جاڭادان قۇرىلعان الاتاۋ قالاسىندا اەروتاكسي جۇيەسىن ىسكە قوسۋ جوسپارلانىپ وتىر، دەپ حابارلايدى aqshamnews.kz
وسى ماقساتتا جاساندى ينتەللەكت جانە سيفرلىق دامۋ مينيسترلىگى، امەريكالىق Joby Aero، Inc. كومپانياسى، Alatau Advance Air Group Ltd. جانە كاسىپكەر ۆياچەسلاۆ كيم ءوزارا تۇسىنىستىك جونىندەگى مەموراندۋمعا قول قويدى.
قۇجات اياسىندا شامامەن 300 ملن اقش دوللارىنا ەلەكترلى eVTOL ۇشاقتارىن ساتىپ الۋ كوزدەلىپ وتىر.
مينيسترلىك 2025 جىلعى 7 قاراشادا حابارلاعانداي، تىگىنەن ۇشىپ-قوناتىن يننوۆاسيالىق ۇشۋ اپپاراتتارى قازاقستانداعى العاشقى قالالىق اۋە موبيلدىلىگى (Urban Air Mobility) جوباسىنىڭ نەگىزى بولماق. جوبا اياسىندا سەرتيفيكاتتاۋ جانە دەمونستراسيالىق ۇشۋلارعا ارنالعان سىناق الاڭىن قۇرۋ، سونداي-اق الاتاۋ مەن الماتى قالالارىنىڭ كولىك جەلىسىنە اۋە تاكسيدى ينتەگراسيالاۋ جوسپارلانۋدا.
"قازاقستان يننوۆاسيالىق كولىكتىڭ بولاشاعىنا قادام باسۋدا. ەلەكترلى eVTOL ۇشاقتارىن ساتىپ الۋ – سمارت قالالار مەن زاماناۋي تەحنولوگيالاردى ەنگىزۋ باعىتىنداعى ماڭىزدى كەزەڭ. بۇل شارا الاتاۋ قالاسىن بولاشاقتىڭ جوعارى تەحنولوگيالى، بىرەگەي قالا رەتىندە دامىتۋعا سەرپىن بەرەدى"، – دەدى قازاقستان رەسپۋبليكاسىنىڭ پرەمەر-مينيسترىنىڭ ورىنباسارى – جاساندى ينتەللەكت جانە سيفرلىق دامۋ ءمينيسترى جاسلان مادييەۆ.
Joby Aero، Inc. – eVTOL اۆياسيا سالاسىنداعى الەمدىك كوشباسشى، سەرتيفيكاتتالعان ەلەكترلى اۋە تاكسيلەرىنىڭ ازىرلەۋشىسى.