تاشكەنتتە 1 مامىر الاۋى تۇتاناتىن بوكستان الەم بىرىنشىلىگىندە ەل نامىسىن قورعايتىن بوكسشىلاردىڭ ءتىزىمى جاريالاندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ق ر مادەنيەت جانە سپورت مينيسترلىگى سپورتتى دامىتۋ ديرەكسياسىنىڭ باسپا ءسوز قىزمەتىنەن ءمالىم ەتكەندەي، ءقازىر ۇلتتىق قۇراما بوكسشىلارى شىمكەنت قالاسىنداعى «الما-تاۋ» بازاسىندا سوڭعى وقۋ-جاتتىعۋ جيىنىن وتكىزىپ جاتىر.
ۇلتتىق قۇرامانىڭ باس باپكەرى مىرزاعالي ايتجانوۆ الەم چەمپيوناتىندا تومەندەگى بوكسشىلاردان ءۇمىت كۇتىپ وتىر.
ولار:
48 كەلى - سانجار تاشكەنباي
51 كەلى - ساكەن بيبوسىنوۆ
54 كەلى - ماحمۇد سابىرحان
57 كەلى - سەرىك تەمىرجانوۆ
60 كەلى - تالعات سىرىمبەتوۆ
63،5 كەلى - ءساناتالى تولتايەۆ
67 كەلى - دۋلات بەكباۋوۆ
71 كەلى - اسلانبەك شىمبەرگەنوۆ
75 كەلى - نۇرقانات رايىس
80 كەلى - نۇربەك ورالباي
86 كەلى - ساعىندىق توعامباي
92 كەلى - ايبەك ورالباي
+ 92 كەلى - قامشىبەك قونقابايەۆ
«الەم چەمپيوناتىنا باراتىن ۇمىتكەرلەردى ءبىز ۇزاق ۋاقىت ءارى تياناقتى ىرىكتەدىك. جىل باسىنان بىرنەشە وقۋ-جاتتىعۋ جيىنىن وتكىزدىك، جىگىتتەردى ءتۇرلى جارىستارعا اپاردىق. ءار بوكسشىعا قاتىستى ساراپتاما جاسادىق. سسوندىقتان ءارقايسىسىنىڭ شاماسىن بىلەمىز. الەم چەمپيوناتىنا ءبىرىنشى رەت قاتىساتىن 3 بىلعارى قولعاپ شەبەرىمىز بار. ولار جاس بولسا دا، تاجىريبەسى تولىسقان، بوكس الەمىندە الار ورنى بار. حالىقارالىق ارەنادا نامىستى قولدان بەرمەيدى دەگەن سەنىمدەمىن»، - دەدى مىرزاعالي ايتجانوۆ.
«باپكەرلىك قۇرام بوكسشىلاردى الەم چەمپيوناتىنا جاقسىلاپ دايىنداپ اپارا جاتىر. دۇرىس تاڭداۋ جاسادى دەپ ويلايمىن. ءوز كەزەگىندە ق ر مادەنيەت جانە سپورت مينيسترلىگى، كەڭەس راقىشيەۆ باسقاراتىن قازاقستان بوكس فەدەراسياسى تاراپىنان بارلىق جاعداي جاسالدى. بوكسشىلار مەن باپكەرلەر ولاردىڭ ونەرىن بۇكىل قازاقستان تاماشالايتىنىن بىلەدى. سوندىقتان جاۋاپكەرشىلىكتى تۇسىنەدى. قۇرامامىزعا ساتتىلىك تىلەيمىز»، - دەپ اتاپ ءوتتى قازاقستان بوكس فەدەراسياسىنىڭ اتقارۋشى ديرەكتورى ماراتبەك مىقتىبەكوۆ.
ەستەرىڭىزگە سالا كەتسەك، بەلگرادتا وتكەن سوڭعى الەم چەمپيوناتىندا قازاقستان قۇراماسى 5 مەدال (2 التىن، 2 كۇمىس، 1 قولا) يەلەنگەن بولاتىن. سەربيا استاناسىنداعى جاھان بىرىنشىلىگىنىڭ 3 بىردەي ءفيناليسى (الەم چەمپيونى ساكەن بيبوسىنوۆ، كۇمىس جۇلدەگەرلەر – ماحمۇد سابىرحان مەن سەرىك تەميرجانوۆ) تاشكەنت شارشى الاڭىندا ونەر كورسەتەدى.
«تاشكەنتتەگى الەم چەمپيوناتىنا تياناقتى دايىندالۋعا مۇمكىندىك بولعانى ءۇشىن العىس ايتامىن. ءبىر جۇدىرىق بولىپ جۇمىلىپ جۇمىس ىستەسەك، الىنبايتىن قامال جوق. قۇراماداعى جىگىتتەر ءبىر-بىرىن ءارقاشان قولداپ جۇرەدى. ال مەن الەم چەمپيونى دەگەن اتاعىمدى قورعاپ قالۋعا بارىمدى سالامىن. ماقساتىم – ەكى دۇركىن الەم چەمپيونى اتانۋ»، - دەدى ساكەن بيبوسىنوۆ.
الەم چەمپيوناتىنىڭ باستالۋىنا تۋرا ءبىر اپتا قالدى. جارىس 1-14 مامىر ارالىعىندا وتەدى.
ۇيىمداتىرۋشىلار بىرىنشىلىككە 104 ەلدەن 600-دەن اسا بىلعارى قولعاپ شەبەرى قاتىسادى دەپ وتىر. جەڭىمپازدار مەن جۇلدەگەرلەر 13 سالماق دارەجەسى بويىنشا انىقتالادى.
حالىقارالىق بوكس قاۋىمداستىعى (IBA) التىن مەدال يەگەرىنە 200 مىڭ اقش دوللارىن، ەكىنشى ورىن العان بوكسشىعا 100 مىڭ جانە ەكى قولا جۇلدەگەردىڭ ءارقايسىسىنا 50 مىڭ اقش دوللارىنان بەرەدى. چەمپيوناتتىڭ جالپى جۇلدە قورى 5،2 ملن اقش دوللارىن قۇرايدى.
بوكسشىلار دوداسىنىڭ تىكەلەي ترانسلياسيالارى «Qazaqstan» جانە «Qazsport» تەلەارنالارىنىڭ ەفيرىنەن كورسەتىلەدى.