234 تاپسىرىس راسىمدەلگەن.
قازاقستاندىق ماماندار مۇگەدەكتىگى بار ادامداردىڭ قۇقىقتارىن قامتاماسىز ەتۋ جانە ءومىر ءسۇرۋ ساپاسىن جاقسارتۋ ماقساتىندا ىسكە قوسىلعان پورتالدان مەملەكەت ازاماتتارى قانداي قىزمەت الاتىنىن ايتتى، دەپ حابارلادى Almaty-akshamy.kz.
«اعىمداعى جىلدىڭ باسىنان باستاپ الەۋمەتتىك قىزمەتتەر پورتالى ارقىلى شامامەن 15،5 مىڭ مۇگەدەكتىگى بار ادام وڭالتۋدىڭ تەحنيكالىق قۇرالدارىن، 1،3 مىڭى – ىمداۋ ءتىلى قىزمەتىن، 2،8 مىڭى – جەكە كومەكشىنىڭ قىزمەتىن الدى. سونداي-اق، پورتال ارقىلى كەپىلدىك بەرىلگەن الەۋمەتتىك توپتامالارعا 234 تاپسىرىس راسىمدەلدى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
پورتال مۇگەدەكتىگى بار ادامدارعا وڭالتۋدىڭ تەحنيكالىق قۇرالدارى مەن قىزمەتتەرىن ءوندىرۋشىنى جانە جەتكىزۋشىنى ءوز بەتىنشە تاڭداۋعا مۇمكىندىك بەرەدى. كومەك تۇرىنە تاپسىرىس بەرۋ كورسەتىلەتىن قىزمەتتى الۋشىنىڭ ەلەكتروندىق سيفرلىق قولتاڭباسىمەن راستاۋ ارقىلى جۇزەگە اسىرىلادى. تاپسىرىس بەرىلگەن وڭالتۋدىڭ تەحنيكالىق قۇرالدارىن جەتكىزۋ نەمەسە ءوز بەتىنشە اكەتۋ ارقىلى الۋعا بولادى.
مۇگەدەكتىگى بار ادامداردى وڭالتۋ قۇرالدارىمەن قامتاماسىز ەتۋ پروتەزدىك-ورتوپەديالىق، سۋردوتەحنيكالىق، تيفلوتەحنيكالىق جانە گيگيەنالىق قۇرالدار، سونداي-اق كرەسلو-اربالار بەرۋدى قامتيدى.
مامامانداردىڭ ايتۋىنا، بۇگىنگى كۇنى پورتالدا ارناۋلى الەۋمەتتىك قىزمەتتەر كورسەتەتىن 799 مەديسينالىق-الەۋمەتتىك مەكەمە (بولىمشەلەر)، 157 وتق جەتكىزۋشى، 16 مىڭنان استام جەكە كومەكشى، 289 ىمداۋ ءتىلىن قىزمەتىن، 83 ساناتورلىق-كۋرورتتىق ەمدەۋدى، 135 كەپىلدىك بەرىلگەن الەۋمەتتىك توپتامانى جەتكىزۋشىلەر تىركەلگەن.
«الەۋمەتتىك قىزمەتتەر پورتالى» اۆتوماتتاندىرىلعان اقپاراتتىق جۇيەسىن ەنگىزۋ مۇگەدەكتىگى بار ادامداردىڭ قۇقىقتارىن قامتاماسىز ەتۋ جانە ءومىر ءسۇرۋ ساپاسىن جاقسارتۋ جونىندەگى ۇلتتىق جوسپار شەڭبەرىندە قاراستىرىلعان.
قولداۋعا ارنالعان بايلانىس ورتالىعىنا 1414 ءبىرىڭعاي نومىرىنە قوڭىراۋ شالىپ، ءتىلدى تاڭداۋ جانە 5 سانىن باسۋ ارقىلى پورتالدى پايدالانۋ بويىنشا كەڭەس الۋعا بولادى.