جالعىزباستى انا رەتىندە الەۋمەتتىك جاردەماقىمەن كۇن كورگەن دجوان روۋلينگ قالاي ميللياردەر بولدى؟
دجوان روۋلينگ — الەمدەگى ەڭ تانىمال جازۋشىلاردىڭ ءبىرى. ءبىراق ونىڭ ءومىر جولى وڭاي بولعان جوق (كىمدە وڭاي بولدى دەيسىڭ). ول كەدەيشىلىكتە ءومىر ءسۇردى. ءبىراق «تار جول، تايعاق كەشە» ءجۇرىپ ءوزىنىڭ تاباندىلىعىمەن الەمگە تانىلىپ، شەكسىز بايلىققا يە بولدى.
انگليانىڭ يەيت قالاسىندا دۇنيەگە كەلگەن دجوان بالا كەزىنەن ادەبيەتكە جاقىن بولادى. وقىعاندى، جازعاندى جاقسى كورەدى. فرانسۋز فيلولوگى رەتىندە وقۋىن اياقتاعانىمەن، اۋەلگى ۋاقىتتا ءتۇرلى جۇمىستار ىستەيدى. سوسىن پورتۋگالياعا كوشەدى دە جەرگىلىكتى جۋرناليسپەن وتباسىن قۇرادى.
ءبىراق نەكەسى ءساتسىز بولىپ، قىزى دۇنيەگە كەلگەننەن كەيىن اجىراسىپ تىنادى. ءسويتىپ، ۇلىبريتانياعا قايتا ورالىپ، جۇمىسسىز قالادى. سول تۇستاردا الەۋمەتتىك جاردەماقىمەن كۇن كورىپ، جالعىزباستى انا رەتىندە ۇلكەن قيىندىقتارعا كەزىگەدى. اقشادان تارىعىپ، اقىر سوڭىندا كۇيزەلىسكە تۇسەدى دە، دەپرەسسيامەن الىسىپ كەتەدى.
ەگەر ءبىلىپ وتىرساڭىز، ءبىزدىڭ بۇل كەيىپكەرىمىز ايگىلى «ءحارري پوتتەر» شىعارماسىنىڭ اۆتورى. ءيا-يا، سولاي. سوندا ول كىتاپ قالاي جازىلدى؟
نە كەرەك، «ءحارري پوتتەر» يدەياسى وعان پويىزدا كەلە جاتقاندا كەلەدى عوي. 1990-جىلداردىڭ تۇسى. دجوان كۇن سايىن كافە مەن كىتاپحانا جاعالاپ، قىزى ۇيىقتاپ جاتقاندا جازۋعا كىرىسەدى. ءبىرىنشى كىتابى 1995 جىلى اياقتالعانىمەن، ونى باسىپ شىعارۋ وڭاي بولمايدى.
دجوان روۋلينگ ءوزىنىڭ قولجازباسىن كوپتەگەن باسپا ۇيىنە جىبەرەدى، ءبىراق 12 باسپا ونى قابىلداۋدان باس تارتادى. ارادا ءبىر جىل ۋاقىت وتكەندە Bloomsbury باسپاسى جاريالاۋعا كەلىسەدى. ءسويتىپ، 1997 جىلى «ءحارري پوتتەر جانە ءپالساپا تاس» دەگەن اتاۋمەن ءبىرىنشى كىتاپ جارىق كورەدى دە، ارتىنشا بىردەن تانىمالدىلىققا يە بولادى.
كىتاپتىڭ تانىمالدىعى ارتادى. كوپتەگەن ەلدە تيراجى وسەدى، اقىر سوڭىندا وقيعا جەلىسى كينوعا سۇرانىپ، قۇقىعى Warner Bros. ستۋدياسىنا ساتىلادى.
«ءحارري پوتتەر» سەريالىق كىتاپ قوي. جەتى كىتابى شىعادى دا، 80-نەن استام تىلگە اۋدارىلىپ، تيراجى 500 ميلليوننان اسادى. ءسويتىپ، دجوان روۋلينگ الەمدەگى ەڭ باي جازۋشىعا اينالادى. ونىڭ بايلىعى 1 ميلليارد دوللاردان اسادى. ءبىراق ول ۇلكەن بولىگىن قايىرىمدىلىققا جۇمسايدى.
سوندا دجوان روۋلينگتىڭ تابىستى بولۋىنا سەبەپ بولعان قاسيەتتەر، ونىڭ:
تاباندىلىعى — قانشاما قيىندىققا قاراماستان، جازۋىن توقتاتقان جوق
ەڭبەكقورلىعى — كۇن سايىن كىتاپ جازۋعا ۋاقىت ءبولدى
ىشكى باي الەمى — وقىرمانىن باۋراپ الارلىق الەم قۇردى
سەنىمى — باسپالار باس تارتسا دا ءۇمىتىن ۇزگەن جوق
ءتۇيىن: كەدەيدىڭ كۇيىن كەشسەڭ دە — تاباندى بولساڭ، ول قاسيەتىڭدى شىعارماشىلىعىڭمەن ۇشتاستىرا الساڭ، سەنىمىڭدى جوعالتپاساڭ، بايلىق ءوزى-اق قول بۇلعاپ تۇر ەكەن-اۋ؟!
*"كىتاپ ءۇزىندىسى" تەلەگرام كانالىنان الىنعان