الماتى جۇرتشىلىعى دجيۋ-دجيتسۋدان الەم چەمپيوناتىنىڭ جەڭىمپازدارى مەن جۇلدەگەرلەرىن الماتى حالىقارالىق اۋەجايىنان كۇتىپ الدى
كەلگەندەردىڭ اراسىندا قولا جۇلدەگەر رايىمبەك ەرجان، ەكى التىن مەدال يەگەرى نۇراي التىنبەك جانە قازىرگى بىرىنشىلىكتىڭ باس جۇلدىزى، ءتورت دۇركىن الەم چەمپيونى جىبەك قۇلىمبەتوۆا بار. اۋەجايعا جينالعان قالا تۇرعىندارى سپورتشىلاردى ادەتتەگىدەي قازاقى داستۇرمەن شاشۋ شاشىپ، سالتاناتتى تۇردە قارسى الدى. ولاردىڭ اراسىندا جەرگىلىكتى سپورت باسقارماسىنىڭ وكىلدەرى مەن «جانۇيا» بالالار ءۇيىنىڭ تاربيەلەنۋشىلەرى جانە جۇلدەگەرلەردىڭ تۋىستارى دا بار.
– الەم چەمپيونى اتانىپ جاتقان قىزدار مەن جىگىتتەر ءبىزدىڭ مەكتەپتىڭ وقۋشىلارى. 2021 جىلدىڭ قىركۇيەك ايىنان باستاپ مەكتەبىمىزدە دجيۋ-دجيتسۋدان ارنايى بولىمشە اشىلعان. قازىرگى ۋاقىتتا 4 بىردەي جاتتىقتىرۋشى بالالارمەن جۇمىس ىستەيدى. بۇل ۋاقىتقا دەيىن ولار دجيۋ-دجيتسۋ فەدەراسياسىندا جاتتىعىپ كەلگەن ەدى. بۇگىنگى كۇنى جاستاردىڭ باسىم كوپشىلىگى سپورتقا قىزىعىپ، جۇلدەلى ورىنداردان كورىنۋدە. قازاق ەلىنىڭ كوك تۋىن كوكتە جەلبىرەتىپ جۇرگەن ءور ۇلاندارىمىزدىڭ سانى كوبەيە بەرسىن، – دەيدى №4 مامانداندىرىلعان بالالار مەن جاسوسپىرىمدەر سپورت مەكتەبىنىڭ ديرەكتورى نۇربولات ىسقاقوۆ.
سپورتشىلاردىڭ اراسىنداعى 14 جاستاعى جىبەك قۇلىمبەتوۆا نە-ۆازا تۋرنيرىندە بىرىككەن اراب امىرلىگى مەن تايلاند جانە رەسەي سپورتشىلارىنان باسىم ءتۇسىپ، ءۇش دۇركىن الەم چەمپيونى اتانعان بولاتىن. كەيىن جاسىل بەلبەۋ يەگەرلەرى اراسىندا «Abu Dhabi World Jiu-Jitsu Championchip» سايىسىندا دا ب ا ق سىناپ، الەم چەمپيوناتىن 4-مارتە ۇتتى.
«قارسىلاستارىمنىڭ بارلىعى وسال بولمادى. ءبىراق مەن ولاردى جەڭىپ شىعۋعا بارىمدى سالدىم. وسى جەتىستىككە جەتۋ ءۇشىن ۇزاق ۋاقىت ەڭبەكتەندىم. ەندىگى جوسپارىم – الداعى جارىستارعا مىقتى دايىندالىپ، تاعى دا الەم چەمپيونى اتانۋ. بۇدان دا بيىك بەلەستەرگە جەتىپ، ەلىمىزدىڭ اتىن الەمگە تانىتۋ»، – دەيدى جىبەك قۇلىمبەتوۆا.
سپورتشىلاردىڭ اراسىندا الەم چەمپيوناتىنا العاش رەت قاتىسىپ جاتقاندار دا بار. ولاردىڭ ءبىرى 14 جاستاعى سپورتشى نۇراي التىنبەك دجيۋ-دجيتسۋمەن 9 اي اينالىسقان. از ۋاقىتتىڭ ىشىندە جاقسى ناتيجەگە قول جەتكىزىپ، الەم چەمپيوناتىنىڭ ەكى التىنىن ەنشىلەگەن. جالپى الەم چەمپيوناتىنىڭ نە-ۆازا 1-تۋرنيرىندە دجيۋ-دجيتسۋدان قازاقستان قۇراماسى 56 مەدال جەڭىپ الىپ، جالپىكوماندالىق ەسەپتە ۇزدىك ۇشتىككە ەندى، ونىڭ 11ء-ى الەم چەميونى اتاندى. ال ەكىنشى «Abu Dhabi World Jiu-Jitsu Championchip» سايىسى ءالى جالعاسىن تابۋدا.
ەكىنشى الەم چەمپيوناتى وتە تارتىستى ءوتتى، سەبەبى قارسىلاستار مىقتى بولدى. الايدا، جىبەك ءوزىنىڭ ايلاسىن اسىرىپ، ۇپاي سانىمەن ۇتىپ كەتتى. بۇگىنگى كۇنى بىزدەر «باقىتتى بولاشاق» قايىرىمدىلىق قورىمەن بىرلەسە وتىرىپ، «جانۇيا» بالالار ءۇيىنىڭ 20 تاربيەلەنۋشىسىن تەگىن جاتتىقتىرىپ كەلەمىز. الداعى ۋاقىتتا دا جەتكىنشەكتەردەن ۇلكەن ءۇمىت كۇتەمىز، – دەيدى «Sagadat batyr – QTT» كلۋبىنىڭ باس باپكەرى نۇرسۇلتان ورىنباساروۆ.
