2024 جىلدىڭ باسىنان باستاپ قازاقستاننىڭ بارلىق وڭىرلەرىندە مەملەكەتتىك الەۋمەتتىك قورعاۋ ينسپەكتورلارى 2 126 تەكسەرۋ جۇرگىزدى، ونىڭ 528ء-ى پروفيلاكتيكالىق باقىلاۋ شەڭبەرىندە، 511ء-ى جوسپاردان تىس، 1087ء-سى پروكۋراتۋرانىڭ تالابى بويىنشا.
مەملەكەتتىك باقىلاۋمەن: اكىمدىكتەر – 159، جەرگىلىكتى اتقارۋشى ورگانداردىڭ بولىمدەرى مەن باسقارمالارى – 98، مەملەكەتتىك مەكەمەلەر – 67، ارناۋلى الەۋمەتتىك قىزمەتتەر كورسەتۋ ورتالىقتارى – 74، وڭالتۋ ورتالىقتارى – 6، اۋرۋحانالار، ەمحانالار – 85، ستومالوگيالار – 3، ساناتورييلەر – 4، بالاباقشالار – 407، مەكتەپتەر – 927، كوللەدجدەر، ليسەيلەر – 72، دۇكەندەر – 18، ساۋدا ۇيلەرى – 26، بانك فيليالدارى – 6، «قازپوشتا» اق فيليالدارى – 7، پوليسيا بولىمشەلەرى – 9، مادەنيەت ۇيلەرى – 15، مۇراعاتتار، مۇراجايلار – 13، كافەلەر، مەيرامحانالار، قوناق ۇيلەر – 16، نوتاريۋستار – 2، اۆتوبۋس پاركتەرى، اۆتو جانە تەيىرجول ۆوكزالدارى، اۋەجايلار – 8، جك – 46، كىتاپحانالار – 4، بجسم، سپورت مەكتەپتەرى – 13 جانە باسقالار قامتىلدى، دەپ حابارلايدى aqshamnews.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
ماسەلەن، ەڭبەك جانە الەۋمەتتىك قورعاۋ كوميتەتىنىڭ الماتى قالاسى بويىنشا دەپارتامەنتى مۇگەدەكتىگى بار ادامنىڭ ءوتىنىشى نەگىزىندە مۇگەدەكتىگى بار ادامدار ءۇشىن قولجەتىمدىلىكتىڭ بولماۋى فاكتىسى بويىنشا ازىق-تۇلىك دۇكەنىنە جوسپاردان تىس تەكسەرۋ جۇرگىزدى. تەكسەرۋ ناتيجەلەرى بويىنشا كاسىپكەرلىك سۋبەكتىسى ايىپپۇل تۇرىندە اكىمشىلىك جاۋاپكەرشىلىككە تارتىلدى، سونداي-اق انىقتالعان بۇزۋشىلىقتاردى جويۋ تۋرالى نۇسقاما ەنگىزىلدى.
سونىمەن قاتار، وڭىرلەردەگى الەۋمەتتىك ينسپەكتورلار مۇگەدەكتىگى بار ادامداردىڭ زاڭدى قۇقىقتارىن قامتاماسىز ەتۋ ءۇشىن الەۋمەتتىك ينفراقۇرىلىم وبەكتىلەرىنىڭ بەيىمدەلۋ ءىس-شارالارىن جۇرگىزۋدە وڭ ديناميكانى اتاپ ءوتتى.
ماسەلەن، مۇگەدەكتىگى بار ازامات ەرگەن بەكارىستانوۆتىڭ ايتۋىنشا، ورال قالاسىندا ەرەكشە قاجەتتىلىكتەرى بار ادامدار ءۇشىن جاعدايدى جاقسارتۋ ماسەلەلەرىندە وڭ ديناميكا بايقالادى.
«كۇن سايىن قالا بويىنشا مۇگەدەكتىگى بار ادامدار ءۇشىن جاعداي جاسالۋدا. كيروۆ ساياباعىندا تروتۋاردىڭ بويىندا كورۋ قابىلەتى ناشار ادامدارعا ارنالعان تاكتيلدى باعىتتاعىشتار ورناتىلدى، قالا بويىنشا بانكتەرگە، سۋپەرماركەتتەرگە، كافەلەرگە كىرۋ مۇمكىندىگى قامتاماسىز ەتىلدى. اتاپ ايتقاندا، مۇگەدەكتىگى بار ادامدارعا ارنالعان تۇراق ورىندارى، پاندۋستار مەن كىرۋ توپتارى ستاندارتتارعا سايكەس كەلەدى، جالپى قالا بويىنشا ينفراقۇرىلىم وبەكتىلەرىن قولجەتىمدىلىك نورمالارىنا سايكەس كەلتىرۋ بويىنشا جۇمىستار جۇرگىزىلۋدە، بۇعان مەن وتە قۋانىشتىمىن»، – دەپ ءوز پىكىرىمەن ءبولىستى ەرگەن بەكارىستانوۆ.
ەستەرىڭىزگە سالا كەتەيىك، 2023 جىلعى 1 شىلدەدە ق ر الەۋمەتتىك كودەكسى كۇشىنە ەنگەن كەزدەن باستاپ، ەلىمىزدە مەملەكەتتىك الەۋمەتتىك قورعاۋ ينسپەكتورلارىنىڭ ينستيتۋتى ەنگىزىلدى. ولاردىڭ قۇزىرەتىنە مۇگەدەكتىگى بار ادامداردى الەۋمەتتىك قورعاۋ، ارناۋلى الەۋمەتتىك قىزمەتتەر كورسەتۋ جانە الەۋمەتتىك قامسىزداندىرۋ سالاسىنداعى زاڭنامانىڭ ساقتالۋىن باقىلاۋدى جۇزەگە اسىرۋ كىرەدى.