«الاتاۋ» ءداستۇرلى ونەر تەاترىنىڭ Steppes Rhapsody سپەكتاكلى ەۋروپادا انشلاگپەن ءوتتى. ترۋپپا تەاتر الەمىندەگى ەڭ اۋقىمدى ءارى بەدەلدى Avignon Off فەستيۆالىنە قاتىسىپ جاتىر، دەپ حابارلايدى Aqshamnews.kz.
تەاترلاندىرىلعان كونسەرتتىك قويىلىمدى تاماشالاعان كورەرمەن ورنىنان تىك تۇرىپ قوشەمەت كورسەتۋدە. فەستيۆال پرەزيدەنتى ارولد داۆيد قويىلىمعا جوعارى باعا بەردى. ايتا كەتەيىك، سپەكتاكل رەجيسسەرى – ادىلەت تامەنوۆ.
«Steppes Rhapsody – كورەرمەندى تاڭقالدىرعان، ساناعا سەرپىلىس بەرگەن جانە قازاقستانعا جول اشاتىن قويىلىم. «الاتاۋ» تەاترىنا فەستيۆالگە شاقىرتۋدى ءوزىم ۇسىنعان ەدىم. فرانسيا حالقى قازاقستاننىڭ قازىرگى زامانعى ونەرىمەن تانىسىپ، ونەرىنە سۇيسىنسە ەكەن دەگەن ماقسات بولدى. جالپى، بۇل فەستيۆال شىعارماشىلىق ونىمدەرگە ارنالعان كاسىبي الاڭ، يدەيا مەن تاجىريبە الماسۋدىڭ، جاڭا سەرىكتەستىكتەردىڭ توعىسار ورتاسى. ءبىزدىڭ فەستيۆالگە جىل سايىن الەمنىڭ تۇكپىر-تۇكپىرىنەن 2000-نان استام تەاتر پروديۋسەرى كەلەدى. ولار مۇندا جاڭا قويىلىمداردى ىرىكتەپ، باعدارلامالارىنا قوسادى. سوندىقتان، قازاق تەاترى جاڭا ۇسىنىستار ارقىلى بيىك بەسيۋلەستەردى باعىندىراتىنىنا سەنەمىن»، – دەدى Avignon Off فەستيۆالىنىڭ پرەزيدەنتى ارولد داۆيد.
ارولد ءداۆيدتىڭ ايتۋىنشا، بيىل Avignon OFF فەستيۆالى اۋقىمى جاعىنان رەكورد جاڭارتتى. قالادا ءبىر مەزەتتە 130 ساحنا جۇمىس ىستەپ تۇردى، وندا كۇنىنە 1785 سپەكتاكل كورەرمەن نازارىنا ۇسىنىلدى. ال، جالپى ساتىلعان بيلەتتەردىڭ سانى 1،6 ميلليوننان اسادى. تەاترلار ءۇش اپتا ىشىندە شامامەن 22 ميلليون ەۋرو تابىس تاپتى. نەگىزگى نازار تەاترعا باعىتتالعانىمەن، كورەرمەندەرگە الەمنىڭ تۇكپىر-تۇكپىرىنەن بي، مۋزىكا، سيرك جانە ءتۇرلى جانرداعى شوۋلار دا ۇسىنىلدى.
ال، Steppes Rhapsody قويىلىمىنىڭ باستى ەرەكشەلىگى – ساحنادا ءار شىعارما، ءان، بي ەتنو-فولكلورلىق ءانسامبلدىڭ سۇيەمەلدەۋىمەن ورىندالدى. دومبىرا، جەتىگەن، بايان، قىلقوبىز، پريما-قوبىز، شەرتەر، ۇرمالى جانە ۇرمەلى اسپاپتار – بارلىعى 20-دان اسا ۇلتتىق اسپاپتىڭ ءۇنى كورەرمەنگە اسەرلى مۋزىكالىق اتموسفەرا سىيلايدى.
قويىلىم بارىسىندا كورەرمەن كۇيشى ارناي نادىرحانوۆ پەن ءىلياس سەرىكبايەۆ اراسىنداعى كۇي تارتىستىڭ اسەرلى ورىندالۋىنا ءتانتى بولدى. ءىلياس سەرىكبايەۆ ءار شىعارماعا ۇرمالى اسپاپتارمەن ىرعاق بەرىپ وتىرسا، جەتىگەندە ويناعان تۇرسىناي پازىل ليريكالىق اۋەنمەن قويىلىمعا نازىكتىك قوستى. بايانشى جاندوس ساۋىت كەڭ تىنىستى مۋزىكالىق ورنەك جاساسا، قىلقوبىز شەبەرى نۇربولات قىدىربايەۆ ۇنگە مەديتاتيۆتى رەڭك بەردى. پريما-قوبىزدا ونەر كورسەتكەن اجار قادىلبەكوۆا ساحنالىق كوڭىل كۇيدى ءدال جەتكىزسە، زارينا ىسقاق شەرتەرمەن انسامبل ۇنىنە كوشپەلى مادەنيەتتىڭ تەرەڭ تامىرىن ءسىڭىردى. قويىلىم بارىسىندا قۇرمانعازى مەن نۇرعيسا تىلەندييەۆتىڭ كۇيلەرى، سونداي-اق حالىق اندەرى مەن اۆتورلىق شىعارمالار ورىندالدى.
تەاترداعى ءداستۇرلى انشىلەر ۇلجان اعلاقوۆا مەن دياس مۇراتحاننىڭ ۆوكالدىق پارتيالارى كورەرمەننىڭ ىستىق ىقىلاسىنا بولەندى. ءان ايتۋ ساحنالىق قويىلىمعا تابيعي تۇردە كىرىكتىرىلىپ، وقيعا جەلىسى مەن ەموسيالىق ءورىستى تولىقتىرا ءتۇستى. ال مەرۋەرت قالىزات پەن ايگەرىم اسانوۆا ورىنداعان حورەوگرافيا سپەكتاكلدىڭ كوركەمدىك تۇتاستىعىن ارتتىرىپ، بەينەلى شەشىمنىڭ ماڭىزدى ەلەمەنتىنە اينالدى. بي مەن ءان، مۋزىكا مەن دراما ۇندەسە وتىرىپ، قويىلىمنىڭ كوركەم قۋاتىن تەرەڭدەتىپ، كورەرمەنگە ەرەكشە اسەر سىيلادى.
قويىلىم رەجيسسەرى ادىلەت تامەنوۆتىڭ ەكى ايبالتامەن ورىندايتىن كۇردەلى ءارى اسەرلى ساحنالىق كورىنىسى كورەرمەندى بىردەن باۋراپ الدى. بۇل – اۆتوردىڭ وزىندىك رەجيسسەرلىك شەشىمى، الەمدىك ساحنالىق تاجىريبەدە بالاماسى جوق ەرەكشە پلاستيكالىق ءتاسىل. قيمىل-قوزعالىس پەن تريۋكتەردىڭ دالدىگى، ساحنالىق پلاستيكا مەن درامالىق قارقىن قويىلىمنىڭ كوركەمدىك شارىقتاۋ شەگىن ايقىنداپ، كورەرمەنگە ۇمىتىلماس اسەر سىيلايدى.
«فرانسيا ساحناسىندا ونەر كورسەتۋ ءارى كورەرمەننىڭ شىنايى ىقىلاسىنا بولەنۋ – ءبىزدىڭ ەڭ ۇلكەن جەتىستىگىمىز. ەۋروپا حالقى قازاق اندەرى مەن ۇلتتىق اسپاپتارىنا ءتانتى بولىپ، ءبىزدىڭ ەڭبەگىمىزدى ەرەكشە باعالاپ جاتىر. ەكى ايبالتامەن كورسەتىلەتىن كۇردەلى تريۋكتەر – قازاقتىڭ بەس قارۋىنىڭ سيمۆولدىق كورىنىسى. مۇنداي حالىقارالىق دەڭگەيدەگى ساحنادا قازاقتىڭ بولمىسىن پاش ەتۋ – ۇلكەن جاۋاپكەرشىلىك»، – دەدى رەجيسسەر ادىلەت تامەنوۆ.
Steppes Rhapsody قويىلىمى Avignon Off فەستيۆالىندەگى Rouge Gorge ساحناسىندا ون كۇن بويى كورسەتىلىپ جاتىر. قويىلىم فەستيۆالدىڭ ەڭ جارقىن تۋىندىلارىنىڭ ءبىرى رەتىندە باعالانۋدا.
ايتا كەتۋ كەرەك، بۇل تابىس تەك ءبىر تەاتردىڭ ەمەس، تۇتاستاي قازاقستاندىق ساحنا ونەرىنىڭ حالىقارالىق دەڭگەيدە مويىندالۋىنىڭ كورسەتكىشى. بيىل العاش رەت الماتى قالاسىنان بىردەن ءتورت تەاتر ۇجىمى Avignon Off فەستيۆالىنىڭ رەسمي باعدارلاماسىنا شاقىرىلدى. ولار – «الاتاۋ» ءداستۇرلى ونەر تەاترى، مەملەكەتتىك قۋىرشاق تەاترى، «ارتيشوك» تەاترى جانە «جولدا» تاۋەلسىز تەاترى. بۇل كورسەتكىش – ەلىمىزدەگى تەاتر ونەرىنىڭ جاڭا كەزەڭى باستالعانىن بىلدىرەتىن تاريحي جەتىستىك.