اشىق ءارى ءوزىن-وزى قامتاماسىز ەتەتىن نارىقتىق ەكونوميكا قالىپتاستىرۋ باستى باسىمدىق بولىپ قالا بەرەدى. بۇل تۋرالى VIII سايلانعان ق ر پارلامەنتىنىڭ ءبىرىنشى سەسسياسىنىڭ وتىرىسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى almaty-akshamy.kz
«ناقتى باسىمدىقتار فورماتىندا جۇمىس ىستەۋ كەرەك. اسا ماڭىزدى ماسەلەلەردى دەرەۋ شەشۋ قاجەت. ءبىراق كەيبىر ماسەلەنى كەيىنگە قالدىرۋعا، ال ءبىرقاتارى بويىنشا الداعى شەشىمدەردىڭ تەك جوباسىن بەلگىلەۋگە تۋرا كەلەدى. ايتپەسە، ەڭبەگىمىز زايا كەتەدى جانە قولدا بار رەسۋرستارىمىزدى سارقىپ الامىز. الداعى بەس جىل ەل تاعدىرى شەشىلەتىن ماڭىزدى كەزەڭ بولماق. ەلىمىزدى قارقىندى دامىتۋ ءۇشىن ساپالى زاڭنامالىق بازا قالىپتاستىرۋ كەرەك. ول ءۇشىن ەكونوميكاعا قاجەتتى ەرەجەلەر مەن قاعيدالاردى وزگەرتۋ قاجەت»، - دەدى قاسىم-جومارت توقايەۆ.
وسى ورايدا پرەزيدەنت بۇل باعىتتا العاشقى قادامدار جاسالعانىن ايتتى.
«مونوپوليادان ارىلتۋ جانە ەلىمىزدەن زاڭسىز شىعارىلعان كاپيتالدى قايتارۋ جۇمىستارى جۇرگىزىلىپ جاتىر. بۇل ەلىمىزگە ورنىقتى، باسەكەگە قابىلەتتى ءىرى بيزنەس كەرەك ەمەس دەگەندى بىلدىرمەيدى. كەرىسىنشە، قاجەت ەكەنى ءسوزسىز جانە ءبىز ونى قولدايمىز. ءىرى بيزنەس ءبىزدىڭ جاڭا ەكونوميكالىق پاراديگمادا جاڭاشا جۇمىس ىستەي باستايدى ءارى مىندەتتى تۇردە داميدى. جالپى، اشىق ءارى ءوزىن-وزى قامتاماسىز ەتەتىن نارىقتىق ەكونوميكا قالىپتاستىرۋ باستى باسىمدىق بولىپ قالا بەرەدى»، - دەدى مەملەكەت باسشىسى.