قازاقستاننىڭ پرەمەر-مينيسترى ولجاس بەكتەنوۆتىڭ جەتىسۋ وبلىسىنا جاساعان ساپارى بارىسىندا تانىمال تۋريستىك ايماق الاكول كولىنىڭ جانىنداعى ءۇشارال اۋەجايىن كەڭەيتۋ جوسپارى تۋرالى ايتىلدى، دەپ حابارلايدى aqshamnews.kz.
«بۇل نىسان ءتۋريزمدى دامىتۋدا ەرەكشە ماڭىزعا يە، سەبەبى تۋرپوتوكتىڭ ارتۋىن ەسكەرە وتىرىپ، استانا، الماتى جانە تالدىقورعاننان كەلەتىن رەيستەردى قابىلدايدى. بيىلعى جىلى اۋە رەيستەرىن سۋبسيديالاۋعا 653 ميلليون تەڭگە ءبولىندى. بۇل شامامەن 20 مىڭ بيلەتتى 8000 – 18 000 تەڭگە ارالىعىنداعى باعادا ساتۋعا مۇمكىندىك بەردى»، – دەپ اتاپ ءوتتى ۇكىمەتتىڭ باسپا ءسوز قىزمەتى.
سونىمەن قاتار، اۋەجايدا قوسىمشا تەرمينال سالۋ جوسپارلانۋدا، ول قازىرگى تەرمينالداعى 50 جولاۋشىدان بولەك، ساعاتىنا 75 جولاۋشىنى قابىلداي الادى.
«وتكەن جىلى بۇل وڭىرگە ەكى ميلليون تۋريست كەلدى، 3،5 ميلليارد تەڭگە جەكە ينۆەستيسيا تارتىلىپ، 17 جاڭا تۋريستىك نىسان پايدالانۋعا بەرىلدى»، – دەپ مالىمدەدى ۇكىمەت.