ەلىمىزدىڭ ونەركاسىپ الەۋەتىن تولىق پايدالانۋ ءۇشىن جان-جاقتى شارالار قابىلداۋ قاجەت. بۇل تۋرالى مەملەكەت باسشىسى قاسىم-جومارت توقايەۆ قازاقستان حالقىنا جولداۋىندا ايتتى، دەپ حابارلايدى aqshamnews.kz.
«ەلىمىزدىڭ ونەركاسىپ الەۋەتىن تولىق پايدالانۋ ءۇشىن جان-جاقتى شارالار قابىلداۋ قاجەت. ۇكىمەت 17 ءىرى جوبانىڭ ءتىزىمىن جاسادى. وندا تەرەڭ وڭدەۋ ءتاسىلىن مەڭگەرۋگە باسىمدىق بەرىلگەن. ءوز شيكىزاتىمىز بەن قۇرال-جابدىقتارىمىزدى بارىنشا پايدالانۋ، ءىرى كاسىپورىندارعا جاپسارلاس وندىرىستەر اشۋ ماڭىزدى. مەن جۋىردا قاراعاندى وبلىسىندا بولدىم. سول كەزدە «Qarmet» مەتاللۋرگيا كومبيناتىنا باردىم. وتاندىق ينۆەستور كەلگەن سوڭ، ونداعى احۋال ەداۋىر تۇراقتالدى. كاسىپورىن جاڭعىرتىلا باستادى. بۇل قادام وندىرىلەتىن ءونىم كولەمىن ايتارلىقتاي ارتتىرۋعا ءتيىس. ساران قالاسىنىڭ ەكونوميكاسىن ءارتاراپتاندىرۋ جۇمىسى جۇرگىزىلىپ جاتىر. وندا اۆتوكولىك دوڭعالاعىن جانە تۇرمىستىق تەحنيكا شىعاراتىن وندىرىستەر ىسكە قوسىلدى. سونىڭ ارقاسىندا بۇل ەلدى مەكەن مونوقالالار ساناتىنان شىعارىلدى»، - دەدى قاسىم-جومارت توقايەۆ.
پرەزيدەنتتىڭ اتاپ وتۋىنشە، باسقا دا مونوقالالارعا دەم بەرۋ ءۇشىن وسى تاجىريبەنى قولدانۋ قاجەت. جالپى، ايماقتاردىڭ وسىپ-وركەندەۋىنە جول اشاتىن جاڭا ءوندىرىس ورىندارىن بارىنشا دامىتۋ كەرەك.
«بيىل ارنايى جارلىقپەن الاتاۋ قالاسى قۇرىلعانىن بىلەسىزدەر. بۇل قالا قارقىندى داميتىن، يننوۆاسيا كەڭىنەن قولدانىلاتىن ءارى بىلىكتى ماماندار جۇمىس ىستەيتىن ورىنعا اينالۋى قاجەت. ۇكىمەت وندا جايلى ءومىر ءسۇرىپ، تابىستى ەڭبەك ەتۋگە، ينۆەستيسيا سالۋعا قولايلى جاعداي جاساۋعا تينۆەستيسيا،ءيىس. اۆتوكولىك قۇراستىرۋ ىسىندە وڭ ناتيجەلەر بار. وسى قارقىندى ساقتاپ، جەرگىلىكتى ءوندىرىس كولەمىن ۇدايى ارتتىرۋ كەرەك. مەملەكەتتىڭ اۆتوكولىك ونەركاسىبىنە كورسەتىپ جاتقان جان-جاقتى قولداۋى ءتۇپتىڭ تۇبىندە تولىققاندى اۆتوكولىك قۇراستىرۋ كلاستەرى رەتىندە ەلدىڭ يگىلىگىنە اينالۋى قاجەت»، - دەدى مەملەكەت باسشىسى.