الەۋمەتتىك كاسىپكەرلىكتى مەملەكەتتىك قولداۋ رەەسترىندەگى كاسىپكەرلەر ءتىزىلىمى توقسان سايىن جاڭارتىلىپ تۇرادى. بۇل تۋرالى ق ر ۇەم كاسىپكەرلىكتى مەملەكەتتىك قولداۋ جانە قورعاۋ دەپارتامەنتى كاسىپكەرلىكتى قارجىلىق ەمەس قولداۋ باسقارماسىنىڭ باسشىسى مەرەي يسايەۆا ايتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«الەۋمەتتىك كاسىپكەرلىكتى مەملەكەتتىك قولداۋ زاڭ بويىنشا 2022 جىلدىڭ قاڭتارىنان باستاپ كۇشىنە ەندى. ءبىزدىڭ تىزىلىمگە كاسىپكەرلەر تىركەلىپ جاتىر. ءار توقسان سايىن وسى ءتىزىلىم جاڭارتىلىپ تۇرادى. جەرگىلىكتى اتقارۋشى ورگانداردا ارنايى كوميسسيا قۇرىلعان. ولار بەرىلگەن وتىنىشتەردى قاراپ، مينيسترلىككە تاپسىرادى. ودان كەيىن ءبىز كاسىپكەرلەردى تىزىلىمگە تىركەيمىز»، - دەدى م.يسايەۆا ورتالىق كوممۋنيكاسيالار قىزمەتىندە.
وسى ورايدا ول زاڭنامادا العاش رەت الەۋمەتتىك كاسىپكەرلىككە انىقتاما بەرىلگەنىن اتاپ ءوتتى. بۇل تۇرعىدا توقسان سايىن ءار كاسىپكەر وسى باعىتتا ءوزىنىڭ ءوتىنىشىن بەرۋگە قۇقىلى.
ءوز كەزەگىندە الەۋمەتتىك كاسىپكەر ەمين اسكەروۆ بارلىق وبلىس ورتالىعىندا كوميسسيالار جاساقتالعانىن، بۇل كوميسسيالار وتىنىشتەردى قابىلداۋ مەن الەۋمەتتىك كاسىپكەر رەەسترىن قۇرۋمەن اينالىساتىنىن جەتكىزدى.
«رەسمي مارتەبە الۋ ءۇشىن الەۋمەتتىك كاسىپكەر تاپسىراتىن قۇجاتتار ءتىزىمى بار. وسىدان كەيىن وبلىستىق اكىمدىكتەر ءبىرىڭعاي رەەستردى قۇرۋ ءۇشىن بارشا مالىمەتتى ۇلتتىق ەكونوميكا مينيسترلىگىنە وتكىزەدى. بۇل راسىمدەردەن سوڭ الەۋمەتتىك كاسىپكەرلەر مەملەكەت تاراپىنان بولاتىن جەڭىلدىكتەرگە يە بولادى»، - دەدى ە. اسكەروۆ.
ايتا كەتەيىك، بىلتىر جازدا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كاسىپكەرلىك، الەۋمەتتىك كاسىپكەرلىك جانە مىندەتتى الەۋمەتتىك مەديسينالىق ساقتاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى قابىلداندى.
قۇجات حالىقتىڭ الەۋمەتتىك وسال توپتارىن جۇمىسپەن قامتۋدى قامتاماسىز ەتۋگە جاردەمدەسۋگە، الەۋمەتتىك پروبلەمالاردى شەشۋگە كاسىپكەرلىك سۋبەكتىلەرىنىڭ قاتىسۋىن قولداۋعا جانە الەۋمەتتىك كاسىپكەرلەردىڭ تاۋارلارىن، جۇمىستارى مەن كورسەتىلەتىن قىزمەتتەرىن نارىقتا ىلگەرىلەتۋگە باعىتتالعان.
ەنگىزىلەتىن وزگەرىستەر مەن تولىقتىرۋلار بويىنشا، الەۋمەتتىك كاسىپكەرلەر حالىقتىڭ الەۋمەتتىك وسال توپتارى قاتارىنداعى ءوز قىزمەتكەرلەرىن وقىتىپ، بىلىكتىلىگىن ارتتىرسا، سالىق جەڭىلدىكتەرىنە يە بولماق.
سونداي-اق، مەملەكەت الەۋمەتتىك كاسىپكەرلىك نىساندارىن ينفراقۇرىلىممەن قامتاماسىز ەتۋگە جانە ولارعا قارجىلىق، اقپاراتتىق، كونسۋلتاسيالىق، ادىستەمەلىك كومەك كورسەتۋگە مىندەتتەلەدى.
«مەملەكەت باسشىسى الەۋمەتتىك ماسەلەلەردى شەشۋگە، از قامتىلعان ازاماتتار مەن ەرەكشە قاجەتتىلىكتەرى بار ادامدارعا قولداۋ كورسەتۋگە ۇنەمى كوڭىل بولەدى. بۇل تۇرعىدا الەۋمەتتىك كاسىپكەرلىكتى دامىتۋدىڭ ماڭىزى زور. بۇل وزگەرىستەر مەن تولىقتىرۋلاردى سەنات دەپۋتاتتارى باستاماشىلىق ەتكەنىن جانە دايىنداعانىن ەرەكشە اتاپ وتكەن ءجون. وتاندىق زاڭنامادا العاش رەت الەۋمەتتىك كاسىپكەرلىككە انىقتاما بەرىلىپ وتىر»، - دەدى سەنات ءتوراعاسى ماۋلەن اشىمبايەۆ.
مەملەكەت باسشىسىنىڭ تاپسىرمالارىن ىسكە اسىرۋ ءۇشىن وسى زاڭ اياسىندا ەكونوميكالىق ءوسىمدى قالپىنا كەلتىرۋ جانە پاندەميادان زارداپ شەككەن كاسىپكەرلەردى قولداۋ بويىنشا قوسىمشا شارالار كوزدەلگەن.
«زاڭ وڭدەۋ سالاسىنداعى جاڭا كاسىپورىندارعا قوسىلعان قۇن سالىعىن 70 پايىزعا تومەندەتۋدى، وڭدەۋشى ونەركاسىپتىڭ جاڭا نەگىزگى قورلارىنا قايتا ينۆەستيسيالانعان تابىستى كورپوراتيۆتىك تابىس سالىعىنان بوساتۋدى كوزدەيدى. سونداي-اق، جەكە كاسىپكەرلىكتى قولداۋ ءۇشىن ارنايى موبيلدىك قوسىمشانى پايدالانۋ ارقىلى ارنايى سالىق رەجيمى ەنگىزىلەدى. بۇل جەكە كاسىپكەرلەر قىزمەتىنىڭ جەكەلەگەن پروسەستەرىن جانە ولاردىڭ سالىق ورگاندارىمەن ءوزارا ءىس-قيمىلىن جەڭىلدەتەدى»، - دەدى سەنات ءتوراعاسى.