الداعى جىلى ارناۋلى الەۋمەتتىك قىزمەت كورسەتەتىن مەملەكەتتىك ۇيىمداردىڭ ءبىرىنشى باسشىلارىن روتاسيالاۋ باستالادى

2025 جىلعى 1 قاڭتاردان باستاپ ارناۋلى الەۋمەتتىك قىزمەتتەر كورسەتەتىن مەملەكەتتىك ۇيىمداردىڭ ءبىرىنشى باسشىلارىن روتاسيالاۋ جۇرگىزىلەتىن بولادى.

روتاسيا ءبىر ەلدى مەكەن شەگىندە ەكى جانە ودان دا كوپ ۇيىم بولعان جاعدايدا جۇزەگە اسىرىلادى، دەپ حابارلايدى aqshamnews.kz.

ءااق ۇسىناتىن مەملەكەتتىك ۇيىمداردىڭ ءبىرىنشى باسشىلارىن روتاسيالاۋدىڭ ماقساتى – ولاردىڭ كاسىبي الەۋەتىن نەعۇرلىم ءتيىمدى پايدالانۋدى قامتاماسىز ەتۋ.

قايتا ۇيىمداستىرۋعا (بىرىگۋگە، بولۋگە، شىعارۋعا، قايتا قۇرۋعا)، ۇيىمنىڭ اتاۋىن وزگەرتۋگە، سونداي-اق جۇمىستان بوساتۋ جانە سول ۇيىمعا باسشى لاۋازىمىنا ورالۋ كەزەڭىنە قاراماستان، ارناۋلى الەۋمەتتىك قىزمەتتەر كورسەتۋ ورتالىقتارىن 5 جىلدان استام باسقارىپ كەلە جاتقان ۇيىمداردىڭ باسشىلارى ءۇشىن روتاسيا مىندەتتى بولادى.

ۇيىمداردىڭ باسشىلارى اراسىندا روتاسيا جۇرگىزۋ تۋرالى جانە بەلگىلى ءبىر نەگىزدەر بويىنشا باس تارتۋ تۋرالى شەشىمدى حالىقتى الەۋمەتتىك قورعاۋ جانە جۇمىسپەن قامتۋ ماسەلەلەرى جونىندەگى جەرگىلىكتى اتقارۋشى ورگاننىڭ، ءااق كورسەتۋ ورتالىقتارىنىڭ، الەۋمەتتىك قورعاۋ سالاسىنداعى قوعامدىق بىرلەستىكتەردىڭ، وبلىستار، رەسپۋبليكالىق ماڭىزى بار قالالار، استانا، اۋداندار، وبلىستىق ماڭىزى بار قالالار اكىمدىكتەرىنىڭ قوعامدىق كەڭەسىنىڭ وكىلدەرىنەن تۇراتىن كوميسسيا قابىلدايدى.

ۇيىم باسشىلارى اراسىندا روتاسيا جۇرگىزۋدەن باس تارتۋ ءۇشىن: مۇگەدەكتىگى بار بالالارىنىڭ، اسىراۋىنداعى قارت اتا-انالارىنىڭ؛ ولارمەن تۇراقتى تۇراتىن ءبىرىنشى نەمەسە ەكىنشى توپتاعى مۇگەدەكتىگى بار وتباسى مۇشەلەرىنىڭ بولۋى؛ زەينەتكەرلىك جاسقا كەمىندە ەكى جىلدان از ۋاقىتتىڭ قالۋى نەگىز بولىپ تابىلادى.