دۇنيەجۇزىلىك دەنساۋلىق ساقتاۋ ۇيىمى (ددۇ) رەسمي تۇردە قازاق تىلىندەگى نۇسقاسىن قامتيتىن 11ء-شى قايتا قارالعان اۋرۋلاردىڭ حالىقارالىق جىكتەمەسىنىڭ (احج-11) جاڭارتىلعان نۇسقاسىن ۇسىندى.
بۇل مەديسينالىق دەرەكتەردىڭ دالدىگىن، ەگجەي-تەگجەيىن جانە ۇيلەسىمدىلىگىن ارتتىرۋعا ىقپال ەتەتىن قازاقستاننىڭ دەنساۋلىق ساقتاۋ جۇيەسىن دامىتۋداعى ماڭىزدى قادام، دەپ حابارلايدى aqshamnews.kz.
قازىرگى ۋاقىتتا الەمنىڭ 132 ەلى احج-11 ەنگىزۋ بويىنشا جۇمىس ىستەۋدە، بۇل رەتتە قازاق ءتىلى احج-11 رەسمي اۋدارىلعان 11ء-شى تىلگە اينالدى. بۇعان دەيىن اعىلشىن، يسپان، ورىس، وزبەك جانە باسقا دا بىرنەشە تىلدەردەگى نۇسقالارى شىققان.
احج-11 اۋرۋلار مەن دەنساۋلىققا قاتىستى ماسەلەلەردى جىكتەۋ مەن كودتاۋدىڭ جاھاندىق ستاندارتىن بىلدىرەدى. قۇجاتتا جاراقاتتاردىڭ، اۋرۋلاردىڭ جانە ءولىم سەبەپتەرىنىڭ شامامەن 55 000 بىرەگەي كودى بار. ول مەديسينالىق قۇجاتتامانى جۇرگىزۋدى ستاندارتتاۋعا، اۋرۋلاردىڭ ناقتى ەسەبىن قامتاماسىز ەتۋگە جانە ۇلتتىق جانە حالىقارالىق دەڭگەيدە دەرەكتەرمەن الماسۋدى جەڭىلدەتۋگە مۇمكىندىك بەرەدى.
«احج-11 قازاق تىلىندەگى نۇسقاسى ستاتيستيكا مەن سىرقاتتانۋشىلىقتى تالداۋ پروسەسىن جاقسارتۋعا، ەپيدەميولوگيالىق اقپاراتتى جيناۋعا جانە ەسەپكە الۋعا مۇمكىندىك بەرەدى، باستاپقى بۋىنداعى مەديسينالىق-سانيتاريالىق كومەكتى جاقسارتۋعا ىقپال ەتەدى، پروفيلاكتيكا جانە ەمدەۋ ماسەلەلەرىن ساپالى رەتتەۋگە جاردەمدەسەدى، مەديسينالىق دەرەكتەردى ەلدە جانە شەتەلدە بىردەي تۇسىندىرۋگە مۇمكىندىك بەرەدى»، - دەپ اتاپ ءوتتى دەنساۋلىق ساقتاۋ مينيسترلىگى مەديسينالىق كومەكتى ۇيىمداستىرۋ دەپارتامەنتىنىڭ ديرەكتورى گۇلنار سارسەمبايەۆا.
دۇنيەجۇزىلىك دەنساۋلىق ساقتاۋ اسسامبلەياسىندا احج-11 ماقۇلداعاننان كەيىن، 2019 جىلدىڭ مامىرىندا ددۇ-عا مۇشە ەلدەردىڭ الدىڭعى نۇسقادان (احج-10) كەزەڭ-كەزەڭىمەن كوشۋ پروسەسىن باستادى. قازاقستاندا قازاق تىلىنە اۋدارۋ جوباسى 2023 جىلى ساليدات قايىربەكوۆا اتىنداعى ۇلتتىق عىلىمي دەنساۋلىق ساقتاۋدى دامىتۋ ورتالىعى مەن مەديسينا ۋنيۆەرسيتەتتەرىنىڭ بەلسەندى قاتىسۋىمەن قازاقستان رەسپۋبليكاسى دەنساۋلىق ساقتاۋ مينيسترلىگىنىڭ باستاماسىمەن باستالدى. بۇل ۇدەرىستە ددۇ ساراپشىلارى تەحنيكالىق قولداۋ كورسەتتى.
«قازاق ءتىلىن احج-11-گە قوسۋ - قازاقستان ءۇشىن ماڭىزدى قادام. بۇل مەديسينا قىزمەتكەرلەرىنىڭ جۇمىسىن جەڭىلدەتىپ قانا قويماي، مەديسينالىق قۇجاتتاما مەن ستاتيستيكالىق مالىمەتتەردىڭ ساپاسىن ارتتىرادى. بۇل دەنساۋلىق جاعدايىن تالداۋعا جانە دەنساۋلىق ساقتاۋ جۇيەسىن دامىتۋدى ستراتەگيالىق جوسپارلاۋعا كومەكتەسەتىنىنە سەنىمدىمىن»،-دەپ اتاپ ءوتتى ددۇ-نىڭ قازاقستان رەسپۋبليكاسىنداعى وكىلى دوكتور Skender Syla.
احج-11 تۋرالى قوسىمشا اقپاراتتى ددۇ-نىڭ: https://www.who.int/standards/classifications/classification-of-diseases رەسمي پاراعىنان تابۋعا بولادى.