ايتۋلى شاراعا دايىندىق جۇمىستارى باستالىپ كەتتى.
قازاقستاندا جىلدىڭ باستى حالىقارالىق شارالارىنىڭ بىرىنە دايىندىق قىزا ءتۇستى، دەپ حابارلايدى Almaty-akshamy.kz. Qazaqtv.com سايتىنا سىلتەمە جاساپ.
ەلوردادا قىركۇيەك ايىنىڭ ورتاسىندا ەل پرەزيدەنتىنىڭ توراعالىعىمەن الەمدىك جانە ءداستۇرلى دىندەر كوشباسشىلارىنىڭ جەتىنشى سەزى وتەدى دەپ جوسپارلانعان. جيىنعا 60 ەلدەن 130-عا تارتا حالىقارالىق دەلەگاسيا قاتىسادى دەپ كۇتىلۋدە.
قادىرمەندى قوناقتاردىڭ ءبىرى - ريم پاپاسى فرانسيسك بولماق. «پاندەميادان كەيىنگى كەزەڭدەگى ادامزاتتىڭ الەۋمەتتىك-رۋحاني دامۋىنداعى الەمدىك جانە ءداستۇرلى كونفەسسيالار كوشباسشىلارىنىڭ ءرولى». بۇل كەزەكتى باس قوسۋدىڭ بەكىتىلگەن ايدارى. جالپى بيىلعى كەزدەسۋ 4 سەكسيالىق وتىرىس تۇرىندە وتەدى. قاتىسۋشىلار ءبىرقاتار وزەكتى ماسەلەنىڭ باسىن قايىرماق.
اتاپ ايتساق، ءبىلىم بەرۋ مەن ءدىني اعارتۋ ءىسى، رۋحاني جانە مورالدىق قۇندىلىقتاردى نىعايتۋ، ايەلدىڭ ءرولى مەن الەۋمەتتىك مارتەبەسىن كوتەرۋ جانە ەكسترەميزم مەن تەرروريزمگە قارسى كۇرەستىڭ ءتيىمدى امالدارى تالقىعا تۇسەدى.