لاستانۋ دەڭگەيى بويىنشا قازاقستاننىڭ رەيتينگتەگى كورسەتكىشى كوڭىل كونشىتپەيدى
قالالاردىڭ لاستانۋ دەڭگەيى ەڭ ناشار 115 ەلدىڭ اراسىندا تۇزىلگەن رەيتينگتە قازاقستان 33-ورىندا تۇر، دەپ حابارلايدى Almaty-akshamy.kz قازاقپاراتقا سىلتەمە جاساپ.
ەلدەردىڭ قالالارىنىڭ لاستانۋىنا وراي تۇزىلگەن رەيتينگتە قازاقستان الەمنىڭ 115 ەلىنىڭ ىشىندە 33-ورىنعا تۇراقتاعان. لاستانۋ يندەكسى – 73،4.
بۇل رەتتە يندەكستىڭ جوعارى بولۋى جاعدايدىڭ ناشار ەكەندىگىن بىلدىرەدى. ەڭ لاس ەلدەر رەيتينگىنىڭ كوشباسىندا كامەرۋن، موڭعوليا جانە ميانما تۇر.
ال الەمدەگى ەڭ ۇزدىك كورسەتكىش، ياعني تازالىعى جاعىنان جوعارى باعا فينلياندياعا تيەسلى. بۇل ەلدىڭ لاستانۋ يندەكسى 12،1 عانا.
رەيتينگكە تمد ەلدەرىنىڭ ىشىندە قازاقستانعا قاراعاندا لاستانۋى جوعارى ەلدەردىڭ قاتارىندا ءازىربايجان بار. ال مولدوۆا، ۋكراينا، رەسەي، ارمەنيا جانە بەلارۋستا جاعداي ءبىرشاما جاقسى.
وتكەن جىلدىڭ 12 ايىنىڭ قورىتىندىسىندا ەلىمىزدە قورشاعان ورتانى قورعاۋعا باعىتتالعان كۇردەلى ينۆەستيسيا كولەمى 4،3 پايىزعا ارتىپ، 16،،9 ملرد تەڭگەگە دەيىن جەتتى. سالىستىرمالى تۇردە ايتار بولساق، 2020 جىلى سەكتورعا سالىنعان ينۆەستيسيا كولەمى 157،1 ملرد تەڭگەنى قۇراعان بولاتىن.
وڭىرلەر اراسىندا سەكتورداعى كۇردەلى ينۆەستيسيانىڭ ەڭ جوعارى كولەمى جامبىل وبلىسىندا تىركەلگەن. ءوڭىر سەكتورعا 1 جىل بۇرىنعى كولەمگە قاراعاندا قارجىنى 4 ەسەگە ۇلعايتىپ، 52،8 ملرد تەڭگەگە جەتكىزگەن.
سونىمەن قاتار سەكتورعا قارجى سالۋدا نۇر-سۇلتان (26 ملرد تەڭگە) مەن اقتوبە وبلىسى (19،8 ملرد تەڭگە) جاقسى كورسەتكىشكە يە. ۇزدىك بەستىك قاتارىنا اتىراۋ مەن شىعىس قازاقستان وبلىستارى دا كىرەدى. ال الماتى وبلىسى ءبىر جىلدىڭ ىشىندە سەكتوردا 579،6 ملن تەڭگە جۇمساسا، سولتۇستىك قازاقستان وبلىسى وتكەن جىلى مۇلدە ينۆەستيسيا شىعىنداماعان.