بۇل كوكونىستەردىڭ جالپى ءوندىرىسىن 2 ەسەگە ارتتىرۋعا مۇمكىندىك بەرەدى.
الماتى وبلىسىندا اۋىل شارۋاشىلىعى جاعدايىن تالداۋ جىلىجاي بيزنەسىن دامىتۋدىڭ تيىمدىلىگىن كورسەتتى. 2026 جىلعا دەيىن 45 گەكتار جەرگە 10 ءىرى جىلىجاي شارۋاشىلىعىن ىسكە قوسۋ جوسپارلانۋدا، ولاردىڭ جالپى وندىرىستىك قۋاتى 25 مىڭ توننانى قۇرايدى، دەپ حابارلادى Almaty-akshamy.kz.
«بۇل كوكونىستەردىڭ جالپى ءوندىرىسىن 2 ەسەگە ارتتىرۋعا، 500-دەن استام جۇمىس ورنىن قۇرۋعا، كوكونىستەردى جىل بويى وندىرىسىنە كوشۋدى قامتاماسىز ەتۋگە مۇمكىندىك بەرەدى. بۇل تۋرالى بۇگىن الماتى وبلىسىنىڭ اكىمى قانات بوزىمبايەۆ تالدىقورعاندا وتكەن بريفينگ بارىسىندا ايتتى، - دەلىنگەن الماتى وبلىسى اكىمىنىڭ باسپا ءسوز قىزمەتىنىڭ حابارلاماسىندا.
مامانداردىڭ ايتۋىنشا، اۋىل شارۋاشىلىعىندا جالپى ءونىم ءوندىرىسىنىڭ كولەمى بويىنشا الماتى وبلىسى كوش باستاپ، ءبىرىنشى ورىندا تۇر نەمەسە جالپى رەسپۋبليكالىق دەڭگەيىندە 14% قۇراپ وتىر.
وبلىس اكىمى وڭىردەگى اگرارلىق سالانى تالداۋ مۇندا جىلىجاي بيزنەسىن دامىتۋدىڭ تيىمدىلىگىن كورسەتكەنىن اتاپ ءوتتى. جىلىجايلارداعى ونىمدىلىك كوكونىستەردى اشىق جەردە وسىرۋمەن سالىستىرعاندا 7 ەسە جوعارى، سونىمەن قاتار ماۋسىم ارالىعىندا حالىقتى كوكونىسپەن قامتاماسىز ەتۋگە مۇمكىندىك بەرەدى جانە باعانىڭ تۇراقتانۋىنا اسەر ەتەدى. بۇگىنگى كۇنى وبلىستا 105،5 گا جەردە 102 جىلىجاي بار، ولاردا 36 مىڭ توننا ەرتە پىسەتىن كوكونىستەر وسىرىلەدى.
«2026 جىلعا دەيىن 45 گەكتار جەرگە 10 ءىرى جىلىجاي شارۋاشىلىعىن ىسكە قوسۋ جوسپارلانۋدا، ولاردىڭ جالپى وندىرىستىك قۋاتى 25 مىڭ توننانى قۇرايدى. بۇل كوكونىستەردىڭ جالپى ءوندىرىسىن 2 ەسەگە ارتتىرۋعا، 500-دەن استام جۇمىس ورنىن قۇرۋعا، كوكونىستەردى جىل بويى وندىرۋگە كوشۋدى قامتاماسىز ەتۋگە مۇمكىندىك بەرەدى. بۇل ءۇشىن جەڭىلدىكپەن كرەديت بەرۋ، گازدىڭ قۇنىن 50%-ىنا دەيىن سۋبسيديالاۋ، كوتەرمە-تاراتۋ ورتالىقتارىن تارتۋ جانە كوكونىستەرگە ارنالعان فورۆاردتىق ساتىپ الۋدى كەڭەيتۋ شارالارى قابىلداناتىن بولادى»، - دەدى قانات بوزىمبايەۆ.
سپيكەردىڭ سوزىنە سۇيەنسەك، وبلىستاعى تاعى ءبىر باسىمدىق قۇس ەتىن وندىرۋگە بەرىلەدى، ول رەسپۋبليكا نارىعى كولەمىنىڭ 32%-ىن، ياعني 108،3 مىڭ توننانى قۇراپ وتىر. ءقازىر قۇس ەتى بويىنشا وبلىس جانە الماتى قالاسى تۇرعىندارىنىڭ قاجەتتىلىكتەرى تولىعىمەن جابىلادى. يمپورتتى تولىق الماستىرۋ ءۇشىن ءونىم شىعارۋدى 2 ەسەگە ارتتىرۋ مىندەتى قويىلىپ وتىر.