الەۋمەتتىك ينسپەكتورلار حالىقتىڭ الەۋمەتتىك وسال توپتارىنىڭ قۇقىقتارىن قورعاۋ ماقساتىندا 50-دەن استام تەكسەرۋ جۇرگىزدى
ق ر الەۋمەتتىك كودەكسىنىڭ كۇشىنە ەنۋىمەن وسى جىلدىڭ 1 شىلدەسىندە ەلىمىزدە قۇزىرەتىنە مۇگەدەكتىگى بار ادامداردى الەۋمەتتىك قورعاۋ، ارناۋلى الەۋمەتتىك قىزمەتتەر كورسەتۋ جانە الەۋمەتتىك قامسىزداندىرۋ سالاسىنداعى زاڭنامانىڭ ساقتالۋىن باقىلاۋدى جۇزەگە اسىرۋ كىرەتىن مەملەكەتتىك الەۋمەتتىك قورعاۋ ينسپەكتورلارى ينستيتۋتى ەنگىزىلدى، دەپ حابارلايدى Almaty-akshamy.kz.
ءبىر اي ىشىندە الەۋمەتتىك ينسپەكتورلار 53 تەكسەرۋ جۇرگىزدى، ونىڭ 40-ى جوسپاردان تىس جانە 13ء-ى پروفيلاكتيكالىق باقىلاۋ شەڭبەرىندە بولدى.
مەملەكەتتىك باقىلاۋمەن: 12 مەكتەپ، جەرگىلىكتى اتقارۋشى ورگانداردىڭ 6 اۋداندىق ءبولىمى جانە جەرگىلىكتى اتقارۋشى ورگانداردىڭ وبلىستىق باسقارمالارى، 6 اكىمدىك، 5 دۇكەن، 3 ساۋدا ورتالىعى، 3 مەديسينالىق-الەۋمەتتىك مەكەمە، 2 اۋرۋحانا، 2 بانك بولىمشەسى، 2 قازپوشتا بولىمشەسى، 1 فيتنەس-كلۋب، 1 ساناتوريي، 1 ۋنيۆەرسيتەت جانە ت. ب. قامتىلدى.
ماسەلەن، قىزىلوردا وبلىسى بويىنشا ەڭبەك جانە الەۋمەتتىك قورعاۋ كوميتەتىنىڭ دەپارتامەنتى شيەلى اۋداندىق جۇمىسپەن قامتۋ، الەۋمەتتىك باعدارلامالار جانە ازاماتتىق حال اكتىلەرىن تىركەۋ ءبولىمىنىڭ قىزمەتىنە پروفيلاكتيكالىق باقىلاۋ جۇرگىزدى، ونىڭ ناتيجەلەرى بويىنشا مۇگەدەكتىگى بار 7 بالانى پروتەزدىك-ورتوپەديالىق كومەكپەن ۋاقتىلى قامتاماسىز ەتپەۋ فاكتىلەرى انىقتالدى.
اتالعان فاكتىلەر بويىنشا ءبولىم باسشىسىنا انىقتالعان بۇزۋشىلىقتاردى جويۋ تۋرالى نۇسقاما بەرىلدى. پروفيلاكتيكالىق باقىلاۋ شارالارىنىڭ ناتيجەسىندە مۇگەدەكتىگى بار 7 بالانىڭ قۇقىعى قورعالدى.
شىعىس قازاقستان وبلىسى بويىنشا ەڭبەك جانە الەۋمەتتىك قورعاۋ كوميتەتىنىڭ دەپارتامەنتى شاعىم نەگىزىندە شىعىس قازاقستان وبلىسى ادۆوكاتتار القاسى ورنالاسقان عيماراتقا جوسپاردان تىس تەكسەرۋ جۇرگىزدى. ناتيجەسىندە پاندۋستىڭ، تاكتيلدى باعىتتاعىشتاردىڭ جانە مۇگەدەكتىگى بار ادامدار ءۇشىن ارنايى كورسەتكىشتەردىڭ بولماۋى سەكىلدى بۇزۋشىلىقتار انىقتالدى.
تەكسەرۋ ناتيجەلەرى بويىنشا شقو ادۆوكاتتار القاسىنىڭ باسشىسىنا انىقتالعان بۇزۋشىلىقتاردى جويۋ تۋرالى نۇسقاما بەرىلدى جانە اكىمشىلىك ايىپپۇل سالىندى.
سونىمەن قاتار مەملەكەتتىك الەۋمەتتىك ينسپەكتورلار ينستيتۋتى ەنگىزىلگەنگە دەيىن ق ر ەحاقم ەڭبەك جانە الەۋمەتتىك قورعاۋ كوميتەتىنىڭ اۋماقتىق دەپارتامەنتتەرى 2023 جىلدىڭ 1 جارتىجىلدىعىندا 750 تەكسەرۋ جۇرگىزدى، انىقتالعان بۇزۋشىلىقتاردى جويۋ تۋرالى 533 ۇيعارىم بەرىلدى، 44 ملن تەڭگەدەن استام سوماعا 233 ايىپپۇل سالىندى.
2023 جىلدىڭ 1 شىلدەسىنەن باستاپ الەۋمەتتىك ينسپەكتورلاردى ەنگىزۋ حالىقتىڭ الەۋمەتتىك وسال ساناتتارىنىڭ قۇقىقتارىن ۋاقتىلى قورعاپ قانا قويماي، مۇگەدەكتىگى بار ادامداردىڭ ءومىر ءسۇرۋ ساپاسىن ارتتىرۋعا دا ىقپال ەتپەك