احمەت بايتۇرسىن ۇلىنىڭ مۋزەي-ۇيى الاشتىڭ قارا شاڭىراقتارىنىڭ ءبىرى.
بىلتىر احمەت بايتۇرسىن ۇلىنىڭ 150 جىلدىق مەرەيتويىنا تارتۋ رەتىندە ۇلت ۇستازىنىڭ تۋعان ولكەسىنەن انادولى جۇرتىنا دەيىن 5555 شاقىرىمدىق ۆەلوشەرۋدى 55 كۇندە جالعىز جۇگىرىپ وتكەن ۆەلوساياحاتشى، جۋرناليست، رەكوردسمەن ەرنات مەلس ۇلى الماتىداعى «احمەت ۇيىنە» سالەم بەرە كەلدى، دەپ حابارلايدى Almaty-aqshamy.kz
ول ءوزىنىڭ جانكۇيەرلەرىمەن جۇزدەسىپ، ۆەلوشەرۋدىڭ بارىسىن بايانداپ بەردى.
الاش ارىستارىنىڭ رۋحىن تۋ ەتكەن پاتريوت ازاماتپەن كەزدەسۋگە ءبىرقاتار زيالى قاۋىم مەن ب ا ق وكىلدەرى، ءداستۇرلى ونەردى ناسيحاتتاۋشى ونەرپازدار قاتىستى.
ەرنات مەلس ۇلى بىلتىرعى ۆەلوشەرۋىن 5 قىركۇيەك كۇنى، ياعني ۇلت ۇستازىنىڭ تۋعان كۇنىندە تورعاي جەرىندەگى اقكول، سارتۇبەكتەن باستاعان. كاسپيي مەن قارا تەڭىزدى جاعالاپ، قاپ تاۋلارىن ساعالاپ، انادولى تۇبەگىن ارالاپ، 55 كۇندە 5555 شاقىرىم جولدى باسىپ، ساپارىن ستامبۋلدا تامامداعان.
ەرنات مەلس ۇلى 2018 جىلدان بەرى ءتۇرلى ۆەلوشەرۋلەر جاساپ، قازاقستاندا ەكى مارتە رەكورد جاساعان. سونىڭ بىرىندە، بىلتىر اقپان ايىندا ۇلت ۇستازىنىڭ مەرەيتويىنا وراي ءوزى ۇيىمداستىرعان قىسقى ۆەلوشەرۋدە ەرناتتىڭ ەسىمى “كينەس” رەكوردتار كىتابىنا ەنگەن بولاتىن. ول جانكەشتى جيھانگەز عانا ەمەس، جۋرناليست، ءارى وقىتۋشى، اۋدارماشى. «اعىلشىنشا ءتىل سىندىرۋ» كىتابىنىڭ، Qazaq English، «اعىلشىن – اۋىل ءۇشىن»، «اباي ارقىلى اعىلشىنشا ۇيرەن»، «عىلىم تاپ - Find Science»، «تولىق ادام جانە 4 دامۋ» جوبالارىنىڭ اۆتورى.
ارنايى «احمەت ۇيىنە» سالەم بەرە كەلگەن ە.مەلس ۇلى ءبىر جاسقا تولعان قىزىنىڭ تۋعان كۇنىن دە كيەلى وردادا قارسى الۋدى كوزدەگەنىن ايتتى. بىلتىر ا.بايتۇرسىن ۇلىنىڭ مەرەيتويى قارساڭىندا تۋعان، ءارى مەرەيتويعا ارناعان ۆەلوشەرۋىنىڭ جەڭىسىنە ءتاڭىرىنىڭ سىيلىعى سىندى دۇنيەگە كەلگەن قىزىنا ۇلت ۇستازىنىڭ اياۋلى جارى بادريسافا مۇحامەدسادىق قىزىنىڭ ەسىمىن بەرگەن ەكەن. «احمەت ۇيىندەگى» جىلى جۇزدەسۋدەن كەيىن كىشكەنتاي بادريسافانىڭ تۇساۋكەسەرى ۇلت ۇستازى ءومىرىنىڭ سوڭىندا تۇرعان كيەلى وردانىڭ ۇلكەن زالىندا ءوتتى.
كەزدەسۋ بارىسىندا ە.مەلس ۇلى احمەت بايتۇرسىن ۇلى عانا ەمەس، وزگە دە الاش ارىستارىن ناسيحاتتاۋعا باعىتتالعان جوبالارىمەن دە تانىستىردى.