«الەۋمەتتىك ءاميان» جوباسى قالاي جۇمىس ىستەيدى
قوستاناي. قازاقپارات – پرەمەر-مينيستردىڭ ورىنباسارى – ساۋدا جانە ينتەگراسيا ءمينيسترى سەرىك جۇمانعارين «الەۋمەتتىك ءاميان» جوباسى قالاي جۇمىس ىستەيتىنىن ءتۇسىندىردى، دەپ حابارلايدى Almaty-akshamy.kz Inform.kz-كە سىلتەمە جاساپ.
«الەۋمەتتىك ءاميان» تەك اقشالاي قولداۋ شارالارىن عانا قاراستىرمايدى. اقشالاي ەمەس شارالار دا بولادى. مىسالى، تەگىن مەديسينالىق كومەكتىڭ كەپىلدەندىرىلگەن كولەمى اياسىندا دارىگەرگە بارساڭىز، سىزگە الەۋمەتتىك ءاميانىڭىزدا رەسەپت ساتىپ الۋعا ۆاۋچەر بار ەكەنى تۋرالى حابارلاما كەلەدى. سونداي-اق، بالاڭىزدىڭ مەكتەپتە تاماقتانۋى ءۇشىن ۆاۋچەر – ۇزبەلى تالون بولادى. وسى شارالاردىڭ بارلىعى ىسكە اسىرىلدى، ءقازىر پيلوتتىق رەجيمدە قولدانىستا جانە 1 قاڭتاردان باستاپ الەۋمەتتىك ءاميانعا كوشەمىز»، - دەدى سەرىك جۇمانعارين قوستاناي وبلىسىنىڭ جۇرتشىلىعىمەن جانە بيزنەس-قوعامداستىعىمەن كەزدەسۋدە.
سونىمەن قاتار پرەمەر-مينيستردىڭ ورىنباسارى ازىق-تۇلىك باعاسىنىڭ ءوسۋىن باقىلاۋدى جالعاستىرۋعا ۋادە بەردى.
«باعانىڭ ءوسۋىن باقىلاۋدى جالعاستىرامىز، ويتكەنى كەلەسى جىلى ينفلياسيا بويىنشا مۇلدەم باسقا پارامەترلەر تۇر. ءبىراق، وندىرۋشىلەردى قاتاڭ رەتتەۋدەن باس تارتۋدى شەشتىك، ويتكەنى وندىرۋشىلەردىڭ دامۋىنسىز ءبىز ەشقاشان يمپورت ونىمدەرىنە تاۋەلدىلىكتەن ارىلا المايمىز. بۇل رەتتە، ازىرگە اقشا اۋدارىمدارى بانك كارتالارىڭىزعا – سىزدە بار كارتالارعا جۇرگىزىلەدى. مونەتارلىق قولداۋ شارالارى بانك كارتاسىنا تۇسەدى، مونەتارلىق ەمەس شارالار – الەۋمەتتىك ءامياندا بولادى»، - دەپ تۇيىندەدى مينيستر.