا اكەلىنبەيدى، سونىمەن قاتار پلاستيكتەن نەمەسە شىنى بوتەلكەلەر قالدىقتارىنان ءتۇرلى شىراقتار، ساعات جاساۋعا بولادى. ول ءۇشىن قوقىستى وڭدەيتىن قۇرىلعىلاردى ساتىپ الدىق. بۇل جەر قوقىستى قاجەت بۇيىمعا اينالدىراتىن، جاسالعان ادەمى زاتتى ۇيىڭىزگە اپارىپ قويۋعا بولاتىن ورىن»، - دەپ اتاپ ءوتتى Eco Network جوباسىنىڭ جەتەكشىسى ەۆگەنيي مۇحامەدجانوۆ.
ەكو-حابتا ەكولوگيالىق ءونىم وندىرۋمەن اينالىساتىن كاسىپكەرلەر مەن ستارتاپەرلەردىڭ ونىمدەرى ۇسىنىلعان. مىسالى، كەيبىرەۋلەر ءۇي وسىمدىكتەرىنە ورگانيكالىق تىڭايتقىشتار شىعارادى، باسقالارى - ەلدەگى العاشقى جانە جالعىز ەكو-حيميا، باسقالارى - جانۋارلارعا ارنالعان بيولوگيالىق قوسپالار.
بۇدان باسقا، ەكولوگيالىق ورتالىقتا تۇراقتى نەگىزدە قايتا شيكىزاتتان بۇيىمدار جاساۋ بويىنشا وقىتۋ دارىستەرى، ەكو-ساعاتتار، تيمبيلدينگتەر جانە ماستەر-كلاستار وتكىزىلەتىن بولادى.