الاڭداۋدىڭ قاجەتى جوق!

الماتىدا ەرتەڭ، 17 قازاندا Mass Alert جەدەل قۇلاقتاندىرۋ جۇيەسى جاپپاي سىناقتان وتكىزىلەدى، دەپ حابارلايدى aqshamnews.kz

الماتىلىقتار مەن قالا قوناقتارى Mass Alert قۇلاقتاندىرۋ جۇيەسى حابارلاماسىن الۋ ءۇشىن iPhone قۇرىلعىلارىن iOS 18 نۇسقاسىنا جاڭارتۋى قاجەت

الماتىلىقتار مەن قالا قوناقتارىنا الاڭداۋدىڭ قاجەتى جوق، سەبەبى بۇل جاي عانا سىناقتان وتكىزۋ.

ەندى بۇل قۇلاقتاندىرۋ iOS وپەراسيالىق جۇيەسىن پايدالانۋشىلارعا دا قولجەتىمدى. ايتا كەتۋ كەرەك، iPhone قۇرىلعىلارىنىڭ يەسىنە iOS 18 باعدارلامالىق جاساقتاماسى بولسا عانا ەسكەرتۋ كەلەدى. 

ول ءۇشىن الماتىلىقتار مەن قالا قوناقتارى قۇرىلعىسىن iOS 18 جۇيەسىنە جاڭارتۋ قاجەت. ەگەر قۇرىلعى اۆتوماتتى تۇردە جاڭارماسا، ونى «باپتاۋلار – نەگىزگى – باعدارلامالىق جاساقتامانى جاڭارتۋ» دەپ ءوزى جاڭارتۋ كەرەك. 

ءموبيلدى قۇرىلعى پايدالانۋشىلارىنا «ۇلتتىق قۇلاقتاندىرۋ» بەلگىسىمەن سىناق تۋرالى حابارلاما جىبەرىلەدى، ال كەيبىر Android وپەراسيالىق جۇيەسى بار قۇرىلعىلارعا «پرەزيدەنتتىك قۇلاقتاندىرۋ» بەلگىسىمەن ەسكەرتۋ تۇسەدى.  

ەستەرىڭىزگە سالا كەتەيىك، بيىل 31 مامىردا ءبىرىنشى كەزەڭدە Android وپەراسيالىق جۇيەسى بار قۇرىلعىلارعا سىناقتان وتكىزۋ جۇيەسى جۇرگىزىلدى. بۇرىن حابارلانعانداي، ەكىنشى كەزەڭدە iOS قۇرىلعىلارىنىڭ پايدالانۋشىلارى ەلەكتروندىق قۇلاقتاندىرۋ جۇيەسىنە قوسىلادى.