الەم بويىنشا كوروناۆيرۋسقا قارسى ۆاكسينالانعاندار سانى 7 ميللياردتان استى. ولاردىڭ جارتىسىنان كوبى ءۇش ەلدە: قىتايدا (2،3 ملرد)، ءۇندىستاندا (1،1 ملرد) جانە اقش-تا (0،4 ملرد) سالىندى، دەپ حابارلايدى almaty-akshamy.kz قازاقپاراتقا سىلتەمە جاساپ.
قازىرگى ۋاقىتتا ادامدارعا COVID-19-عا قارسى ۆاكسينالاردىڭ 7،001 ملرد دوزاسى سالىنعان. ءبۇتىن عالاماردا ۆاكسيناسيانىڭ تولىق كۋرسىنان قانشا ادام وتكەنىن انىقتاۋ ءالى دە مۇمكىن ەمەس. ويتكەنى كوپتەگەن ەل تەك كوۆيد ۆاكسينالارىنىڭ سەرتيفيكاتتالعان دوزالارىنىڭ سانى مەن جاسالعان ەكپەلەردىڭ سانى تۋرالى عانا حابارلايدى.
ءباا مەن مالتادا تۇرعىنداردىڭ 90% استامى ەكپە سالدىرعان. پورتۋگاليا، كۋبا، چيلي، يسلانديا، كامبودجا، كاتار، يسپانيا، سينگاپۋر، برۋنەي جانە وڭتۇستىك كورەيا سياقتى مەملەكەتتەردە حالىقتىڭ 80% استامى كەمىندە ءبىر كومپونەنتپەن ەگىلگەن.
رەسەيدە، كوروناۆيرۋسپەن كۇرەس جونىندەگى فەدەرالدى جەدەل شتابتىڭ مالىمەتتەرى بويىنشا، 50،9 ميلليوننان استام ادام كوروناۆيرۋسقا قارسى ۆاكسيناسيانىڭ تولىق كۋرسىنان وتكەن، ال العاشقى كومپونەنتپەن 56،8 ميلليون ادام ەگىلگەن.