قازاقستاندا اتوم ەلەكتر ستانسياسىن سالۋدى قولدايتىن حالىقتىق شتاب ايماقتارداعى كەزدەسۋلەرىن جالعاستىرۋدا. كەزەكتى ساپارىمىز قوستاناي وبلىسىندا ءوتتى، مۇندا ستۋدەنتتەردەن باستاپ ەنەرگەتيكا سالاسىنىڭ ماماندارىنا دەيىنگى ايماق تۇرعىندارىمەن ماڭىزدى تالقىلاۋلار ۇيىمداستىرىلدى.
كەزدەسۋلەردىڭ ءبىرى رۋدنىي يندۋستريالدىق ۋنيۆەرسيتەتىندە ءوتتى. بۇل شاراعا 100-دەن استام ستۋدەنتتەر مەن وقىتۋشىلار قاتىسىپ، رەفەرەندۋمعا شىعارىلعان ماسەلە بويىنشا پىكىرلەرىن ءبىلدىردى. جاستار ءوز سۇراقتارىن قويىپ، قىزىعۋشىلىقتارىن تانىتتى. ءبىز، ماجىلىسمەندەر مەن ساراپشىلار، بۇل ماسەلەنىڭ ەلدىڭ بولاشاعى ءۇشىن ستراتەگيالىق ماڭىزدىلىعىن ەرەكشە اتاپ وتتىك.
«قازاقستاندا اتوم ەلەكتر ستانسياسىن سالۋ – ەلىمىزدىڭ ەنەرگەتيكالىق قاۋىپسىزدىگىن نىعايتۋعا باعىتتالعان ەڭ اۋقىمدى جوبالاردىڭ ءبىرى. اتوم ەنەرگەتيكاسىنىڭ بولاشاعى – سىزدەردىڭ بولاشاقتارىڭىز. جاس ينجەنەرلەر مەن ماماندار وسى سالانىڭ نەگىزىن قالاۋشىلار بولادى. قازاقستانداعى اەس مىڭداعان جاڭا جۇمىس ورىندارىن اشىپ، تەحنولوگيالىق يننوۆاسيالارعا مۇمكىندىك بەرەدى. گلوبالدى تۇرعىدا مۇنداي ەلەكتر ەنەرگياسىنىڭ كوزى ەلدەگى ەلەكتر تاپشىلىعىن ازايتىپ، ينۆەستيسيالىق قىزىعۋشىلىقتى ارتتىرىپ، ەكونوميكانىڭ وسۋىنە قۋاتتى سەرپىن بەرەدى»، – دەپ اتاپ ءوتتىم.