حالىقارالىق كىتاپ جانە پوليگرافيا جارمەڭكەسى ءوتتى.
مەگاپوليستە ءۇش كۇن قاتارىنان «اتاكەنت» قازاقستان ىسكەرلىك ىنتىماقتاستىق ورتالىعىندا ونىنشى رەت «ۇلى جىبەك جولىمەن–2022» حالىقارالىق كىتاپ جانە پوليگرافيا جارمەڭكەسى ءوتتى، دەپ حابارلايدى Almaty-akshamy.kz.
اتالمىش شارانى ق ر مادەنيەت جانە سپورت مينيسترلىگىنىڭ قولداۋىمەن «اتاكەنت-ەكسپو» حالىقارالىق كورمە كومپانياسى مەن ق ر ۇلتتىق مەملەكەتتىك كىتاپ پالاتاسى، قازاقستاننىڭ باسپاگەرلەر، پوليگرافيستەر جانە كىتاپ تاراتۋشىلار قاۋىمداستىعىمەن بىرلەسىپ ۇيىمداستىردى.
«بۇل كورمە قالامىزدا 10 جىل قاتارىنان ءوتىپ كەلە جاتىر. سوڭعى 2-3 جىلدا پاندەمياعا بايلانىستى توقتاپ قالعان ەدى. مىنە، ەندى قايتا قولعا الىپ جاتىرمىز. الداعى ۋاقىتتا جىل سايىن وتكىزەمىز دەگەن جوسپارىمىز بار. كورمەگە الەمنىڭ تۇكپىر-تۇكپىرىنەن مىقتى-مىقتى باسپالار كەلىپ، وزدەرىنىڭ جۇمىستارىن تانىستىرىپ جاتىر. قازاقستاندىق كوپتەگەن باسپاگەرلەر دە كىتاپتارىن كورمەگە قويىپ جاتىر. سونداي-اق، شەتەلدىك باسپاگەرلەرمەن تانىسىپ، تاجىريبە الماسىپ وتىرعان جايىمىز بار. ءار ەل وزدەرىنىڭ جازۋشىلارىنىڭ شىعارمالارىن، ۇلتىق دۇنيەتانىمنان حابار بەرەتىن شىعارمالارىن وقىرمان نازارىنا ۇسىنۋدا. باعدارلاما اياسىندا جازۋشىلار مەن باسپاگەرلەر ءوز وي-تولعانىستارىن ورتاعا سالىپ، جاستارمەن قىزىقتى اڭگىمە وربۋدە. ۇزدىك باسپاگەرلەر انىقتالىپ، ولارعا باعالى سىيلىقتار دا تابىستالدى»، – دەيدى ق ر ۇلتتىق مەملەكەتتىك كىتاپ پالاتاسىنىڭ ديرەكتورى ءادىل قويتانوۆ.
كورمەدە قازاقستان، رەسەي، قىرعىزستان، وزبەكستان ەلدەرىنىڭ جەتەكشى باسپالارى، پوليگرافيالىق كومپانيالارى مەن كىتاپحانالارى، سونداي-اق، يران يسلام رەسپۋبليكاسىنىڭ الماتى قالاسىنداعى باس كونسۋلدىعىنىڭ مادەني وكىلدەرى قاتىستى.
«قازاقستاندا ءۇش كۇن قاتارىنان كىتاپ تويى بولدى. الىس-جاقىن ەلدەردىڭ بارلىعى شاقىرىلدى. ونىڭ ىشىندە قىرعىز اعايىندار، ءبىز دە بارمىز. جارمەڭكەگە ەڭ ۇزدىك 50 باسپاگەرلەردىڭ 500-گە جۋىق كىتاپتارىن الا كەلدىك. ونىڭ ءبىرقاتارى – قىرعىزستاننىڭ حالىق جازۋشىسى شىڭعىس ايتماتوۆتىڭ شىعارمالارى. سونداي-اق، قىرعىزستاننىڭ تاريحى، ءسالت-داستۇرى جايلى جازىلعان كىتاپتار دا بار. كىشكەنتاي بالالارعا ارنالعان كىتاپتار دا قويىلىپ جاتىر. ءقازىر قاراپ وتىرسام، جارمەڭكە وتە جوعارى دەڭگەيدە ۇيىمداستىرىلعان. مۇنداي جارمەڭكەلەر كوپ بولسا، ىنتىماقتاستىعىمىز، بىرلىگىمىز دە ارتا بەرەتىنى ءسوزسىز»، – دەيدى قىرعىزستان مەملەكەتتىك كىتاپ پالاتاسىنىڭ ديرەكتورى كويچۋمان مومۋنكۋلوۆ.
اتالمىش ءىس-شارادا ق ر ۇلتتىق مەملەكەتتىك كىتاپ پالاتاسىنىڭ 85 جىلدىق مەرەيتويىنا ارنالعان عىلىمي-پراكتيكالىق كونفەرەنسياسى ۇيىمداستىرىلدى. سونداي-اق، Bookfund.kz كىتاپتاردىڭ اقپاراتتىق-انىقتامالىق جۇيەسىنىڭ تانىستىرىلىمى ءوتتى. «نارىقتاعى كىتاپ ءىسى: بۇگىن مەن بولاشاق» اتتى ەلىمىزدىڭ بارلىق وڭىرىنەن كەلگەن باسپاگەرلەردىڭ كەزدەسۋى بولدى. بۇدان بولەك، «كىتاپ ءىسى نارىعىندا شەتەلدىك باسپا مەكەمەلەرىمەن تاجىريبە الماسۋ» اتتى دوڭگەلەك ۇستەل ۇيىمداستىرىلدى.
«ءبىزدىڭ باسپا «ۇلى جىبەك جولى» كورمەسى باستالعالى 10 جىل قاتارىنان قالا كەلبەتىن ايشىقتايتىن كىتاپتار مەن اقىن-جازۋشىلاردىڭ شىعارمالارىن ۇسىنىپ كەلەدى. كىتاپقا قىزىعۋشىلىق تانىتىپ جاتقان جاستارىمىزدى كورىپ، قۋانىپ وتىرمىز. وسى كورمەگە «مەنىڭ قازاقستانىم!» سەرياسى بويىنشا "قازاقتىڭ سالت-داستۇرلەرى"، "قۇراق كورپە"، "شاڭىراق" دەگەن كىتاپتاردى الىپ كەلدىك. «الماتى كىتاپ» باسپاسى كوبىنە شەتەلدىك تۋريستەرگە كادە-سىي رەتىندە ارنالعان كىتاپتاردى ۇسىنادى. سونداي-اق، بيىل بالالار جىلى دەپ جاريالاعانىنا بايلانىستى بۇلدىرشىندەرگە ارنالعان بازارلىعىمىز دا بار»، – دەيدى «الماتىكىتاپ» باسپاسىنىڭ قىزمەتكەرى گۇلمارال قابدولشايەۆا.
سونداي-اق، جارمەڭكەدە بەلگىلى قالامگەرلەرمەن جانە جاس اۆتورلارمەن كەزدەسۋلەر، جاڭادان شىققان كىتاپتاردىڭ تانىستىرىلىمى، ءتۇرلى كونسەرتتىك قويىلىمدار مەن جىر كەشتەرى ۇيىمداستىرىلادى. بالالار جىلى اياسىندا جەتكىنشەكتەردىڭ شىعارماشىلىعىن قولداۋعا ارنالعان ادەبي ويىندار مەن جۇمباقتار، ولەڭ وقۋ جانە ت.ب. بالالار باعدارلاماسى ازىرلەندى.
سونىمەن قاتار، كورمە اياسىندا 2020–2022 جىلدار ارالىعىندا جارىققا شىققان كىتاپتار اراسىنداعى بايقاۋدىڭ جەڭىمپازدارى ماراپاتتالدى. بۇل بايقاۋ التى نوميناسيا بويىنشا، ياعني «جىل كىتابى»، «ۇزدىك كوركەم باسىلىم»، «ۇزدىك وقۋلىق»، «بالالار مەن جاسوسپىرىمدەرگە ارنالعان ۇزدىك كوركەم جانە تانىمدىق باسىلىم»، «ۇزدىك فوتوالبوم»، «ۇزدىك پوليگرافيالىق ورىنداۋ» نوميناسياسى بويىنشا جەڭىمپازدار انىقتالادى.
