الاتاۋ اۋدانىنىڭ «راحات-مادەنيەت» ىقشاماۋدانىندا بارلىق ۇيلەر ورتالىق سۋ قۇبىرى مەن كارىز جۇيەسىنە قوسىلادى. ءقازىر ينجەنەرلىك جەلىلەردىڭ ەداۋىر بولىگىن تارتىپ قويعان. وڭىرلىك كوممۋنيكاسيالار قىزمەتى ۇيىمداستىرعان باسپا ءسوز تۋرى بارىسىندا جۋرناليستەر وسى جوبا بويىنشا قولعا الىپ جاتقان جۇمىسپەن تانىسىپ شىقتى، دەپ حابارلايدى aqshamnews.kz
اۋدان اكىمدىگى ىسكە اسىرىپ جاتقان جوبا ىقشاماۋداندى ورتالىقتاندىرىلعان سۋ قۇبىرى مەن كارىز جۇيەسىنە تولىق قوسپاق.
جالپى قۇنى 10،4 ميلليارد تەڭگەنى قۇرايتىن جوبادا 131،72 شاقىرىم ينجەنەرلىك جەلىلەر سالىنادى. ولار 69،9 شاقىرىم سۋ قۇبىرى مەن 61،8 شاقىرىم كارىز جۇيەسى. جۇمىستى اتقارۋشى جالپى مەردىگەر — «ساپا قۇرىلىس 2007» ج ش س. جوبانىڭ اۆتورلىق قاداعالاۋىن «قازاق سۋكانالپروەكت» ج ش س جۇرگىزسە، تەحنيكالىق باقىلاۋدى «AMANAT ەكسپەرت» ج ش س جۇزەگە اسىرىپ جاتىر.
باسپا ءسوز تۋرى بارىسىندا حابارلانعانداي، دايىندىق جۇمىسى 2023 جىلدىڭ قازان-قاراشا ايلارىندا باستالعان. ءقازىر 49،8 شاقىرىم ينجەنەرلىك جەلى تارتىلىپتى، ونىڭ 30،3 شاقىرىمى سۋ قۇبىرى مەن 19،5 شاقىرىمى كارىز جەلىسى. مەملەكەتتىك ساراپتامانىڭ قورىتىندىسىنا سايكەس، جوبا 2023 جىلدىڭ سوڭىنا دەيىن اياقتالماق.
«بورالداي مەن راحات-مادەنيەت ىقشاماۋدانىندا قۇرىلىس-مونتاج جۇمىستارى، قالالىق سۋ جانە كارىز جەلىلەرىنە قوسۋ مەن جولدى اسفالتتاۋ جۇمىسى جۇرگىزىلىپ جاتىر. مۇنىڭ ءبارى ورتاشا ەمەس، جاڭا قۇرىلىس. ايگەرىم 1-2 جانە تەرەكتى ىقشاماۋداندارى سياقتى ماسەلەسى شەشىلمەگەن اۋداندار دا بار. تەرەكتىگە بايلانىستى ءبىز وسى اپتادا سوت شەشىمىن كۇتىپ وتىرمىز. ەگەر وڭ شەشىم شىقسا، شىلدە ايىنىڭ باسىندا قۇرىلىس-مونتاج جۇمىسى باستالادى. بۇل جاقتاعى شارۋانىڭ كولەمى راحات-مادەنيەتتەگىمەن بىردەي. ايگەرىم ميكرورايونى بويىنشا «الماتى سۋ» كومپانياسى مەن ەنەرگەتيكا باسقارماسىنىڭ شەشىمىن كۇتىپ وتىرمىز. الايدا، قالا اكىمى دارحان ساتىبالدىنىڭ تاپسىرماسىمەن بيىل بارلىق ىقشاماۋداندا جۇمىس باستالىپ، كەلەسى جىلى اياقتالۋى ءتيىس ول. بارىنە قارجى بولىنگەن، ەندىگى مىندەت — مەردىگەرلەردى باقىلاپ، كۇن رايىن، ۋاقىتتى ەسكەرىپ وتىرۋ»، - دەدى الاتاۋ اۋدانىنىڭ اكىمى تالعات مالىبايەۆ.
جوبانىڭ ناتيجەسىندە 2 882 ابونەنت — بۇل شامامەن 14 000 تۇرعىن — العاش رەت ساپالى ورتالىقتاندىرىلعان سۋ مەن كارىز قىزمەتىنە قول جەتكىزەدى. وسى ابونەنتتەردىڭ ىشىندە 350-دەن استامىنا ورتالىق سۋ قۇبىرى قوسىلدى. بۇل شەشىم قازىرگى تۇرمىستىق قيىندىقتاردى جويۋعا عانا ەمەس، سونىمەن قاتار وسى اۋماقتاعى ءومىر ءسۇرۋ دەڭگەيىن ايتارلىقتاي ارتتىرۋعا ىقپال ەتپەك.
جوبا كوپ جىلدار بويى نەگىزگى كوممۋنالدىق قىزمەتتەن شەتتەتىلىپ قالعان تۇرعىنداردىڭ وتىنىشىنە جاۋاپ رەتىندە قولعا الىنىپ وتىر. «راحات-مادەنيەت» ىقشاماۋدانى قالا ورتالىعىندا ورنالاسسا دا، كوپ كوشەسى ءالى كۇنگە دەيىن ورتالىقتاندىرىلعان ينجەنەرلىك جەلىلەرگە قوسىلماعان.
باسپا ءسوز تۋرى بارىسىندا الاتاۋ اۋدانىنىڭ اكىمى تالعات مالىبايەۆ «راحات-مادەنيەت» ىقشاماۋدانىنىڭ قاي كوشەسى سۋ مەن كارىز جۇيەسىنە قوسىلعانىن، قاي كوشەنى ينجەنەرلىك جەلىگە قوسۋ جۇمىسى اياقتالىپ قالعانىن ايتتى.
«كراندى اشىپ، سۋ بار ەكەنىن كورسەتە الامىز. مىنە، وسى اۋدانداعى جۇمىس ءقازىر 100% ءبىتتى. بۇل كوشەلەردى ءبىز ماۋسىم ايىنىڭ سوڭىنا دەيىن تامامداۋدى ويلاستىرىپ وتىرمىز. قالعانىنا ءبىر اپتا قالدى. كەلەسى اۋدانداعىسىن شىلدە ايىنىڭ سوڭىنا دەيىن بىتىرمەكپىز. تايساۋىرىن، التىنقورعان، ايپارا كوشەلەرى وتە تار. ەكسكاۆاتور ارەڭ كىرىپ، اينالىپ شىعا المايدى. بۇل جۇمىسقا كەدەرگى كەلتىرىپ وتىر. ەڭ قيىن ۋچاسكەمىز دە وسى جەر. جالپى العاندا، جۇمىستىڭ قارقىنى جاقسى. سوندىقتان بۇل جوبا كەلەر جىلعا دەيىن تولىق بىتەرىنە سەنىمدىمىز»، — دەدى تالعات مالىبايەۆ.
«راحات-مادەنيەتتەگى» جوبا الاتاۋ اۋدانىنداعى ينفراقۇرىلىمدى مودەرنيزاسيالاۋ بويىنشا كەڭ اۋقىمدى ستراتەگيانىڭ ءبىر بولىگىنە اينالدى. قازىرگى تاڭدا الاتاۋ اۋدانى الماتى بويىنشا دامۋ قارقىنى جوعارى اۋداننىڭ ءبىرى بولىپ وتىر.