جاس سۋرەتشىنىڭ كارتينالارى وتباسى قۇندىلىقتارىن دارىپتەيدى
جاس تا بولسا وزىندىك قولتاڭباسى قالىپتاسىپ ۇلگەرگەن سۋرەتشى نۇربولات اسقاردىڭ كارتينالارى ادامدى بىردەن باۋراپ الادى ەكەن. وعان ءابىلحان قاستەيەۆ اتىنداعى ق ر مەملەكەتتىك ونەر مۋزەيىندە اشىلعان ĞALAM دەپ ايدار تاعىلعان جەكە كورمەسىنە بارعاندا كوزىمىز جەتتى. نەسىمەن باۋراپ الادى؟ سول تۋرالى از-كەم تارقاتايىق.
ĞALAM
ءومىر بولعان سوڭ كەي-كەيدە جانىمىزدى مۇڭ باسىپ، كوڭىلىمىزگە ساتسىزدىكتەردىڭ كولەڭكەسى ءتۇسىپ، جابىرقاپ قالاتىنىمىز بار. ال ونداي ساتتەردە ونەر دەگەن قۇدىرەتتىڭ دە جان-دۇنيەڭىزگە شۋاق سەبەتىن كەزدەرى بولادى. نۇربولاتتىڭ ĞALAM-ى ءسىزدىڭ جان دۇنيەڭىزدىڭ ىشكى قىلدارىن نازىك قانا شەرتىپ وتەرى ءسوزسىز. الدەبىر كۇيگە بولەپ، ءتىپتى قولمەن ۇستاي المايتىن شابىت سىيلاۋى مۇمكىن. دەمەك، ĞALAM ءجاي عانا كورمە ەمەس، ول – ادامنىڭ ىشكى عالامى. ءيا، جاس سۋرەتشىنىڭ تۋىندىلارىندا كۇندەلىكتى ءومىردىڭ جان تەبىرەنتەرلىك سۇلۋلىعى، كۇن سايىن كەزدەسەتىن جاڭا ەموسيالار مەن الۋان ءتۇرلى مەزەتتەر بەينەلەنگەن. بارىندە دە جۇمساق جىلى تۇستەر باسىم.
بوياۋ
– سۋرەتشىنىڭ ەلۋگە تارتا تۋىندىسىنىڭ باسىن بىرىكتىرگەن كورمەسى وتباسى جانە ونداعى جىلى اتموسفەرا، كۇندەلىكتى تۇرمىس-تىرشىلىكتىڭ ءبىر قالىپتى تەربەلىسى، تىنىشتىعى، اسەم تابيعات سىندى كوپتەگەن تاقىرىپتى قامتيدى. اۆتور بەينەلى كەسكىندەمە مەن يمپرەسسيونيزمنىڭ ۇيلەسىمىن ءساتتى قولدانعان. ول كوبىنە قانىق كونتراستتار مەن جىلى رەڭكتەردى بايلانىستىرۋ ارقىلى سۇيىكتى موتيۆتەرىمەن ەكسپەريمەنت جاساپ، ءتۇس قارقىندىلىعىن ارتتىرۋعا تىرىسادى. جاس سۋرەتشى بوياۋدىڭ باي ءتىلىن شەبەر مەڭگەرگەن. ونىڭ كەسكىندەمەسى تۇستەردىڭ مەرەكەسى دەسەك تە جاراسادى، وندا ءاربىر رەڭك بىر-بىرىمەن بايلانىسىپ، بىرەگەي جانە ۇيلەسىمدى كومپوزيسيالاردى قۇرايدى. سۋرەتشى كولوريتىنىڭ بايلىعى ونىڭ شىعارمالارىن كورىكتەندىرىپ قانا قويمايدى، سونىمەن قاتار ءتۇرلى سەزىمدەردى، كوڭىل-كۇيدى جەتكىزىپ، ءار تۋىندىعا ەرەكشە قۋات بەرەدى، – دەيدى ونەرتانۋشى، كورمە كۋراتورى سامال مامىتوۆا.
جىلۋ
ءيا، سۋرەتشى ءۇشىن وتباسى دەگەن – بۇل ماحاببات، جەڭىس جانە ادامداردىڭ رۋحاني بايلىعى. ونىڭ «وشاق»، «انا مەن بالا»، «نەمەرە»، «اق داستارحان»، «تورتەۋ» «اڭگىمە»، «ويۋ»، «ءتالتۇس» جانە باسقا دا جۇمىستارى وتباسى قۇندىلىقتارىن مىڭ بوياۋمەن بەدەرلەيدى. ونداعى جۇمساق تۇستەر جايلىلىق پەن جىلۋلىقتى بەرىپ قانا قويماي، ادامداردىڭ بىر-بىرىمەن رۋحاني بايلانىسىن، بىر-بىرىنە دەگەن ىقىلاسىن اشىپ كورسەتەدى.
وشاق باسىنداعى قازانى وتتان تۇسپەيتىن انا، ونىڭ اينالاسىنان شىقپاي، جىلۋلىقتان ءلاززات الىپ جۇرگەن ويىن بالاسى؛ ساكىدە شىنتاقتاپ جاتقان مەيىرىمدى اكە، تىزەسىنە باسىن قويىپ الاڭسىز جاتقان ۇلى؛ اقشامداعى قوڭىر كەش؛ ءتىپتى ەسىكتەن تۇسكەن جاپ-جارىق ساۋلەنىڭ ءوزى بارلىق بەرەكە وسى ءبىر عانا وتباسى تاقىرىبىنىڭ اينالاسىندا ۇستەمدىك قۇرىپ تۇرعانداي.
كورمە
بوياماسىز ومىردەن ورىلگەن وسىنداي شىنايى بەينەلەردى كەنەپ بەتىنە بەدەرلەگەن جاس سۋرەتشىنىڭ ءار كارتيناسىنىڭ ايتارى، ءوز ءتىلى بار. قاراپايىم سيۋجەتتەرگە جان بىتىرگەن سۋرەتتەردىڭ وزىنەن ءومىر مەن بولمىستى، فيلوسوفيالىق تولعانىستاردى بايقاۋعا بولادى. ونىڭ شىعارماشىلىق فيلوسوفياسى كورەرمەنىن اسەمدىگىمەن عانا تاڭ قالدىرىپ قويماي، بەينە ءبىر جەكە ساياحات پەن رەفلەكسياعا شاقىراتىنداي.
ايتپاقشى، «شابىت» حالىقارالىق فەستيۆالىنىڭ گران-پري جۇلدەگەرى، «دارىن» مەملەكەتتىك جاستار سىيلىعىنىڭ يەگەرى نۇربولات اسقاردىڭ بۇعان دەيىنگى كورمەلەرى استانادا، وزبەكستاندا، رەسەيدە، يتاليادا، ءۇندىستاندا وتكەن. كارتينالارىن ەلىمىزدىڭ ءبىرقاتار مۋزەيلەرىنەن كەزىكتىرۋگە بولادى. ءتىپتى، امەريكا، شۆەيساريادا جەكە كوللەكسيالاردا ساقتاۋلى تۋىندىلارى دا بار.
ماحاببات
– مەنى شاڭىراق شاتتىعى، وشاق جىلۋى، كۇن ساۋلەسى، جىلىلىق، ماحاببات، سۇيىسپەنشىلىك، تاتۋلىق، بەرەكە-بىرلىك سىندى قۇندىلىقتار، قازاقى بولمىسىمىز، ءسالت-داستۇرىمىز قىزىقتىرادى. كوبىنە جانعا جىلۋلىق بەرەتىن، كوزگە ىلىنە، تۇسە بەرمەيتىن فراگمەنتتەردى جازعاندى جاقسى كورەمىن. ءوزىم كورىپ جۇرگەن شىنايى دۇنيەلەردى سالامىن. سوندىقتان كورمەمە كەلگەن جاندار كارتينالارىمنان وزدەرىن كورە السا دەيمىن. شىعارماشىلىعىمدا تۇستەرگە قاتتى ءمان بەرەمىن. ويتكەنى تۇستەر ادامعا جاقسى كوڭىل كۇي سىيلايدى دەپ بىلەمىن، – دەيدى نۇربولات اسقار.
سۋرەتشى نۇربولات اسقاردىڭ قىلقالامىنان تۋىنداعان الەمى مەن عالامىنا ساياحات جاساپ، جاڭا ەموسيالارعا بولەنۋ مۇمكىندىگىن جىبەرىپ الماڭىزدار. بۇل كورمە بارلىق ونەرسۇيەر قاۋىم ءۇشىن شابىت كوزى بولارى ءسوزسىز. كورمەنى كورۋگە اسىعىڭىزدار، اتالمىش مۋزەي تورىندە 25 اقپانعا دەيىن تۇرادى.