الاش الىپتارىنىڭ ارمانى - ەلدىكتىڭ تۋىن بيىك ۇستاۋ!
الاش يدەياسى ۇلتتىق مۇددەگە قىزمەت ەتتى. حالىقتى بىرلىككە، جەكە دارا جول تابۋعا شاقىردى. ناق سول زاماندا ءسوز ونەرىنە ەرەكشە اسەر ەتتى. كوسەم ءسوز شەبەرى زەينوللا قابدولوۆ «ادەبيەت - اردىڭ ءىسى» دەپتى. راسىندا سولاي. حح عاسىردىڭ باسىرداعى ءاليحان بوكەيحانوۆ، احمەت بايتۇرسىنوۆ، ءمىرجاقىپ دۋلاتوۆتار قازاقتىڭ تاعدىرىن كۇيتتەدى. كىتاپ جازدى. تاريحتى قاۋزادى. ءارقايسىسى قاجەتتى سالالاردى دامىتتى. ماسەلەن، ۇلت ۇستازى ۇلى احاڭ «ءتىل قۇرالى»، «ادەبيەت تانىتقىش» اتتى ەڭبەكتى ارتىنا مۇرا ەتىپ قالدىردى. ەگىز قوزىداي ەكى سالانىڭ جىلىگىن شاعىپ، جىك-جىككە ءبولىپ بەردى. ءمىرجاقىپ اتامىز بولسا، العاش «باقىتسىز جامال» رومانىن جازدى. ال وسىنىڭ ءبارىن ۇيلەستىرىپ، الاشتىڭ نەگىزگى يدەياسىن قۇرۋشى ءاليحان بوكەيحانوۆ بولدى. حالقىمىزدىڭ ماڭدايىنا بىتكەن اردا ۇلدارى ءار ۋاقىتتا بولاشاقتى ويلادى. ونىڭ ىشىندە جاستاردىڭ كەلەشەگىنە، قازاق ەلىنىڭ تاعدىرىنا الاڭدادى. سول ماقساتتا قىزمەت ەتتى. ەڭ ۇلكەنى بۇگىنگى تاۋەلسىزدىكتىڭ كونسەپسياسىن جاسادى دەسەك، ارتىق ايتپاعاندىق بولار ەدى. وسىنىڭ ءبارىن توپتاي ءبىر ارناعا تۇسىرگەندە شىعاتىن وي بىرەۋ. ول قازىرگى ادەبيەتتەگى الاش يدەياسىنىڭ كورىنىس تابۋى، زاڭدى قۇبىلىس دەپ باعالانادى. ويتكەنى، بارلىق نارسەنىڭ قامتىلار، ادام ويىنان شىعار، توعىسار جەرى - اسىل ءسوز (ادەبيەت - ارابشادان اۋدارعاندا) دەمەكپىز. بۇگىنگى تاڭدا وقۋ باعدارلامالارىندا كورىنىس تاۋىپ جاتقانى كوڭىل قۋانتادى. سەبەبى الاش قايراتكەرلەرىنىڭ جاساعان ىستەرى ەل جادىندا جاڭعىرىپ جاتقانىنا رازىمىز. الۋان-الۋان شارۋا اتقارىپ، وسى جولدا ءومىرىن بەرگەن قازاقتىڭ قايسار تۇلعالارىنا قالايشا ريزا بولمايسىز؟ بالكىم، الدا ءبىرشاما ۋاقىت ءوتىپ، ءالى دە تاريحتان ءوز ورىندارىن جاڭاشا قىرىنان ايشىقتار. مۇنى ۋاقىتتىڭ ەنشىسىنە قالدىردىق. ءبىزدىڭ باستى ماقساتىمىز - تولارساقتان قان كەشىپ، ساياسي قۋعىن-سۇرگىن كورگەن بابالار اماناتىنا ادالدىق تانىتىپ، ولاردىڭ مۇرالارىن وسكەلەڭ ۇرپاقتىڭ قولىنا تابىستاۋ. مىنە، وسى جولدا بارىمىز بەن نارىمىزدى سالساق، وزعانىمىز سوندا بولماق. بىزدەرشە تۇيگەندەگى شىعاتىن وي-پايىم وسى. الاش يدەياسىنىڭ قازىرگى ادەبيەتتەگى كورىنىسى مەن اتقارار ءرولى دەگەن مازمۇندى وسىلايشا توپتايمىز.
قازاق حالقىنىڭ ەشكىمنەن كەم ەمەستىگىن دالەلدەپ، ۇلتتى ايرانداي ۇيىتىپ، تىرشىلىك قىلۋىن كوزدەدى. سونى ارمان ەتتى. بىزدەر تاريحتىڭ ءبىر پاراسىن عانا شەرتتىك. ءبىر شەتىن عانا باياندادىق. ازدى-كەمدى اقپاردى ايتتىق. ال قانشاما ايتىلماعان ويلار، دەرەكتەر، ءالى دە اشىلماعان سىرلار بارشىلىق؟ جوعارىدا سونىڭ ءبىرشاماسىنا توقتالدىق. تۇيىندەگەندە، الاش الىپتارىنىڭ ىستەپ كەتكەن يگى ىستەرى بولاشاق ەلدىڭ جەمىسى بولارى انىق.