دەنساۋلىق ساقتاۋ ءمينيسترى اجار عينيات ينفەكسيالاردىڭ كەيبىر تۇرلەرى بويىنشا ەلدەگى ەپيدەميولوگيالىق جاعدايدى تۇراقتاندىرۋ شارالارى تۋرالى ايتتى، دەپ حابارلايدى Almaty-akshamy.kz.
«اعىمداعى جىلدىڭ 10 ايىندا 21 ينفەكسيالىق اۋرۋ، ونىڭ ىشىندە: وبا، تىرىسقاق، ديفتەريا، پوليوميەليت، ءىش سۇزەگى، قۇتىرۋ، ۆيسەرالدىق لەيشمانيوز، تۋليارەميا جاعدايلارى تىركەلگەن جوق. 2022 جىلدىڭ ۇقساس كەزەڭىمەن سالىستىرعاندا 39 ينفەكسيالىق اۋرۋ بويىنشا سىرقاتتانۋشىلىقتىڭ تومەندەۋىنە قول جەتكىزىلدى»، - دەدى مينيستر ءوز ءسوزىنىڭ باسىندا.
ونىڭ ايتۋىنشا، ەپيدەميولوگيالىق ماۋسىم باستالعاننان بەرى ءجرۆي-دىڭ 1 ملن 370 مىڭ جاعدايى تىركەلدى، ونىڭ ىشىندە جرۆي-مەن اۋىرعانداردىڭ 66%-ىن 114 جاسقا دەيىنگى بالالار قۇرايدى. وتكەن جىلدىڭ سايكەس كەزەڭىمەن سالىستىرعاندا سىرقاتتانۋشىلىق 8%-عا تومەندەدى. قاراشا ايىنان باستاپ تۇماۋدىڭ 115 زەرتحانالىق راستالعان جاعدايى تىركەلدى، الدىڭعى جىلدارداعىداي ا(H3N2) تۇماۋى مەن ۆ تۇماۋىنىڭ اينالىمى بايقالادى، تۇماۋعا قارسى ۆاكسيناسيالاۋ كومپانيالارى اياقتالدى، 2 ملن.400 مىڭ ادام ەگىلدى، بۇل ەل حالقىنىڭ 12،1% -ىن قۇرايدى.
كوروناۆيرۋس ينفەكسياسى بويىنشا ەپيدەميولوگيالىق جاعداي تۇراقتى، دەپ اتاپ ءوتتى ۆەدومستۆو باسشىسى.
«اعىمداعى جىلدىڭ باسىنان بەرى سىرقاتتانۋشىلىقتىڭ 2،6 ەسە تومەندەۋى بايقالادى. اعىمداعى جىلدىڭ 10 ايىندا 11 734 ادام اۋىرىپ، 1310 ادام ۆاكسيناسيالاندى. بۇگىنگى تاڭدا 2 پاسيەنت ستاسيونارلىق ەمدەلۋدە»، - دەدى مينيستر. «بۇگىنگى تاڭدا قىزىلشا اۋرۋىنىڭ ەپيدەميولوگيالىق جاعدايى كۇردەلى. رەسپۋبليكادا قىزىلشانىڭ 17 مىڭنان استام جاعدايى تىركەلگەن، ونىڭ 82%-ى بالالارعا، ونىڭ ىشىندە 83%-ى ۆاكسيناسيالانباعاندارعا تيەسىلى. بۇل رەتتە، بالالاردىڭ 60%-ى باس تارتۋعا بايلانىستى، قالعان بالالار ەگۋ جاسىنا جەتپەۋى جانە مەديسينالىق كورسەتىلىمدەردىڭ سەبەبىنەن ۆاكسيناسيالانباعان. قىزىلشا اۋرۋى بارلىق وڭىرلەردە تىركەلدى»، - دەدى مينيستر.
«اعىمداعى جىلدىڭ قىركۇيەك ايىنان باستاپ ۇيىمداسقان، وقۋ جىلىندا ۇجىمداردا بالالاردىڭ جينالۋىنا بايلانىستى سىرقاتتانۋشىلىقتىڭ كۇرت ءوسۋى بايقالادى، ناتيجەسىندە سىرقاتتانۋشىلىق دەڭگەيى 2 ەسەگە ءوستى. قاراشا ايىندا قىزىلشانىڭ 6 مىڭنان استام جاعدايى تىركەلدى، دەپ قوستى ا. عينيات.
الەمنىڭ 167 ەلىندە قىزىلشا اۋرۋىنىڭ ءوسۋى بايقالادى. قىزىلشامەن سىرقاتتانۋشىلىقتىڭ وسۋىنە مىنالار سەبەپ بولدى: كۆي پاندەمياسى كەزىندە جوسپارلى ۆاكسيناسيالاۋدى وتكىزىپ العان بالالاردىڭ ەسەبىنەن سىرقاتتانۋشىلىقتىڭ ءوسۋى، ۆاكسيناسيالاۋدان باس تارتۋدىڭ ءوسۋى، بۇل حالىقتىڭ اراسىندا يممۋندىق ەمەس توپتىڭ جينالۋىنا ىقپال ەتتى. الەۋمەتتىك جەلىلەردە، ينتەرنەت-پورتالداردا ۆاكسيناسيالاۋ تۋرالى دۇرىس ەمەس اقپاراتتىڭ، سونداي-اق يممۋنداۋ سالاسىنداعى جالعان ساراپشىلاردىڭ قولجەتىمدىلىگى.
«قىزىلشا بويىنشا جاعدايدى تۇراقتاندىرۋ ماقساتىندا مىناداي شارالار قابىلدانۋدا: اعىمداعى جىلدىڭ 10 ايىندا قىزىلشاعا قارسى جوسپارلى ۆاكسيناسيالاۋمەن 600 مىڭنان استام ادام قامتىلدى، بۇل 1 جاستان 6 جاسقا دەيىنگى بالالاردىڭ 84،0%-ىن قۇرايدى، بۇل ددۇ ۇسىنىستارىنا سايكەس كەلەدى. جىل سوڭىنا دەيىن وسى جاس توبىنداعى 100 مىڭنان استام بالا ۆاكسيناسيالانۋعا ءتيىس»، - دەدى مينيستر.
سونىمەن قاتار، قىزىلشا وشاقتارىندا 15 مىڭنان استام ۆاكسيناسيالانباعان بايلانىستا بولعان ادامدار شۇعىل ۆاكسيناسيامەن قامتىلدى.
اعىمداعى ەپيدەميولوگيالىق جاعداي قىزىلشانىڭ 65%-دان استامىن قۇرايتىن 5 جاسقا دەيىنگى بالالاردىڭ اراسىندا سىرقاتتانۋشىلىقتىڭ تىركەلۋىمەن سيپاتتالاتىنىن تاعى دا اتاپ وتكىم كەلەدى. وسىعان بايلانىستى، 6 قاراشادان باستاپ وسى ساناتتىڭ اراسىندا قوسىمشا جاپپاي يممۋنداۋ باستالدى، 100 مىڭنان استام ادام قامتىلدى. ءمينيستردىڭ ايتۋىنشا، قوسىمشا جاپپاي يممۋنداۋ جۇرگىزۋ ءۇشىن قىزىلشاعا قارسى ۆاكسينانىڭ 1،5 ملن. دوزاسى ساتىپ الىندى، ونىڭ 500 مىڭ دوزاسى كەلىپ ءتۇستى، جەلتوقسان ايىندا 1 ملن.دوزا جەتكىزىلەدى دەپ كۇتىلۋدە. وسىعان بايلانىستى حالىقتىڭ بەلسەندىلىگى مەن ۆاكسيناسيالاۋدى تاڭداۋ ءبىزدىڭ بالالارىمىزدىڭ دەنساۋلىعىن قورعاۋدى قامتاماسىز ەتۋگە مۇمكىندىك بەرەدى، دەپ اتاپ ءوتتى دەنساۋلىق ساقتاۋ مينيسترلىگىنىڭ باسشىسى.
«قوسىمشا يممۋنداۋدىڭ تيىمدىلىگى 2005، 2015 جانە 2019 جىلدارداعى قىزىلشانىڭ الدىڭعى ءورشۋى كەزىندە دالەلدەندى. تەك قوسىمشا جاپپاي يممۋنداۋمەن جوعارى قامتۋ عانا جەلتوقسان ايىندا قىزىلشا بويىنشا ەپيدەميولوگيالىق جاعدايدى تۇراقتاندىرۋعا جانە 2024 جىلعى قاڭتاردا سىرقاتتانۋشىلىقتى ازايتۋعا مۇمكىندىك بەرەدى. ۆاكسينامەن باسقارىلاتىن اۋرۋلار مەن اسقىنۋلاردان بالالاردىڭ دەنساۋلىعىن قورعاۋ تۋرالى شەشىم قابىلدايتىن اتا-انالاردىڭ ۆاكسيناسيالاۋدان باس تارتۋ كوكجوتەل، ديفتەريا، پوليوميەليت، سىرەسپە سياقتى ۇمىتىلىپ كەتكەن ءقاۋىپتى اۋرۋلاردىڭ ورشۋىنە اكەلۋى مۇمكىن»، - دەپ قورىتىندىلادى اجار عينيات.