مەگاپوليستىڭ الاتاۋ اۋدانىنىڭ اكىمى ازامات قالدىبەكوۆ وڭىرلىك كوممۋنيكاسيالار قىزمەتىنىڭ بريفينگىندە مەكتەپتەر، بالاباقشالار مەن مەديسينالىق پۋنكتتەردىڭ سالۋ جوسپارلارى تۋرالى ايتتى، دەپ حابارلايدى almaty-akshamy.kz
ازامات قالدىبەكوۆتىڭ ايتۋىنشا، جىل سايىن قارقىندى دامىپ كەلە جاتقان الاتاۋ اۋدانىندا جاڭا مەكتەپتەر مەن بالاباقشالار قۇرىلىسى سۇرانىسقا يە. مۇندا جاڭا شاعىناۋداندار پايدا بولىپ، تۇرعىن ءۇي كەشەندەرى سالىنۋدا.
«ءبىز ءۇشىن قالا تۇرعىندارىنا جايلى ءومىر ءسۇرۋ جاعدايىن جاساۋ عانا ەمەس، سونىمەن قاتار جاس ۇرپاققا زاماناۋي ءبىلىم بەرۋ ۇدەرىسىن ۇيىمداستىرۋ وتە ماڭىزدى. بۇل ماسەلەنى جۇيەلى تۇردە شەشىپ جاتىرمىز. ازىرگە اۋداندا 26 مەملەكەتتىك جانە 2 جەكەمەنشىك مەكتەپ بار، وندا 47 060 ادام وقيدى. وقۋشىلار ورىندارى جەتىسپەيدى، ءبىز ونى 7800 ورىندىق 5 مەكتەپ سالۋ ارقىلى شەشەتىن بولامىز»، - دەدى ازامات قالدىبەكوۆ.
سايالى شاعىناۋدانىندا 1800 ورىندىق، توميريس، نۇركەنت، دارحان، راحات-مادەنيەت شاعىناۋداندارىندا ءارقايسىسى 1500 ورىندىق جاڭا مەكتەپتەر پايدا بولادى. قۇرىلىستىڭ اياقتالۋ مەرزىمى - 2022 ج.
شاپاعات شاعىناۋدانىندا 600 ورىندىق №150 مەكتەپتىڭ جاڭا عيماراتىن سالۋ جوسپارلانۋدا. قازىرگى ۋاقىتتا جەر تەلىمدەرىن قايتارۋ بويىنشا جۇمىستار جۇرگىزىلۋدە. شىلدەدە اسحانا، مەدياتەكا مەن سپورت زالى ورنالاسقان 125 ورىندىق №166 مەكتەپتىڭ قوسالقى عيماراتى پايدالانۋعا بەرىلدى. مەكتەپكە دەيىنگى مەكەمەلەردە ورىن جەتىسپەۋشىلىگى ماسەلەسى شەشىلۋدە. ءقازىر الاتاۋ اۋداندا 20 مەملەكەتتىك جانە 153 جەكەمەنشىك بالاباقشا بار. «2021 جىلى 2 بالاباقشا سالۋ جوسپارلانۋدا. نۇركەنت شاعىناۋدانىندا 320 ورىندىق جانە سايالىدا 280 ورىندىق بالاباقشا سالىنادى»، - دەپ جالعاستىردى ءسوزىن اۋدان اكىمى.
سونداي-اق، ازامات قالدىبەكوۆ اۋداندا قانداي مەديسينالىق مەكەمەلەر سالىناتىنىن ايتتى. ازىرگە الاتاۋ اۋدانىندا 5 مەملەكەتتىك جانە 2 جەكە مەديسينالىق مەكەمە جۇمىس ىستەيدى. بارلىعى 240 مىڭ ادام بەكىتىلگەن. اقبۇلاق، توميريس، تۇركىستان، شاپاعات، راحات-مادەنيەت شاعىناۋداندارىندا 5 دارىگەرلىك امبۋلاتوريا بار.
«ءبىز مەديسينا سالاسىن قولداۋعا جانە العاشقى مەديسينالىق-سانيتارلىق كومەكتى كۇشەيتۋگە كوبىرەك كوڭىل بولۋگە تىرىسامىز. باسقاشا ايتقاندا، ساپالى مەديسينالىق قىزمەت كورسەتۋ جانە ولاردىڭ قولجەتىمدىلىگىن ارتتىرۋ ماقساتىندا سايالى شاعىناۋدانىندا اۋىسىمىنا 200 كەلۋشىگە ارنالعان باستاپقى مەديسينالىق-الەۋمەتتىك كومەك ورتالىعى سالىنادى. قازىرگى ۋاقىتتا جوبالىق-سمەتالىق قۇجاتتاما ازىرلەنۋدە. سونىمەن قاتار قاراسۋ شاعىناۋدانىندا سول ورتالىقتىڭ قۇرىلىسىنا جوبالىق-سمەتالىق قۇجاتتار دايىندالۋدا»، - دەدى ازامات قالدىبەكوۆ.
الاتاۋ اۋدانىنداعى دارحان شاعىناۋدانىندا قىركۇيەكتە №25 قالالىق ەمحانا اۋماعىندا مودۋلدىك كت ورتالىعىن ورناتۋ جوسپارلانۋدا.
ءسوزىنىڭ سوڭىندا ازامات قالدىبەكوۆ نۇركەنت شاعىناۋدانىندا قازاقستان رەسپۋبليكاسى دەنساۋلىق ساقتاۋ مينيسترلىگى جۇقپالى اۋرۋلار ۇلتتىق عىلىمي ورتالىعى عيماراتىنىڭ قۇرىلىسى باستالعانىن ايتتى.