الماتى اكىمى دارحان ساتىبالدى جۇمىس ساپارى اياسىندا الاتاۋ اۋدانىنىڭ توميريس شاعىناۋدانىنا بارىپ، دجيگيتوۆكا وزەنىنىڭ بويىنداعى توعانداردىڭ گيدروتەحنيكالىق قۇرىلىستارىن قايتا جاڭعىرتۋعا ارنالعان جوبالىق-سمەتالىق قۇجاتتامانىڭ (جسق) دايىنداۋ بارىسىمەن تانىستى.
ەكولوگيا جانە قورشاعان ورتا باسقارماسىنىڭ باسشىسى ميراس گايسيننىڭ مالىمدەۋىنشە، جوبا اياسىندا جۇمىس ىستەپ تۇرعان بەس بوگەتتى قايتا جوندەۋ، ءبىر جاڭا بوگەتتى تۇرعىزۋ، توعان ءتۇبىن تازارتۋ جانە جاعالاۋدى بەكىتۋ جوسپارلانعان. سونىمەن قاتار بەينەباقىلاۋ، جارىقتاندىرۋ جانە اۆتوماتتاندىرىلعان مونيتورينگ جۇيەلەرىن ورناتۋ كوزدەلىپ وتىر. جوبالانعان اۋماقتىڭ جالپى كولەمى 122،49 گەكتار، سۋ ايدىنىنىڭ اۋماعى 38،82 گەكتار، ال توعاندارداعى سۋدىڭ ەسەپتىك كولەمى 821 مىڭ تەكشە مەتر.
شاھار باسشىسى سۋ ايدىندارىن ەكولوگيالىق تۇرعىدان قالپىنا كەلتىرۋگە كەشەندى تۇردە قاراۋ قاجەتتىگىن اتاپ ءوتتى. ونىڭ ايتۋىنشا، بۇل ينجەنەرلىك نىسانداردى قالپىنا كەلتىرۋ عانا ەمەس، سونىمەن بىرگە تۇرعىندار ءۇشىن ەكولوگيالىق جانە تۇرمىستىق تۇرعىدان جايلى، ءقاۋىپسىز كەڭىستىك قۇرۋدى بىلدىرەدى.
اكىمنىڭ ايتۋىنشا، مۇنداي نىسانداردى قوعامدىق دەمالىس ايماقتارىنا اينالدىرۋعا ۇلكەن مۇمكىندىك بار. «ءار ەلدىڭ تاجىريبەسىنە قاراساق، ءساتتى مىسالدار كوپ. مۇنداي توعانداردى كوركەيتىپ، حالىقتىڭ يگىلىگىنە جاراتۋعا ابدەن بولادى. بۇل الاتاۋ اۋدانى ءۇشىن تاعى ءبىر حالىق باراتىن ورىنعا اينالادى»، – دەدى دارحان ساتىبالدى.
ساپار قورىتىندىسى بويىنشا قالا اكىمى جسق 2025 جىلدىڭ سوڭىنا دەيىن مەملەكەتتىك ساراپتامادان وتكىزە وتىرىپ تولىق اياقتاۋدى تاپسىردى. جوباعا جاياۋ جۇرگىنشىلەر ينفراقۇرىلىمىن دامىتۋ، جارىق جانە كوگالداندىرۋمەن جابدىقتالعان ىرگەلەس اۋماقتى كورىكتەندىرۋ، تازارتۋ قۇرىلىستارىن سالۋ، جاعالاۋدى بەكىتۋ، توعانداردىڭ سانيتارلىق جاعدايىن باقىلاۋدى كۇشەيتۋ جانە لاستانۋعا جول بەرمەۋ شارالارى ەنگىزىلۋگە ءتيىس.
جوباعا الماتى قالاسى ەكولوگيا جانە قورشاعان ورتانى قورعاۋ باسقارماسى تاپسىرىس بەرگەن. جسق ازىرلەۋمەن «قازگيپروۆودحوز ينستيتۋتى» ج ش س اينالىسادى. قۇجاتتاما 2025 جىلى جەلتوقساندا اياقتالادى دەپ جوسپارلانعان، ال جوبانى ىسكە اسىرۋ مەرزىمى – 2026-2027 جىلدار.