قالا بويىنشا 1565 كەلۋشىگە جۇمىسقا ورنالاسۋعا جاردەم كورسەتىلدى، تاعى 271 ادام تۇرعىن ءۇي كەزەگىنە تۇردى.
الماتى اكىمى باقىتجان ساعىنتايەۆتىڭ تاپسىرماسى بويىنشا اشىلعان جاڭا الەۋمەتتىك مەكەمە «ءبىر تەرەزە» قاعيداتى بويىنشا 750-دەن استام مەملەكەتتىك قىزمەت كورسەتتى، دەپ حابارلايدى Almaty-akshamy.kz.
وڭىرلىك كوممۋنيكاسيالار قىزمەتىنىڭ بريفينگىندە وتكەن قالانىڭ الەۋمەتتىك ءال-اۋقات باسقارماسى باسشىسىنىڭ ورىنباسارى دانيار الكەباي ۇلى مەن الماتى قالاسى مەكەمەسىنىڭ الەۋمەتتىك قىزمەتتەر ءبولىمىنىڭ باسشىسى ىنتا بيارىستانوۆا الماتىلىقتاردىڭ قانداي ماسەلەلەرگە جۇگىنەتىنى تۋرالى ايتتى.
دانيار الكەباي ۇلىنىڭ ايتۋىنشا، الەۋمەتتىك قىزمەتتەر ءۇيى — بۇل قالا تۇرعىندارىنا «ءبىر تەرەزە» قاعيداتى بويىنشا مەملەكەتتىك جانە الەۋمەتتىك سيپاتتاعى قىزمەتتەردى الۋعا مۇمكىندىك بەرەتىن بىرەگەي جوبا. كۇن سايىن مۇندا حالىققا 400-دەن 600-گە دەيىن ءتۇرلى قىزمەتتەر كورسەتىلەدى. سونداي-اق 750-دەن استام مەملەكەتتىك قىزمەت ءتۇرىن الۋعا بولادى.
«7-15 ماۋسىم ارالىعىندا الەۋمەتتىك قىزمەتتەر ۇيىنە ءتۇرلى ماسەلەلەر بويىنشا 2700-دەن استام ادام جۇگىنگەن. مىسالى، 1565 كەلۋشىگە جۇمىسقا ورنالاسۋعا جاردەم كورسەتىلدى، تاعى 271 ادام تۇرعىن ءۇي كەزەگىنە تۇردى، 69-ى «باستاۋ بيزنەس» بويىنشا وقۋعا جازىلدى، 32ء-ى وسي-گە قاتىستى ماسەلەلەرىن شەشتى. بارلىعى 45 سانات بويىنشا مەملەكەتتىك قىزمەت كورسەتىلدى»، — دەدى دانيار الكەباي ۇلى.
الەۋمەتتىك قىزمەتتەر ۇيىندە 11 مەملەكەتتىك مەكەمە بار، بۇل ارتىق قاعازباستىلىق پەن بيۋروكراتيانى قوسپاعاندا، راسىمدەردى جۇرگىزۋ مەن بارلىق قاجەتتى قۇجاتتارعا قول قويۋعا مۇمكىندىك بەرەدى.
الەۋمەتتىك قىزمەت كورسەتۋ ءۇيىنىڭ باسشىسى ىنتا بيارىستانوۆا ولاردىڭ جۇمىسى تۋرالى ايتتى. ول كەڭ زالداردا كەلۋشىلەردى الماتى قالاسىنىڭ الەۋمەتتىك ءال-اۋقات باسقارماسىنىڭ، تۇرعىن ءۇي ساياساتى باسقارماسىنىڭ، الماتى حالىقتى جۇمىسپەن قامتۋ ورتالىعىنىڭ، «حقكو» ازاماتتارعا ارنالعان ۇكىمەت كەاق، «زەينەتاقى تولەۋ جونىندەگى مەملەكەتتىك ورتالىق» اقف، الماتى پوليسيا دەپارتامەنتىنىڭ كوشى-قون قىزمەتى باسقارماسىنىڭ، ەڭبەك، الەۋمەتتىك قورعاۋ مەن الماتى بويىنشا كوشى-قون كوميتەتىنىڭ دەپارتامەنتتەرىنىڭ كونسۋلتانتتارى قابىلدايتىنىن ايتتى.
الەۋمەتتىك قىزمەتتەر ۇيىنە تۇرعىن ءۇي ساياساتى سالاسىنداعى قىزمەتتەردى الۋ ءۇشىن جۇگىنۋگە بولادى. مىسالى، ەسەپكە تۇرۋعا، سونداي-اق جۇمىسقا ورنالاستىرۋ، جاردەماقى الۋ، زەينەتكەرلەرگە، مۇمكىندىگى شەكتەۋلى ادامدارعا، حالىقتىڭ الەۋمەتتىك وسال توپتارىنا كومەك كورسەتۋ بويىنشا قىزمەتتەر ءۇشىن. مەملەكەتتىك قىزمەتتەردى الۋ ءۇشىن الدىن الا جازىلۋ تالاپ ەتىلمەيدى. كەلىپ، تالون الىپ، كەڭەسشىنىڭ قابىلداۋىن كۇتۋ جەتكىلىكتى»، — دەدى ىنتا بيارىستانوۆا.
سونداي-اق الەۋمەتتىك قىزمەتتەر ۇيىندە مەملەكەتتىك قىزمەتتەردى ءبىر ۋاقىتتا الۋعا بولادى. مىسالى، بالاباقشاعا كەزەككە تۇرۋ جانە اتاۋلى الەۋمەتتىك كومەك رەسىمدەۋ، تۇرعىن ۇيگە كەزەكتى ءبىلۋ مەن ءوزىنىڭ زەينەتاقى جيناقتارىن قاراۋعا بولادى.
ىنتا بيارىستانوۆانىڭ ايتۋىنشا، جۇمىستىڭ العاشقى كۇندەرىندە تۇرعىن ۇيگە كەزەككە تۇرۋ، حالىقتى جۇمىسپەن قامتۋ، «باستاۋ بيزنەس» كۋرستارى بويىنشا وقىتۋ ماسەلەلەرى سۇرانىسقا يە بولدى.
الەۋمەتتىك قىزمەت كورسەتۋ ۇيىندە مۇمكىندىگى شەكتەۋلى ادامدارعا ءوز بەتىنشە قىزمەت كورسەتۋ ايماقتارىندا كومەكتەسۋگە دايىن ارنايى وقىتىلعان ادامدار جۇمىس ىستەيتىنىن ايتتى. بۇرىن مۇگەدەكتىگى بار ادامدار الەۋمەتتىك قىزمەت كورسەتەتىن كوپتەگەن ۇيىمدار اراسىندا ۇلكەن قيىندىقتارعا تاپ بولعان.
ايتا كەتسەك، الەۋمەتتىك قىزمەت كورسەتۋ ءۇيى دوستىق داڭعىلىندا، اباي داڭعىلىنان ءسال تومەن ورنالاسقان. وندا كولىك ينفراقۇرىلىمى دامىعان، جانىندا «اباي» مەترو ستانسياسى ورنالاسقان، اۆتوبۋس پەن تروللەيبۋس باعىتتارى بار.