جوسپارعا سايكەس، ۇلتتىق ەكونوميكا مينيسترلىگى الماتى وبلىسىنىڭ اكىمدىگىمەن بىرلەسىپ ەكونوميكالىق ەسەپتەردى، جاڭا قالانىڭ سحەمالىق كارتاسىن دايىنداۋ بويىنشا جۇمىستار جۇرگىزدى. سونداي-اق حالىقپەن جيىن وتكىزىلىپ، سونىڭ نەگىزىندە الماتى وبلىسى مەن ىلە، تالعار اۋداندارى جانە قونايەۆ قالاسى ءماسليحاتتارىنىڭ شەشىمدەرى قابىلداندى.
"جاڭا قالانى قۇرۋ جول جەلىلەرى، ينجەنەرلىك، الەۋمەتتىك ينفراقۇرىلىم وبەكتىلەرىن مودەرنيزاسيالاۋعا، جاڭا جۇمىس ورىندارىن اشۋعا، ينۆەستيسيالاردى، تەحنولوگيالاردى، قوسىمشا قارجى اعىندارىن تارتۋعا، كاسىپكەرلىك بەلسەندىلىكتى دامىتۋعا، سالىق تۇسىمدەرىن ۇلعايتۋعا مۇمكىندىك بەرەدى. بۇل ءوز كەزەگىندە ءوڭىردىڭ ينۆەستيسيالىق تارتىمدىلىعى مەن ەكونوميكالىق تۇراقتىلىعىن جاقسارتۋعا ىقپال ەتەدى"، - دەپ جازدى قازاقستان رەسپۋبليكاسى ۇلتتىق ەكونوميكا مينيسترلىگى Telegram-كانالىنا.
سونىمەن قاتار، ۇكىمەت اەا (ارنايى ەكونوميكالىق ايماق) اۋماعىن 30 مىڭ گەكتاردان 96،5 مىڭ گەكتارعا دەيىن كەڭەيتۋ مەن G4 City اەا-نى Alatau اەا-عا قايتا اتاۋ تۋرالى شەشىمدى ماقۇلدادى.
"وسىلايشا، الاتاۋ قالاسىنىڭ بارلىق اۋماعى جانە قونايەۆ قالاسىنىڭ ءبىر بولىگى اەا اۋماعىنا جاتقىزىلادى"، دەپ جازىلعان قازاقستان رەسپۋبليكاسى ۇلتتىق ەكونوميكا مينيسترلىگىنىڭ حابارلاماسىندا.
ارنايى ەكونوميكالىق ايماق اۋماعىندا قىزمەتتىڭ باسىم تۇرلەرى بويىنشا ەقجج-نىڭ (ەكونوميكالىق قىزمەت تۇرلەرىنىڭ جالپى جىكتەۋىشى) 17 اتاۋى نەگىزىندە 110 مىڭ جاڭا جۇمىس ورنىن قۇرا وتىرىپ، جالپى سوماسى 12،5 ترلن تەڭگەگە 170-تەن استام جوبانى ورنالاستىرۋ كوزدەلىپ وتىر.
"بولجامدى دەرەكتەرگە سايكەس، اەا وبەكتىلەرى جوبالىق قۋاتىنا شىققاننان كەيىن بۇكىل كەزەڭدەگى باعالانعان جيىنتىق ۇلەسى 47،3 ترلن تەڭگەنى، ونىڭ ىشىندە مۋلتيپليكاتيۆتىك اسەرى 17 ترلن تەڭگەنى قۇرايدى"، دەپ جازدى قازاقستان رەسپۋبليكاسى ۇلتتىق ەكونوميكا مينيسترلىگى