الەمدە زەينەتكە شىعۋ جاسى قانداي

الەمدە ەڭ ەرتە زەينەتكەر اتاناتىندار كورشى جۇڭگو حالقى مەن تۇركيالىقتار بولىپ سانالادى

بىرىككەن ۇلتتار ۇيىمى كەلتىرگەن دەرەككە سايكەس بۇگىندە الەم بويىنشا جاسى 60-تان اسقان ازاماتتاردىڭ سانى 1 ميللياردتان اسادى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.

بولجام بويىنشا 2050 جىلعا قاراي ولاردىڭ قاتارى 1،5 ميللياردقا جەتەدى. وسى رەتتە قارت كىسىلەردىڭ زەينەتكە شىعۋ جاسىنا توقتالار بولساق، ەرلەر اراسىندا ول 60 پەن 67 جاس ارالىعىندا بولسا، ايەلدەر زەينەتكەرلىككە 55 پەن 67 جاسىندا شىعادى. 

الەمدە ەڭ ەرتە زەينەتكەر اتاناتىندار كورشى جۇڭگو حالقى مەن تۇركيالىقتار بولىپ سانالادى. بۇل مەملەكەتتەردە ەر ازاماتتار 60 جاسىندا شىعادى. ال ايەلدەرگە كەلسەك، قىتايدا ولار 55 جاسىندا، تۇركيادا 58-ىندە زەينەتاقى الا باستايدى.

ەڭ كەش اقش، يتاليا مەن نورۆەگيا ازاماتتارى شىعادى. قولدانىستاعى زاڭناماعا سايكەس، ولار 67-گە كەلگەندە ءبىر-اق زەينەت جاسىنا جەتتى دەپ سانالادى. ال ۇلىبريتانيادا 66 جاستا، اۆستراليادا بولسا، تۇرعىندارعا 65-كە تولعاندا عانا زەينەتكە شىعۋ رۇقسات ەتىلگەن.