قاتار استاناسى دوحادا ءوتىپ جاتقان نىسانا كوزدەۋدەن الەم كۋبوگىندە وتانداسىمىز اسەم ورىنباي بارلىق قارسىلاسىنان باسىم ءتۇسىپ، التىننان القا تاقتى، دەپ حابارلايدى almaty-akshamy.kz.
ۇلتتىق قۇراما سپورتشىسى ستەند اتۋدىڭ سكيت باعدارلاماسىنىڭ فينالىندا 51 ۇپاي جيناپ، تۇعىردىڭ ەڭ بيىك ساتىسىنا كوتەرىلدى. كۇمىس جۇلدەنى 50 ۇپاي العان يتاليالىق مەرگەن كيارا دي مارسيانتونيو يەلەنسە، قولا مەدال دانيا دجو ۆيسسيگە (اقش) بۇيىردى. تاعى ءبىر ايتا كەتەرلىگى، ءدال وسى باعدارلامادا ب ا ق سىناعان 3 دۇركىن وليمپيادا چەمپيونى كيمبەرلي روۋد (اقش) جۇلدەگە ءبىر تابان جەتپەي توقتادى.
«اسەم ورىنبايدى الەم كۋبوگى جارىسىنداعى جەڭىسىمەن شىن جۇرەكتەن قۇتتىقتايمىن. بيىل اسەم ءۇشىن وتە تابىستى ماۋسىم بولدى. ماسەلەن، ول قىتايداعى ازيا ويىندارىندا ەكى التىن، ءبىر قولا مەدال جەڭىپ السا، مىنە ارادا كوپ ۋاقىت وتپەي الەم كۋبوگىندە قارسىلاس شاق كەلتىرمەدى. بۇل – تاماشا كورسەتكىش. وتانداسىمىز الداعى بايراقتى باسەكەلەردە دە جانكۇيەرلەرىن قۋانتىپ، ۇزدىكتەر قاتارىنان كورىنەتىنىنە سەنىمدىمىن. نىسانا كوزدەۋدەگى بۇل جەڭىس وسى سپورت تۇرىمەن اينالىساتىن جاستاردى بيىك بەلەستەردى باعىندىرۋعا ىنتالاندىرادى»، - دەدى ەرمەك مارجىقپايەۆ.
حالىقارالىق نىسانا كوزدەۋ فەدەراسياسى (ISSF) مۇنداي فينالدى اراعا 4 جىل سالىپ ۇيىمداستىرىپ وتىر. باسەكەدە 42 ەلدەن كەلگەن 179 ۇزدىك مەرگەن ب ا ق سىناپ جاتىر. قازاق مەرگەنى ءقازىر ISSF رەيتينگىندە 7-ورىندا كەلە جاتىر.