استاناداعى ق ر پرەزيدەنتىنىڭ ورتالىعىندا «Astana Eurasian Book Fair-2025» VIII حالىقارالىق كىتاپ كورمە-جارمەڭكەسى ءوتىپ جاتىر.
كىتاپ كورمە-جارمەڭكەسىنىڭ ۇيىمداستىرۋشىسى – «فوليانت» باسپاسى»، دەپ حابارلايدى aqshamnews.kz.
كورمەگە قازاقستان، رەسەي، تۇركيا، يسپانيا، يران، وزبەكستان، پورتۋگاليا جانە جۇڭگو ەلدەرىنەن 70-كە جۋىق باسپا، كىتاپ ساتۋ، تانىمدىق-عىلىمي ءبىلىم بەرۋ جانە پوليگرافيالىق كومپانيا قاتىسۋدا.
كورمەنىڭ باستى ماقساتى – كىتاپ وقۋدى ناسيحاتتاۋ، وقۋ مادەنيەتىن قالىپتاستىرۋ، كىتاپ نارىعىنداعى جاڭا ونىمدەردى كوپشىلىككە تانىستىرۋ، باسپا ىسىندەگى زاماناۋي تەحنولوگيالاردى كورسەتۋ جانە حالىقارالىق ارىپتەستىكتى دامىتۋ.
كورمەگە قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين كەلىپ، مەملەكەت باسشىسى قاسىم-جومارت توقايەۆتىڭ اتىراۋ قالاسىندا وتكەن ۇلتتىق قۇرىلتايدا قۇرىلتاي مۇشەلەرىنىڭ ۇلتتىق كىتاپ كۇنىن بەلگىلەۋ تۋرالى باستاما كوتەرگەنىن اتاپ ءوتتى.
پرەزيدەنتتىڭ بۇل باستاماسى قولداۋعا يە بولىپ، بيىل «ۇلتتىق كىتاپ كۇنىن» العاش رەت اتاپ وتۋدەمىز. قازىرگى قوعامنىڭ نەگىزى ءۇش تىرەگى – عىلىم، مادەنيەت جانە ءبىلىم. وسىنىڭ اياسىندا حالىق اراسىندا جالپىۇلتتىق ساۋالناما جۇرگىزەمىز دەپ شەشتىك. ساۋالناما ناتيجەسىنە سايكەس، تاڭداۋلى 100 كىتاپتىڭ ءتىزىمىن جاساقتايمىز. ونىڭ ماقساتى – ازاماتتاردى اۆتورلاردى، تۋىندىلاردى تالقىلاۋعا شاقىرۋ. ساۋالناما eFov Mobile پورتالى ارقىلى جۇرگىزىلەدى. كەز كەلگەن ەلىمىزدىڭ ازاماتى پورتالعا تىركەلىپ، ءوزىنىڭ 10 سۇيىكتى تاڭداۋلى كىتابىن ۇسىنا الادى. كىتاپتاردىڭ جانرى ءارتۇرلى بولۋى مۇمكىن. وسىلايشا، زەرتتەۋ جۇرگىزە وتىرىپ، ەڭ ۇزدىك 100 كىتاپتى جاساقتايمىز. ساۋالناما ءۇش اي بويى جۇرگىزىلەدى. ناتيجەسى تامىز ايىندا اباي كۇنى قارساڭىندا بەلگىلى بولادى، – دەدى ول.
ءىس-شارا اياسىندا بالالارعا، جاسوسپىرىمدەرگە جانە ەرەسەكتەرگە ارنالعان جاڭا كىتاپتاردىڭ تۇساۋكەسەر راسىمدەرى، بەلگىلى جازۋشىلارمەن جانە اقىندارمەن كەزدەسۋلەر مەن اۆتوگراف-سەسسيالار، باسپا سالاسىنىڭ ماماندارىنا ارنالعان كاسىبي پىكىرتالاستار مەن كەزدەسۋلەر، سونداي-اق بالالارعا ارنالعان كىتاپ وقۋ سەسسيالارى، شەبەرلىك ساباقتارى مەن شىعارماشىلىق كەزدەسۋلەر ۇيىمداستىرىلعان. سونىمەن قاتار قاتىسۋشىلار ءۇشىن قۇندى سىيلىقتار ويناتىلادى.
كورمەنىڭ ءداستۇرلى بولىگى بولىپ سانالاتىن «جىلدىڭ ۇزدىك كىتابى» بايقاۋى مىنا نوميناسيالار بويىنشا ۇيىمداستىرىلدى: «جىل كىتابى»، «ۇزدىك دەبيۋت»، «ۇزدىك كوركەم ادەبيەت تۋىندىسى»، «نون-فيكشن جانرىنداعى ۇزدىك كىتاپ» جانە «تۇركسوي-دىڭ گران-پريى».
ايتا كەتەيىك، كىتاپ كورمەسى 23-27 ءساۋىر كۇندەرى ارالىعىندا جالعاسادى.