ق ر ۇكىمەتىنىڭ كەزەكتى وتىرىسىندا ق ر ۇكىمەتىنىڭ 2023 جىلعا ارنالعان زاڭ جوبالاۋ جۇمىستارى جوسپارىنىڭ ورىندالۋ بارىسى جانە ق ر ۇكىمەتىنىڭ 2024 جىلعا ارنالعان زاڭ جوبالاۋ جۇمىستارى جوسپارىنىڭ جوباسى قارالدى. اتالعان ماسەلە بويىنشا ادىلەت ءمينيسترى ازامات ەسقارايەۆ بايانداما جاسادى.
ءمينيستردىڭ ايتۋىنشا، ۇكىمەتتىڭ زاڭ جوبالاۋ جۇمىستارىنىڭ 2023 جىلعا ارنالعان جوسپارى پارلامەنت ماجىلىسىنە 32 زاڭ جوباسىن ازىرلەۋدى جانە ەنگىزۋدى كوزدەگەن بولاتىن. جىل ىشىندە جوسپارعا 7 وزگەرىس ەنگىزىلدى. 4 زاڭ جوباسى بويىنشا ەنگىزۋ مەرزىمدەرى اۋىستىرىلدى، مەملەكەتتىك-جەكەشەلىك ارىپتەستىك ماسەلەلەرى بويىنشا زاڭ جوباسى الىنىپ تاستالدى جانە 8 جاڭا جوبا تولىقتىرىلدى، دەپ حابارلايدى Almaty-akshamy.kz.
Primeminister.kz سايتىنىڭ مالىمەتىنشە، قازىرگى ۋاقىتتا 32 جوبانىڭ بەسەۋىنە مەملەكەت باسشىسى قول قويدى، 20-سى پارلامەنتتىڭ قاراۋىندا جاتىر، بەسەۋى – ۇكىمەتتىڭ قاراۋىندا، ەكى زاڭ جوباسى – مەملەكەتتىك ورگانداردىڭ كەلىسۋىندە. ءوز كەزەگىندە مينيسترلىكتەردىڭ قايتا قۇرىلۋىنا، سونداي-اق بيزنەس-قوعامداستىقپەن تۇجىرىمدامالىق ماسەلەلەردى پىسىقتاۋعا بايلانىستى سۋ جانە قۇرىلىس كودەكستەرىنىڭ جوبالارى بويىنشا جۇمىس جالعاسىپ جاتىر.
«مەملەكەتتىك ورگاندار زاڭ جوبالاۋ جۇمىسىن ناشار جوسپارلاعانىنا نازار اۋدارعىم كەلەدى، ونىڭ ناتيجەسىندە مەرزىمدەر ءجيى وزگەرىپ، جوسپاردان الىپ تاستاۋ فاكتىلەرى ورىن الدى. مىسالى، سۋ كودەكسىنىڭ جوسپارعا سايكەس ەنگىزۋ مەرزىمدەرى ەكى رەت تۇزەتىلىپ، سونداي-اق ۇكىمەتكە مەرزىمى بۇزىلا وتىرىپ ەنگىزىلدى»، — دەدى ازامات ەسقارايەۆ.
بۇدان باسقا جوسپاردان تىس 18 زاڭ جوباسى ازىرلەندى، 70-كە جۋىق جەكەلەگەن تۇزەتۋ توپتاماسىنا باستاماشىلىق جاسالدى، سونداي-اق بۇل زاڭ جوبالاۋ جۇمىسىنىڭ ءتيىستى دارەجەدە جوسپارلانباعانىن كورسەتەدى.
«جوعارىدا ايتىلعانداردى ەسكەرە وتىرىپ، مەملەكەتتىك ورگاندارعا زاڭ جوبالاۋ جۇمىسىن جوسپارلاۋ كەزىندە بولجامدى-تالدامالىق جۇمىستى كۇشەيتۋدى تاپسىرۋدى سۇرايمىن»، —دەدى ادىلەت ءمينيسترى ازامات ەسقارايەۆ.
ءارى قاراي مينيستر 2024 جىلعا ارنالعان جوسپار جوباسى تۋرالى ايتىپ ءوتتى. اتاپ ايتقاندا، ۇكىمەتتىڭ زاڭ جوبالاۋ جۇمىستارىنىڭ 2024 جىلعا ارنالعان جوسپارىنىڭ جوباسى مەملەكەتتىك ورگانداردىڭ ۇسىنىستارى نەگىزىندە ازىرلەنىپ، 21 قىركۇيەكتە زاڭ جوبالاۋ قىزمەتى جونىندەگى ۆەدومستۆوارالىق كوميسسيادا ماقۇلداندى.
باستاپقىدا جوسپار جوباسىندا 16 زاڭ جوباسىن ازىرلەۋ كوزدەلگەن بولاتىن. 7 قاراشادا ونى تانىستىرۋ بارىسىندا نەگىزگى ەرەجەلەرى، سونداي-اق ولاردى ازىرلەۋ نەگىزدەرى باياندالدى. بۇگىندە جوسپارعا شامالى وزگەرىستەر ەنگىزىلدى. اتاپ ايتقاندا، پارلامەنت دەپۋتاتتارىنىڭ ۇقساس زاڭ جوباسىنا باستاماشىلىق جاساعانىنا بايلانىستى تاۋارلاردىڭ شىعارىلعان ەلىن ايقىنداۋ ماسەلەلەرى بويىنشا زاڭ جوباسى جوسپار جوباسىنان الىپ تاستالدى. ارحيۆ ءىسى جانە مادەنيت مەاسەلەلەرى بويىنشا جانە «كاسىبي پاراساتتىلىققا تەستىلەۋ تۋرالى» زاڭ جوبالارى قوسىمشا ەنگىزىلدى.
ادىلەت ءمينيسترىنىڭ ايتۋىنشا، ۇسىنىلىپ وتىرعان جوسپار جوباسىندا پرەزيدەنت اكىمشىلىگىنىڭ ەسكەرتۋلەرى ەسكەرىلگەن. پىسىقتالعان جوسپار جوباسى 18 زاڭ جوباسىن ازىرلەۋدى كوزدەيدى، ونىڭ ىشىندە پارلامەنتكە ءبىرىنشى جارتىجىلدىقتا ءۇش، ەكىنشى جارتىجىلدىقتا 15 زاڭ جوباسىن ەنگىزۋ جوسپارلانىپ وتىر.
«اتالعان زاڭ جوبالارىنىڭ كونسۋلتاتيۆتىك قۇجاتتارى ۆەدومستۆوارالىق كوميسسيادا ماقۇلداندى»، — دەدى ادىلەت ءمينيسترى ازامات ەسقارايەۆ.