الماتىدا 2024 جىلى ديزەلدى اۆتوبۋستار ساتىپ الۋعا تىيىم سالىنادى جانە 100 جاڭا تروللەيبۋس ساتىپ الىنادى
الماتىدا دامۋ باعدارلاماسىن ىسكە اسىرۋ اياسىندا قوعامدىق كولىكتى باسىم دامىتا وتىرىپ، قالانىڭ تۇراقتى كولىك قۇرىلىمى قالىپتاسۋدا. اعىمداعى جىلى قالانىڭ اۆتوبۋس پاركى 1 150 ەكولوگيالىق تازا اۆتوبۋسقا جاڭارتىلدى (ونىڭ ىشىندە جەكە تاسىمالداۋشىلاردىڭ العانى – 550). 2024 جىلدان باستاپ جەكە تاسىمالداۋشىلاردىڭ ديزەلدىك اۆتوبۋستاردى ساتىپ الۋىنا تىيىم سالۋدى ەنگىزۋ جوسپارلانۋدا. بۇل تۋرالى الماتى اكىمى ەربولات دوسايەۆ استانادا وتكەن وكق بريفينگىندە سويلەگەن سوزىندە ايتتى.
"سوڭعى 11 جىلدا العاش رەت الماتىدا 100 تروللەيبۋس ساتىپ الىندى، 2024 جىلى تاعى 100 بىرلىك ساتىپ الۋ جوسپارلانۋدا، بۇل تروللەيبۋس پاركىن 100% جاڭارتۋعا مۇمكىندىك بەرەدى. الماتىدا مەترو قارقىندى دامىپ كەلەدى. اعىمداعى جىلى 3 قوسىمشا جىلجىمالى سوستاۆ ىسكە قوسىلدى. قوزعالىس ارالىعى 5 مينۋت 38 سەكۋندقا دەيىن تومەندەدى. ناتيجەسىندە مەترونىڭ جولاۋشىلار اعىنى 100 مىڭ ادامعا دەيىن ۇلعايتىلدى. جالپى، 2023 جىلدىڭ قورىتىندىسى بويىنشا قوعامدىق كولىكتە جولاۋشىلار اعىنى تاۋلىگىنە 1،5 ملن.ادامعا دەيىن، 2022 جىلى 1،2 ملن. ادامعا دەيىن ۇلعايدى"، - دەپ اتاپ ءوتتى الماتى اكىمى.