ەرىكتىلەر الەمدىك قوزعالىسقا ىقپال ەتەتىن ەڭ بەلسەندى توپقا اينالعان.
ءقازىر ولاردىڭ سانى 5 ميللياردقا جۋىقتايدى، دەپ حابارلايدى aqshamnews.kz.
بىرىككەن ۇلتتار ۇيىمى بەكىتكەن ەرىكتىلەردىڭ دۇنيەجۇزىلىك دەكلاراسياسىندا ولار وزدەرىنىڭ تالانتى مەن ۋاقىتىن، بار ەنەرگياسىن ەشقانداي اقى كۇتپەستەن جەكە جانە ۇجىمدىق شارالارعا جۇمساۋعا قۇقىلى ەكەنى ايتىلعان. جالپى قازىردە ەرىكتىلەرگە قوعام تاراپىنان قانداي قولداۋلار جاسالعان.
بيىل دۇنيەجۇزىلىك قايىرىمدىلىق يندەكستە ۆولونتەرلىك ءىس-شارالارعا قاتىسۋ، بەيتانىس ادامدارعا كومەكتەسۋ بويىنشا يندونەزيا جەتىنشى رەت ۇزدىك ەل اتاندى. ەلدەگى جاستاردىڭ 90 پايىزى قايىرىمدىلىققا قارجى ءبولىپ، 60 پايىزى ەرىكتى رەتىندە قوعامدىق جۇمىستارعا بەلسەنە اتسالىسقان. جالپى بۇل تىزىمدەنگى العاشقى بەستىكتە، يندونەزيادان كەيىن، كەنيا، سينگاپۋر، گامبيا، نيگەريا ەلدەرى بار. بايقاساق، رەيتينگتەگى كوشباسشىلار كوبىنە اسا باي ەلدەر ەمەس.
دۇنيەجۇزىلىك قايىرىمدىلىق يندەكسى بويىنشا ۇزدىك 5 ەل
يندونەزيا 74/100
كەنيا 63/100
سينگاپۋر 61/100
گامبيا 61/100
نيگەريا 60/100
قىزمەتكە ورنالاسۋدا ەرىكتىلىك ماڭىزدى رولگە يە
شەتەلدە جۇمىسقا ورنالاسۋعا كەلگەن جاس ماماننىڭ تۇيىندەمەسىندە ۆولونتەرلىك قىزمەتتىڭ بولۋى – ۇلكەن جەتىستىك. سوندىقتان دا ۋنيۆەرسيتەت نەمەسە كوللەدج ستۋدەنتتەرى ەرىكتى بولۋعا قۋانا كەلىسەدى. ماسەلەن، گەرمانيادا "الەۋمەتتىك جىل" دەگەن زاڭ بار. ياعني، ورتا مەكتەپتى بىتىرگەننەن كەيىن كەز كەلگەن جەتكىنشەك، ءبىر جىلداي الەۋمەتتىك جۇمىسپەن اينالىسا الادى. بۇل كەيىننەن جۇمىسقا ورنالاسۋ كەزىندە ۇلكەن رولگە يە ياعني جەڭىلدىك قاراستىرىلادى. ستاتيستيكا بويىنشا، حالىقتىڭ 34 پايىزى ۆولونتەر. ولار قايىرىمدىلىق باعىتتاعى بىرلەستىكتەر مەن جوبالاردا ەرىكتى تۇردە، 15 ساعاتتان جۇمىس ىستەي الادى. ءقازىر ەلدە، 70 مىڭداي كوممەرسيالىق ەمەس ۇيىم بار. وعان 2 ميلليونداي ەرىكتى تىركەلگەن.
بۇۇ: جىل باسىنان بەرى گۋمانيتارلىق ۇيىمداردىڭ 281 قىزمەتكەرى قايتىس بولدى
ەرىكتى بولۋ ەرلىكپەن تەڭ. بيىل الەمدە قازا تاپقان گۋمانيتارلىق ۇيىم وكىلدەرىنىڭ سانى بويىنشا "انتيرەكورد" ورنادى. جىل باسىنان بەرى 281 قىزمەتكەر كوز جۇمعان. ءتيىستى مالىمەتتى بۇۇ كەلتىرىپ وتىر. قايعىلى وقيعالاردىڭ كوبى گازا سەكتورىندا تىركەلدى. جالپى ايماقتا 2023-جىلدىڭ قازانىندا قارۋلى قاقتىعىس باستالعالى گۋمانيتارلىق ۇيىمنىڭ 330-دەن اسا قىزمەتكەرى اجال قۇشقان. اراسىندا حالىقارالىق مەكەمە وكىلدەرى دە بار.