اليمەنت ماسەلەسى الەم ەلدەرىندە دە وزەكتى.
بورىشكەرلەرگە قاتىستى قولدانىلاتىن جازانىڭ دا سان ءتۇرى بار. ماسەلەن، ەۋروپادا اليمەنت تولەۋدەن جالتارعانداردى 3 جىلعا دەيىن باس بوستاندىعىنان ايىرۋ قاراستىرىلعان. Cونداي-اق، ءبىرقاتار مەملەكەتتە اليمەنت تولەۋدەن جالتارعاندارعا قاتىستى زاڭ قاتاڭ، دەپ حابارلايدى aqshamnews.kz 24.kz-كە سىلتەمە جاساپ.
فرانسيادا اليمەنتتەن جالتارعان اتا-انالارعا 2 جىلعا دەيىن باس بوستاندىعىنان ايىرۋ جازاسى بار. سونىمەن قاتار، ولار 15 مىڭ ەۋرو كولەمىندە ايىپپۇل تولەيدى. زاڭعا سايكەس، اليمەنت تولەۋشى ادام تۇرعىلىقتى مەكەنجايى نەمەسە قارجىلىق جاعدايى وزگەرسە، دەر كەزىندە ءتيىستى ورگاندارعا حابارلاۋعا مىندەتتى. ۇمىتقان جاعدايدا 6 ايعا دەيىن تەمىر تورعا قامالىپ، 7،5 مىڭ ەۋرو ايىپپۇل تولەۋى ءتيىس. قازىردە فرانسيادا اليمەنتكە ارنالعان ءبىرىڭعاي پلاتفورما بار. سونىڭ كومەگىمەن ارنايى اگەنتتىك بەرەشەكتەردى جيناپ، اليمەنت الۋشىلارعا جولدايدى. ەگەر كىمدە-كىم تولەم جاساماعان بولسا، مەملەكەتتىك ورگان بىردەن شارا قابىلدايدى. دەسە دە، زاڭنىڭ قاتاڭ بولعانىنا قاراماستان، فرانسيادا اليمەنتتىڭ 30-40 پايىزى ۋاقىتىلى تولەنبەيدى.
بەلگيا
ال بەلگيادا جاۋاپسىز اتا-انالارعا جازا جەڭىل. تەك جۇرگىزۋشى كۋالىگىنەن ايىرىلۋمەن شەكتەلەدى. ءتىپتى، 50 دە 50 جۇيەسى ارقىلى اليمەنت تولەۋدەن تۇبەگەيلى قۇتىلۋعا دا بولادى. ول ءۇشىن بالا اپتا سايىن كەزەك-كەزەك اكەسىمەن دە، اناسىمەن دە بىردەي ۋاقىت وتكىزۋى قاجەت.
وڭتۇستىك كورەيا
ال وڭتۇستىك كورەيادا بالاسىنان بەزىپ، ءبىر جىل بويى اليمەنت تولەمەگەندەرگە 8 مىڭ دوللار ايىپپۇل سالىنادى. شەكارا اسۋىنا تىيىم سالىنىپ، ءبىر جىلعا دەيىن تۇرمەگە قامالادى. وڭتۇستىك كورەيانىڭ گەندەرلىك تەڭدىك جانە وتباسى مينيسترلىگى ءوز سايتىندا جىل سايىن اليمەنت تولەۋدەن جالتارىپ جۇرگەندەردىڭ جەكە مالىمەتىن جاريالاپ وتىرادى. اتا-انالار ءوز بالالارىنىڭ الدىنداعى قارىزىن وتەمەيىنشە، بۇل دەرەك وشىرىلمەيدى. تەك بورىشكەرلەر قايتىس بولعاندا نەمەسە قارىزىن وتەگەن جاعدايدا عانا جويىلادى. ويتكەنى، وڭتۇستىك كورەيادا جۇمىسباستى انالار كوپ. ساعاتتىڭ كوپتىگى مەن قاۋىرت جۇمىستان وتاناسى وتباسى جايىنا باس قاتىرمايدى. ءارى ءوزىن-وزى اسىراي الاتىنداي جالاقىسى دا ماردىمدى. بالا تۋۋ كورسەتكىشىنىڭ دە كەيىنگى جىلدارى كۇرت تومەندەپ كەتكەنى سودان.
تۇركيادا ەرلى-زايىپتىلار اجىراسسا، سوت كوپ جاعدايدا بالانى اكەسىمەن قالدىرادى. ويتكەنى، وتباسىن اسىراۋ مىندەتى اكەگە جۇكتەلەدى. تۇركيا ازاماتى بالاسىنىڭ بار قاجەتىن وتەۋگە مىندەتتەلەدى. بالاعا تولەيتىن اليمەنت مولشەرى – ايىنا 100 بەن 1000 دوللار ارالىعىندا. سونداي-اق، تەك بالاعا عانا ەمەس، اناعا دا اليمەنت تولەنەدى. ماسەلەن، اجىراسقان ەركەك ايەلى ەكىنشى رەت تۇرمىسقا شىققانشا اليمەنت تولەۋگە مىندەتتى. ال، تولەمەگەندەرى 3 جىلعا دەيىن باس بوستاندىعىنان ايىرىلادى. اباقتىدان مەرزىمىنەن بۇرىن بوساۋ ءۇشىن اليمەنتتى تولىق تولەۋى قاجەت. بار جاۋاپكەرشىلىك ءوز مويىنىندا بولعاندىقتان ەر ادامدار ءبىرىنشى وتباسىنىڭ، بالاسى مەن ايەلىنىڭ جاعدايىن جاساۋدى ويلايدى. سوندىقتان بولار، تۇركيادا اجىراسۋ از كەزدەسەدى.