بارىس جىلىنداعى سوڭعى دۇبىرلەردىڭ ءبىرى سانالاتىن شاحماتتىڭ راپيد جانە بليستەن وتەتىن الەم چەمپيوناتىنىڭ الماتىدا الاۋى جاعىلاتىن كۇنگە دە از قالدى. دۇنيەجۇزىنىڭ تاڭداۋلى شاحمات شەبەرلەرى توقايلاساتىن الەمدىك الاماندا، ءسوز جوق، ءبىزدىڭ ەلدىڭ جانكۇيەرلەرى قىزدار كومانداسىنان ۇلكەن ءۇمىت كۇتەدى. راس، بايگە باستالماي تۇرىپ ءتۇرلى بولجام، بايلام ايتىپ، پىكىر ءبىلدىرۋ - اركىمنىڭ ءوز ەركى. ءبىز قىزداردان ءۇمىت كۇتەمىز دەگەندە، ەرلەر كومانداسىنداعى شاحماتشىلارىمىزدىڭ شەبەرلىگىنە ءشۇبا كەلتىرگەندىكتەن ەمەس، ەلۋ جىلدان اسا ۋاقىتتان بەرى قازاق جەرىندە شاحمات قىزدار اراسىندا قارقىندى دامىپ، ۇزدىك ناتيجە دە كورىنىپ كەلەدى. وسىعان قاراپ تا سالىستىرىپ، ەرلەردىڭ جەتىستىگىنەن گورى قىزدارىمىزدىڭ شاحمات دوداسىنان العان ولجاسى وراسان ەكەنىن باعامدايمىز.
قازاقستان شاحمات فەدەراسياسى مەن باپكەرلەر الماتىدا وتەتىن الەم چەمپيوناتىنا ەلىمىزدىڭ ۇزدىك شاحمات شەبەرلەرىنەن سىرت، ياعني ءبىرىنشى ءنومىرلى سپورتشىلارىمىزبەن بىرگە تاجىريبەسىن شىڭداۋ ءۇشىن جاس وسكىندەردى دە دوداعا قوسىپ كورۋدى ءجون ساناپ وتىر.
"تويدىڭ بولعانىنان بولادىسى قىزىق" دەيدى قازاق. مىنە، الماتىدا شاحماتتىڭ راپيد جانە بليستەن الەم چەمپيوناتى دا جالاۋىن جەلبىرەتتى. بۇل عالامدىق دودا قازاقستان شاحماتىنىڭ الار اسۋى، جاڭا ءبىر بەلەسى بولماق. ەلىمىزدىڭ ەرلەر قۇراماسىندا بۋىن الماسۋ پروسەسى جۇرگەنى بەلگىلى، جاڭارتۋلار بولدى. سوندىقتان دا قۇراما قاتارىنا قوسىلعان جاس جىگىتتەر ءۇشىن الماتىداعى الەم چەمپيوناتى تاجىريبە جيناپ، شىڭدالۋ مەكتەبى سانالاتىنى ءسوزسىز. ال قىزدارىمىزدان، ونىڭ ىشىندە الەمدىك دەڭگەيدە جارقىراپ كورىنىپ جۇرگەن كوشباسشى ارۋلاردان، ۇلكەن ءۇمىت، جەڭىس كۇتەتىنىمىز انىق. مەدال الاتىن ساڭلاقتاردىڭ اراسىندا ءبىزدىڭ دە شاحماتشى قىزدارىمىز بار دەپ نىق سەنىممەن ايتۋعا بولادى.
ولاي دەيتىنىمىز، الەمدىك دەڭگەيدەگى ۇزدىكتەر ساناتىنا قوسىلاتىن ءبىر ەمەس، ءۇش بىردەي شاحماتشى قىزىمىز بار. جانسايا ابدىمالىك، دينارا ءسادۋاقاسوۆا، ءبيبىسارا اساۋبايەۆا "كلاسسيكادان" دا جوعارى ناتيجە كورسەتىپ، وزگە فورماتتاعى ويىنداردا دا وزدەرىنىڭ الەۋەتى جوعارى، تەگەۋرىنى مىقتى ەكەنىن دالەلدەپ كەلەدى. الەمدىك رەيتينگتە تۇرعان تاڭداۋلى شاحماتشىلاردىڭ اراسىنان ويىپ ورىن الاتىن ءۇش قىزىمىزدىڭ داڭقى ەلىمىزگە عانا ەمەس، عالامعا جايىلعان دەسەك، ارتىق بولمايدى. بۇعان دەيىنگى الەم چەمپيوناتتارىندا ءوز جەڭىسىمەن بەدەلىن ارتتىرىپ، قۇرمەتكە بولەنىپ جۇرگەن ارۋلارىمىزدى مەملەكەتىمىز دە، قازاقستان شاحمات فەدەراسياسى دا قولداپ قۋاتتاپ، ۇلكەن دەمەۋ جاساپ كەلەدى. جانكۇيەرلەردىڭ دە ۇزدىكتەرگە دەگەن قۇرمەتى، قولداۋى ەرەكشە قاشاندا. قازاقستان شاحماتىنىڭ "التىن ۇشتىگى" سانالاتىن ارۋلارىمىز وتاندىق شاحماتتىڭ دامۋىنا دا وراسان ۇلەس قوسىپ ءجۇر. قازاق قىزدارىنىڭ شاحمات دوداسىنداعى جەتىستىگى جاس بۋىننىڭ وسى سپورت تۇرىنە دەگەن قىزى، ۋشىلىعىن دا وياتۋى زاڭدىلىق.
حالىقارالىق شاحمات فەدەراسياسىنىڭ (فيدە) 2022 جىلدىڭ 1 جەلتوقسانىندا جاڭارتقان رەيتينگىندە حالىقارالىق دارەجەدەگى گروسسمەيستەر جانسايا ابدىمالىك كلاسيكالىق شاحمات پەن راپيدتەن 14-ساتىعا ورنىقتى، ال بليستە 11-ورىندا. جانسايا 2017 جىلى 20 جاسقا دەيىنگى جاستار اراسىنداعى الەم چەمپيوناتىندا التىننان القا تاعىندى. بىلتىر فيدە وتكىزگەن عالامدىق گران-پري تۋرنيرىندە بارلىق قارسىلاستارىن شاڭ قاپتىرىپ، چەمپيون اتاندى. جانسايانىڭ قورجىنىندا تاعى ءبىر قوماقتى تابىس بار، ول – گەرمانيادا ايەلدەر بۋندەسليگاسىنا قاتىسىپ، OSG Baden-Baden كومانداسىنىڭ ساپىندا جەڭىسكە جەتتى.
ءبيبىسارا اساۋبايەۆا الەمدىك رەيتينگتە "كلاسسيكا" بويىنشا 31-ورىنعا تۇراقتادى. راپيدتە 22ء-شى ساتىدا، بليستە 14-ورىن بۇيىرىپ تۇر. الەمدىك شاحمات جۇلدىزىنا اينالادى دەپ ءۇمىت ارتاتىن جاستىڭ ءبىرى - ءبىزدىڭ ءبيبىسارا قىزىمىز. ويتكەنى اساۋبايەۆا 20 جاسقا دەيىنگىلەر اراسىندا وتكەن الەم چەمپيوناتىندا التىن الدى، كلاسسيكادا كۇمىس مەدالعا يە بولدى. جانە ەڭ باستى جەڭىسى - بىلتىر پولشا ەلىندە وتكەن بليس تۇرىنەن ەرەسەكتەر اراسىنداعى الەم چەمپيوناتىنداعى سەنساسيالىق تابىسى. راپيدتەن الەم چەمپيوناتىنداعى كۇمىس مەدالى تاعى بار. بىلتىرعى الەم بىرىنشىلىگىندە بليستەن ەڭ جاس الەم چەمپيونى اتانعان ءبيبىسارا سول بيىگىنەن تومەندەمەي، تاريحي جەڭىسىن قايتالايدى دەپ سەنەمىز. راپيدتەن ازيا قۇرلىعىنىڭ چەمپيوناتىندا دا چەمپيون اتاندى، بالالار اراسىندا وتكەن حالىقارالىق تۋرنيرلەردە دە وراسان جەتىستىكتەرگە جەتتى.
قىزدار اراسىندا حالىقارالىق دارەجەدەگى گروسسمەيستەر دينارا ءسادۋاقاسوۆا دا فيدە رەيتينگدە ۇزدىك 100 شاحماتشىنىڭ ىشىندە 32-ورىندا تۇر. راپيدتەن 16-ساتىدا، بليستەن 15-ورىن بۇيىرىپ تۇر ديناراعا. دينارانىڭ دا ەنشىسىندە 20 جاسقا دەيىنگىلەر اراسىندا وتكەن الەم چەمپيونى دەگەن اتاعى بار. 2016 جىلى جاستار اراسىنداعى الەم چەمپيوناتىندا ۇزدىك شىقتى. 2019 جىلى ازيا چەمپيوناتىندا دا توپ جاردى. بىلتىر كلۋبتار اراسىندا وتكەن ەۋروپا چەمپيوناتىندا رەسەيدىڭ South Ural كومانداسىنىڭ ساپىندا قاتىسىپ جەڭىمپاز اتاندى. كلۋبتار اراسىندا وتكەن ەۋروپا چەمپيوناتىندا كوشباسشى دينارا ءبىرىنشى تاقتادا ويناپ، كوماندالاستارىن العا جەتەلەپ وتىردى.
شاحمات جانكۇيەرلەرى عانا ەمەس، كۇللى قازاقستاندىقتاردىڭ قىزدار قۇراماسىنان ۇلكەن ءۇمىت كۇتۋى وسىنداي ساڭلاقتارىمىزدىڭ جەتىستىگىنە بايلانىستى. جانە قىزدار اراسىندا قازاق شاحماتىنىڭ التىن بۋىنى ءوسىپ كەلە جاتىر دەپ اۋىز تولتىرىپ ايتۋعا بولادى. 17 جاسقا ەندى شىققان مەرۋەرت قاماليدەنوۆا ەرەسەكتەر اراسىندا بىلتىر دا، بيىل دا قازاقستان چەمپيوناتىندا جەڭىسكە جەتىپ، ەكى دۇركىن قازاقستان چەمپيونى اتاندى. مەرۋەرت 14 جاسقا دەيىنگى جاسوسپىرىمدەر اراسىندا 2019 جىلى الەم چەمپيونى اتاعىمەن شەكتەلگەن جوق، وسى جىلى ازيا بىرىنشىلىگىندە دە وق بويى وزىق شىقتى. بيىل 20 جاسقا دەيىنگى جاستار اراسىندا وتكەن الەم چەمپيناتىنان كۇمىس مەدالمەن ورالدى. حالىقارالىق شاحمات فەدەراسياسىنىڭ جاسوسپىرىمدەر اراسىنداعى رەيتينگىندە ۇزدىك وندىققا دا كىرگەن بولاتىن. 20 جاسقا دەيىنگى جاستار اراسىنداعى الەم چەمپيوناتىنىڭ كۇمىس جۇلدەگەر دەگەن اتاعى بار اسەل سەرىكبايدىڭ دا جىل ساناپ قارقىنعا قارقىن قوسىپ كەلە جاتقانىن بايقايمىز. بىلتىر راپيدتەن ايەدەر اراسىنداعى الەم چەمپيوناتىن بەسىنشى ورىنمەن اياقتاعان اسەل ءبىر جىلدان كەيىن كۇمىس مەدال الدى. بليستەن 18 جاسقا دەيىنگى جاستار اراسىندا الەم چەمپيونى اتانعان نازەركە نۇرعالي 14 جاسىندا الەم بىرىنشىلىگىنىڭ التىنىن العان زارينا نۇرعالييەۆاعا دا جارقىراپ كورىنەتىن ءسات تۋىپ وتىر. كسەنيا بالابايەۆا، الۋا نۇرمانوۆا، ليا قۇرمانعالييەۆالاردان قازاق ەلى زور ناتيجە كۇتەدى.
الدا ءبىر اپتا بويى الماتىداعى الەمدىك تارتىس تۇر. "كلاسسيكادان" الەمنىڭ ەكس-چەمپيونى تان چجۋن، الەكساندرا كوستەنيۋك، انتوانەتا ستەفانوۆا، اننا ۋشەنينا سىندى ۇزدىكتەردىڭ تەگەۋرىنىن تويتارۋ قىزدارىمىزعا ۇلكەن سالماق ارتپاق. الاتاۋ بوكتەرىندە وتەتىن الەمدىك دودادا فيدە رەيتينگىنىڭ كوشىن باستاۋشى الەكساندر گورياچكين، حامپي كونەر، كاتەرينا لاگنو، نانا دزاگنيدزە، حاريكا دورناۆاللي سەكىلدى ۇزدىكتەر دە ونەر كورسەتەدى.
قازاق شاحماتشىلارىنا تولايىم تابىس تىلەيمىز. ال قالا تۇرعىندارى مەن تۋريستەردى بەكزادا ونەر سانالاتىن شاحماتتىڭ الەم چەمپيوناتىن تاماشالاپ، جەرلەستەرىمىزگە جانكۇيەر بولۋعا شاقىرامىز.