الاتاۋ اۋدانىنىڭ تۇرعىندارى №115، №33 باعىت اۆتوبۋستارى ۋاقىتىلى، كەستە بويىنشا جۇرمەيتىنىنە شاعىمدانادى. شاھارداعى اۆتوبۋستاردىڭ ءجۇرۋ جيىلىگىنىڭ ساقتالمايتىنى، قوعامدىق كولىكتەردىڭ سول باياعى بەي-بەرەكەتسىزدىگى تۇرعىنداردى ابدەن مەزى ەتكەن كورىنەدى.
كوپىر ۇستىندەگى وسى جولمەن ماشينا دا، ادام دا وتەدى. ءبىراق ەشقانداي دا «جاياۋ جۇرگىنشى» بەلگىسى قويىلماعان.
«ءبىز شەتكەرى ايماقتا تۇرعاندىقتان با، دىتتەگەن جەرىمىزگە جەتۋ ءۇشىن ۇيدەن 2 ساعات بۇرىن شىعامىز. بىلتىر ءبىز تۇرىپ جاتقان «توميريس» ىقشاماۋدانىندا جاڭا ايالدامالاردىڭ ورنى جاسالدى، ءبىراق ءالى كۇنگە دەيىن قولدانىسقا بەرىلگەن-بەرىلمەگەنىن بىلمەيمىز. ايالداماعا بارىپ اۆتوبۋس توقتاتساق، ءبىزدى كوزىنە دە ىلمەي ءوتىپ كەتەدى»، – دەيدى جەرگىلىكتى تۇرعىندار.
وسىنىڭ كەسىرىنەن ىقشاماۋدان تۇرعىندارىنىڭ ءبىرازى بالا-شاعاسىمەن كورشى اۋداننىڭ ايالداماسىنا بارۋعا ءماجبۇر. بۇل رەتتە №115 جانە №33 باعىت اۆتوبۋستارىن جارتى ساعات كۇتۋگە تۋرا كەلەتىن كورىنەدى.
ايتا بەرسە، اۋداندا شەشىلمەگەن ماسەلە كوپ. بىلتىر اۋداندا ءبىرقاتار كوشەگە جارىق ورناتىلعان بولاتىن. الايدا، بۇل قۋانىش ۇزاققا سوزىلمادى. جازدىڭ العاشقى كۇندەرىنەن باستاپ، كوشەدەگى جارقىراعان شامدار ءوشىپ، تۇرعىندارعا ءبىرشاما ىڭعايسىزدىق تۋدىرعان. جارىق بولماعاندىقتان، اتا-انالار بالاسىن ويناۋعا جىبەرگىسى كەلمەيدى. «بىرەۋ-مىرەۋ الىپ كەتسە، تاس قاراڭعىدا كورمەي قالارمىز» دەگەن ۇرەي بار.
«جارىق بولعاندا ويناپ جۇرگەندەرىن كوزىمىز كورىپ، اسا قورىقپاس ەدىك»، – دەيدى تۇرعىندار. سونداي-اق، «توميريس» ىقشاماۋدانىنىڭ تۇرعىندارى قالاعا قاتىناۋ ءۇشىن ەسكى جولدى ءجۇرىپ ءوتۋ كەزىندە بويلارىن قورقىنىش بيلەيتىندىكتەرىن جەتكىزدى.
ولاردىڭ ايتۋىنشا، جولدا جاياۋ جۇرگىنشىلەر جولاعى نە بەلگىسى جوق. بەينەباقىلاۋ دا ورناتىلماعان. ونى بىلەتىن كولىك جۇرگىزۋشىلەرى جوعارعى جىلدامدىقپەن ءجۇرىپ، تۇرعىنداردى قاعىپ كەتۋدەن ەش تايىنبايدى. وعان دالەل، وسىدان 2 جىل بۇرىن شاماسىندا 60-تى القىمداعان قاريانى قاعىپ، مۇگەدەكتىك كۇيگە تۇسىرگەن كولىك كومەكتەسپەك تۇگىلى، وقيعا ورنىنان قاشىپ كەتكەن. وسى ءتارىزدى جول-كولىك وقيعالارىنىڭ سالدارىنان تۇرعىنداردىڭ بويىن ۇرەي بيلەپ وتىر.