الاتاۋ اۋدانىنىڭ ەگۋ پۋنكتتەرىندە 2 ماۋسىمنان باستاپ كۇن سايىن ۆاكسينا العاندارعا 30 ماۋسىمدا وتەتىن لوتەرەيا ۇتىستارىنا قاتىسۋ ۇسىنىلدى.
الاتاۋ اۋدانى اكىمدىگىنىڭ ۇيىتقى بولۋىمەن جانە كاسىپكەرلىك قاۋىمداستىقتىڭ قولداۋىمەن «ەرتەڭگى كۇن – بەتپەردەسىز!» دەگەن اتاۋمەن اكسيالار وتۋدە، دەپ حابارلايدى Almaty-akshamy.kz.
ۇتىس ويىندارى الاتاۋ اۋدانىنداعى بارلىق شاعىناۋدانداردا، ونىڭ ىشىندە 27 ەگۋ ورتالىعىندا وتەدى. ەكپە سالۋ ءۇشىن 5 ءموبيلدى بريگادا جۇمىس ىستەيدى. ولار ۆاكسينا سالۋ ءۇشىن كاسىپورىندار مەن ۇيىمداردى ارالايدى.
الاتاۋ اۋدانىنىڭ باس دارىگەرى ءاليا مازبايەۆا اكسيانىڭ كوروناۆيرۋسقا قارسى ۆاكسينانىڭ ءبىرىنشى كومپونەنتىن العان ادامدار اراسىندا ءوتىپ جاتقانىن ايتتى. كەپىلدەندىرىلگەن جۇلدەلەردىڭ ىشىندە پايدالى زاتتار، ىدىس-اياق جيناعى، شاش كەپتىرگىش، ءاميان مەن سۇلگىلەر بار.
سونىمەن قاتار، بارلىق ۆاكسينا العاندار 30 ماۋسىمدا الاتاۋ اۋدانى اكىمدىگىنىڭ الدىنداعى الاڭدا وتەتىن جۇلدەلەردىڭ باستى ۇتىس ويىنىنا قاتىسا الادى. ۇيگە ارنالعان تۇرمىستىق تەحنيكا، توڭازىتقىش، كىر جۋعىش ماشينا، قىسقا تولقىندى پەش پەن باسقا دا سىيلىقتار ويناتىلادى.
ءا. مازبايەۆانىڭ ايتۋىنشا، اۋدان تۇرعىندارى ۆاكسينانى جۇلدەلى ۇتىس الۋ ءۇشىن ەمەس، ىندەتتى جۇقتىرماۋ ماقساتىندا الۋدا.
«ادامدار سانالى تۇردە كەلىپ، ۆاكسينا الۋدا. ولار ۆاكسينانىڭ پاندەمياعا قارسى تۇرۋدىڭ ەڭ ءتيىمدى قۇرالى ەكەنىن ءارى يممۋندىق جۇيەنى دامىتاتىنىن، ءتىپتى اۋرۋ جۇقتىرعان جاعدايدا انتيدەنەلەردى جەدەل قالىپتاستىراتىنىن، ۆيرۋستى جوياتىنىن بىلەدى»، — دەپ ءتۇسىندىردى ءا.مازبايەۆا.
ۆاكسينا قابىلداماس بۇرىن بارلىق ناۋقاستاردىڭ جاعدايى باقىلانادى. مىندەتتى تەكسەرۋدى دارىگەر جۇرگىزەدى. سونداي-اق ۆاكسينادان كەيىن ناۋقاستى 30 مينۋت باقىلاۋدا ۇستايدى. ال، ۇتىس لوتەرەياسىن الۋ ءۇشىن ساۋالنامانى تولتىرۋ قاجەت، بەرىلەتىن بارلىق كۋپوندار تىركەلەدى.
ەرتەڭ، 9 ماۋسىمدا، ۇتىس لوتەرەياسى سوڭعى رەت وينالادى.