الاتاۋ اۋدانىنداعى مومىش ۇلى كوشەسىندە 4 500 شارشى مەتر بولاتىن جاڭا قوعامدىق كەڭىستىكتى اباتتاندىرۋ جۇمىسى باستالدى. جوبانى اۋدان اكىمدىگى مەن «DM-STROI» ج ش س مەردىگەر ۇيىمى بىرلەسىپ ىسكە اسىرۋعا كىرىستى، دەپ حابارلايدى aqshamnews.kz
الاتاۋ اۋدانىنىڭ اكىمى تالعات مالىبايەۆ باسپا ءسوز تۋرى بارىسىندا بۇل جوبانىڭ ماقساتى – جايلى ءارى زامانعا ساي قالالىق ورتا قۇرۋ ەكەنىن ايتتى.
«ءبىز دە پانفيلوۆ كوشەسى مەن تەرەڭقۇر سياقتى جايلى ورىندار بولعانىن قالايمىز. الاتاۋ – شەتكى اۋدان ەمەس، سوندىقتان مۇنداعى اباتتاندىرۋ جۇمىسى دا ءال-فارابي مەن دوستىق كوشەسىنەن كەم بولماۋى كەرەك»، - دەدى ول.
جاڭا جاسىل ايماقتا جاياۋ جۇرگىنشى جولى، ۆەلوسيپەد جولاعى سالىنىپ، دەمالىس ورىندارى، ارت-نىساندار اشىلىپ، قوقىس جاشىكتەرىن قويىپ، جارىقتاندىرماق. جوبا اياسىندا 103 جارىق باعانى ورناتىلادى، 1 028 م² اسفالت، 3 077 م² برۋسچاتكا جانە 226 م² تارتان جابىنى توسەلەدى.
بيىكتىگى 26 مەتر بولاتىن تۋ قويىلاتىن جارىق باعان دا قويىلماق. تۋدىڭ ولشەمى – 4×2 مەتر.
«بۇل يميدجدىك ورىن بولادى. ۇشاقپەن قالاعا جاقىنداعاندا «الاتاۋ» دەگەن بەلگى بىردەن كوزگە تۇسەدى»، – دەدى اۋدان اكىمى.
تالعات مالىبايەۆتىڭ ايتۋىنشا، اباتتاندىرۋ جۇمىستارى بيىل اۋدان بويىنشا 2،5 ملرد تەڭگە بولىنگەن «حالىق قاتىساتىن بيۋدجەت» (حقب) جوباسى اياسىندا جۇرگىزىلىپ جاتىر.
«بۇل جوبالاردى تۇرعىندار وزدەرى تاڭداپ، داۋىس بەرەدى، يدەيا ۇسىنادى. جەڭىمپاز انىقتالعاننان كەيىن بىردەن ىسكە كىرىسەمىز. ءقازىر 500-دەن استام ءوتىنىش كەلىپ ءتۇسىپ، 50 جوبا ىرىكتەلدى: ونىڭ 16 –سى بالالار جانە سپورت الاڭىن جوندەۋ، 31 – جاڭا قوعامدىق كەڭىستىك، 3 –ءۋى كوشەنى جارىقتاندىرۋعا قاتىستى جوبالار»، - دەپ اتاپ ءوتتى ول.
الاتاۋ اۋدانى تاعى ءبىر جاڭا باستامانى - بالالار الاڭىنا كۇننەن قورعايتىن قالقا ورناتۋدى قولعا الىپتى.
«الاڭنىڭ نەگىزگى بولىگىن ماۋسىم باستالعانعا دەيىن پايدالانۋعا بەردىك. قاراسۋ ىقشاماۋدانىندا فۋتبول الاڭى مەن كولدى اباتتاندىرۋدى قامتيتىن ۇلكەن جوبانى اياقتاپ جاتىرمىز. مۇنىڭ ءبارى – ءومىر سۇرۋگە قولايلى ورتا قالىپتاستىرۋعا ارنالعان جۇمىستىڭ ءبىر بولىگى»، – دەدى تالعات مالىبايەۆ.
جوبانىڭ باستى ماقساتىنىڭ ءبىرى – مومىش ۇلى، رىسقۇلوۆ جانە سايىن كوشەسىن جالعايتىن جاياۋ جۇرگىنشىلەر پرومەنادىن قۇرۋ.
«ءبىزدىڭ يدەيا – اۋدان شەكاراسىن تۇگەل قامتيتىن “جاسىل بەلدەۋدى” جارىقتاندىرىپ، «الاتاۋ» اتاۋى بار جاڭا بەلگى ورناتۋ. ءقازىر جۇمىس ءجۇرىپ جاتىر، اباتتاندىرۋ شىلدەنىڭ 10-نا دەيىن اياقتالادى»، – دەدى اۋدان اكىمى.
سونىمەن قاتار، اۋدان اكىمدىگى كومانداسى نىسانداردى بۇزباي، ولاردى بارىنشا ساقتاۋعا تىرىساتىنىن ايتتى.
«اسفالت پەن تاس توسەنىش جاقسى كۇيدە بولسا، ونى بۇزبايمىز. مۇمكىندىگىنشە ساقتاپ قالامىز. تەك كۇيى كەتكەندەرىن عانا اۋىستىرادى. بۇل قالا اكىمىنىڭ تاپسىرماسى».
ءسوز سوڭىندا اكىم بىلاي دەپ تولىقتىردى: «بۇلار جاي عانا جول ەمەس – بۇل بەينەباقىلاۋمەن جابدىقتالعان، جارىقتاندىرىلعان، جاسىل، ءقاۋىپسىز كوشە. ۇي-ىشىڭمەن دەمالساڭ دا بولادى!»