رەسپۋبليكا بويىنشا جەل كۇشەيەدى.
«قازگيدرومەت» ماماندارى كوكتەمنىڭ سوڭعى كۇنى مەن جازدىڭ العاشقى كۇندەرى اۋا رايى قانداي بولاتىنىن بولجادى، دەپ حابارلايدى Almaty-akshamy.kz.
مامىر ايىنىڭ سوڭعى كۇنى قازاقستان اۋماعىنىڭ باسىم بولىگى ءسىبىردىڭ ۇستىندەگى سيكلون جىراسىنىڭ ىقپالىندا بولادى. نايزاعاي ويناپ، وڭتۇستىك-شىعىستا قاتتى جاڭبىر، بۇرشاق جاۋىپ، داۋىل تۇرادى دەپ كۇتىلەدى.
«رەسپۋبليكا بويىنشا جەل كۇشەيەدى. الايدا 1 ماۋسىم كۇنى باتىس قازاقستانعا سولتۇستىك انتيسيكلون اسەر ەتە باستايدى، ول رەسپۋبليكا اۋماعى ارقىلى شىعىس باعىتقا اۋىسا وتىرىپ، جاۋىن-شاشىننىڭ بىرتىندەپ توقتاۋىنا جانە تەمپەراتۋرانىڭ تومەندەۋىنە الىپ كەلەدى. 1-2 ماۋسىمىندا ەلىمىزدىڭ باتىسىندا، سولتۇستىك-باتىسىندا، سولتۇستىگىندە، ورتالىعىندا تۇنگى جانە تاڭەرتەڭگى ساعاتتاردا توپىراق بەتىندە 2 گرادۋسقا دەيىن ۇسىك جۇرەدى دەپ بولجانۋدا»، - دەلىنگەن «قازگيدرومەت» حابارلاماسىندا.