الەۋمەتتىك جەلىدەگى كەڭەسپەن ەمدەلمەك بولعان ايەل ءولىم اۋزىنان قالدى

شىمكەنتتىك ايەل ءوزىن ءوزى ەمدەيمىن دەپ ءولىم اۋزىنان قالدى.

53 جاستاعى كەلىنشەك قان قىسىمىن تومەندەتۋ ءۇشىن الەۋمەتتىك جەلىدەگى كەڭەسپەن الما سىركەسۋى، كۋركۋما مەن زىمبىردەن جاسالعان سۇيىقتىقتى ىشكەن، دەپ حابارلايدى aqshamnews.kz.

سالدارىنان ايەلدىڭ دەنەسى ءبورتىپ، تەرىسى قارايىپ كەتكەن. انافيلاكتيكالىق شوك العان ناۋقاس اۋىر حالدە اۋرۋحاناعا ءتۇسىپ، 2 كۇن جانساقتاۋدا جاتىپ، ەسىن ەندى جيناعان.

ناۋقاس، قالا تۇرعىنى:

ءبىرىنشى باسىم قىشىدى. دەنەم قىشىدى. الدىمەن قولدارىما شىقتى. ەرتەسىنە سيستەما سالىپ بولعان سوڭ، كۇشەيە باستادى. كوزىمە، اۋزىما شىقتى. دەنەمدەگىلەر شىعىپ بولعان سوڭ، بەتىمە شىقتى عوي. ول سۇيىقتىق — دايىن نارسە. وسى شىمكەنتتە قازىعۇرت شاعىناۋدانىندا دايىنداپ شىعارادى. شىنى بوتەلكەدە تۇرادى. 

ءولىم اۋزىندا جاتقان ايەلدى امان الىپ قالعان دارىگەرلەر «لايەللا» دياگنوزىن قويدى. بۇل - اللەرگيالى دەرماتيتتتىڭ ەڭ اۋىر ءتۇرى. اق حالاتتىلاردىڭ سوزىنشە، سوڭعى ۋاقىتتا الەۋمەتتىك جەلى ارقىلى ەمدەلەمىن دەپ زارداپ شەككەندەر كوبەيگەن.

باقىتجان پوزيلوۆ، №2 قالالىق اۋرۋحانانىڭ باس دارىگەرى:

وسى اۋرۋمەن، وسىنداي دياگنوزبەن تۇسكەن جاعدايدا 90 پايىز كىسىلەر قايتىس بولىپ كەتەدى. بۇل كىسى دەر كەزىندە دۇرىس، جاقسى كومەك كورسەتىلگەننىڭ ناتيجەسىندە امان قالدى. ينتەرنەت ارقىلى، الەۋمەتتىك جەلى، TikTok ارقىلى سوڭعى ۋاقىتتا ديپلومى جوق ماماندار ءتۇرلى اۋرۋلاردى ەمدەۋ بويىنشا نۇسقاۋ بەرەدى. قانداي ءدارى ءىشۋ كەرەكتىگىن ايتادى. سودان زارداپ شەگىپ جاتقان ناۋقاستار وتە كوپ.