بيىلعى جارتىجىلدىقتا الەۋمەتتىك ماڭىزى بار تاۋارلاردى ساتاتىن ءۇش جۇزگە جۋىق دەلدال انىقتالىپ، جويىلدى
بۇل شارانى ساۋدا جانە ينتەگراسيا مينيسترلىگى جەمىس-كوكونىس ونىمدەرىنە باعانىڭ وسۋىنە جول بەرمەۋ ماقساتىندا جۇرگىزدى. جالپى، 2023 جىلدىڭ 6 ايىندا وڭىرلىك كوميسسيالاردىڭ 995 وتىرىسى ءوتتى، ونىڭ ناتيجەلەرى بويىنشا 298 ءونىمسىز دەلدال جويىلدى.
«ءبىرىنشى جارتىجىلدىقتا باعانىڭ ماۋسىمدىق ءوسۋىن تەجەۋدىڭ قولدانىستاعى تەتىكتەرى شەڭبەرىندە الدىن الا قالىپتاسقان قورلاردان الىنعان كوكونىستەر نارىققا جىبەرىلدى. ماۋسىمارالىق كەزەڭدە مۇنداي قورلاردىڭ جالپى كولەمى 139،4 مىڭ توننا كوكونىستى (كارتوپ، ءسابىز، پياز، قىرىققابات) قۇرادى، ولار ماۋسىمدىق باعانىڭ اۋىتقۋىن بولدىرماۋ ءۇشىن ينديكاتيۆتى باعامەن نارىققا شىعارىلدى»، - دەپ مالىمدەدى ۆەدومستۆودان.
مينيسترلىك كوكونىستەردىڭ تاپشىلىعىن بولدىرماۋ ماقساتىندا تاۋار بالانسىن اي سايىن قالىپتاستىرۋ جانە تالداۋ بويىنشا جۇمىس جۇرگىزەدى، ەلەكتروندىق شوت-فاكتۋرالارعا تۇراقتى تالداۋ جاسايدى، دەلدالدىق سحەمالاردى انىقتاۋ جانە جويۋ ءۇشىن ەسەپ ايىرىسۋ راسىمدەرىنىڭ اشىقتىعىن ارتتىرۋ بويىنشا جۇمىس باستالدى.
جەرگىلىكتى اتقارۋشى ورگاندارمەن بارلىق الەۋمەتتىك ماڭىزى بار ازىق-تۇلىك تاۋارلارىنا ينديكاتيۆتىك باعالار ازىرلەندى جانە كەلىسىلدى؛ وتاندىق ءوندىرۋشىنى يمپورتتىق ءونىمنىڭ دەمپينگىنەن قورعاۋ ءۇشىن شەتەلدەن اكەلىنەتىن ءامات-تىڭ ەڭ تومەنگى كوتەرمە باعاسىن بەلگىلەۋ تەتىگى ەنگىزىلدى.