الەم حالقىنىڭ قارتايۋ پروبلەمالارىن شەشۋ، قارتتاردىڭ دەنساۋلىعىن، الەۋمەتتىك جانە ەكونوميكالىق جاعدايلارىن جاقسارتۋ جانە وسى ماسەلە بويىنشا حاباردارلىقتى ارتتىرۋ ماقساتىندا جىل سايىن 1 قازاندا حالىقارالىق قارتتار كۇنى اتاپ وتىلەدى. بۇۇ باس اسسامبلەياسى وسى ماسەلەگە نازار اۋدارۋ ماقساتىندا 1990 جىلدىڭ جەلتوقسانىندا ءتيىستى قارار قابىلدادى.
2023 جىلعى دۇنيەجۇزىلىك الەۋمەتتىك بايانداماعا سايكەس، پلانەتا حالقىنىڭ سانى بويىنشا ەگدە جاستاعى ادامداردىڭ ۇلەسى ءوسىپ كەلە جاتقانىن كورسەتەدى، دەپ حابارلايدى Almaty-akshamy.kz Aa.com.tr سايتى ۇسىنعان دەرەكتەرگە سۇيەنىپ.
بولجام بويىنشا، الەمدە 65 جانە ودان اسقان ادامداردىڭ سانى ەكى ەسەگە دەيىن ارتادى — 2021 جىلعى 761 ملن.ادامنان 2050 جىلى 1،6 ملرد. ادامعا دەيىن. 80 جاستان اسقان ادامداردىڭ سانى ودان دا تەز وسەدى.
قازىرگى ۋاقىتتا الەمدە 60 جاستان اسقان 700 ميلليونعا جۋىق ادام بار. 2050 جىلعا قاراي 60 جاستان اسقان ادامداردىڭ سانى ەكى ميللياردقا جەتىپ، الەم حالقىنىڭ 20 پايىزىنان استامىن قۇرايدى.
دامۋشى ەلدەردە قارتتار سانى وتە جىلدام داميدى. ازيا ەگدە جاستاعى ادامداردىڭ ەڭ كوپ سانى بار ايماققا اينالادى، ال افريكادا بارلىق جاس توپتارىنداعى حالىقتىڭ پروپورسيونالدى ءوسۋى بولادى.
2021 جىلى سولتۇستىك افريكا مەن باتىس ازيا ايماقتارىندا 65 جاستان اسقان 30 ميلليون ادام ءومىر ءسۇردى. بۇل سان 2050 جىلى 98 ميلليونعا دەيىن وسەدى دەپ بولجانۋدا. ساحارانىڭ وڭتۇستىگىندەگى افريكا ەلدەرىندە ەگدە جاستاعى حالىق سانى 2021 جىلعى 35 ميلليوننان 2050 جىلى 100 ميلليونعا دەيىن وسەدى دەپ كۇتىلۋدە.
شىعىس ازيا مەن وڭتۇستىك-شىعىس ازياداعى ەگدە جاستاعى حالىقتىڭ سانى 2050 جىلى 598 ملن-عا جەتەدى، 2021 جىلى بۇل كورسەتكىش 293 ملن بولعان ەدى.
ەۋروپا مەن سولتۇستىك امەريكا ەلدەرى بۇگىنگى كۇنى قارت ادامدار سانى ەڭ كوپ ايماقتاردىڭ قاتارىنا كىرەدى. 2021 جىلى 65 جاستان اسقان حالىق سانى 208 ملن دەڭگەيىندە تىركەلدى. 2050 جىلعا قاراي بۇل سان 303 ملن-عا دەيىن جەتەدى دەپ كۇتىلۋدە.
بۇۇ بايانداماسىندا ءبىلىم دەڭگەيى مەن دەنساۋلىق ساقتاۋعا قولجەتىمدىلىك ادامداردىڭ ءومىر ءسۇرۋ ۇزاقتىعىنا جانە ەگدە جاستاعى دەنساۋلىعىنا اسەر ەتەتىنى اتاپ وتىلگەن. تابىس تەڭسىزدىگى مەن ەڭبەك جاعدايىنىڭ بولماۋى دا ەگدە جاستاعى ادامداردىڭ ءومىر ءسۇرۋ دەڭگەيىنە اسەر ەتەدى.