قازاقستاندا الاياقتىقتىڭ جاڭا ءتاسىلى پايدا بولعان. قاسكويلەر جەكە كاسىپكەرلىكتىڭ شوتىن جالعا بەرۋدى سۇرايدى ەكەن. شوتىن ۋاقىتشا بەرە تۇرعانى ءۇشىن ۇستىنەن پايدا كورەتىنىن ايتادى. بۇل تۋرالى almaty-akshamy.kz 31-ارنانىڭ ينفورمبيۋرو جاڭالىقتار باعدارلاماسىنا سىلتەمە جاساپ حابارلايدى.
قاسكويلەر باسقا ادامنىڭ شوتى ارقىلى ساۋدا جۇرگىزەمىن دەيدى دە، كليەنتتەرىنە تاۋاردى بەرمەي كەتەدى. زاڭگەرلەر ون شاقتى ادام سونداي الاياقتىڭ قۇربانىنا اينالعانىن ايتادى.
استانالىق كاسىپكەر الەۋمەتتىك جەلىدە ونلاين-دۇكەندى دامىتۋعا كومەكتەسەمىز دەگەن بەينەروليككە تاپ بولعان. سودان كەيىن ولار ايەلدەن تولەم جاساۋ ءۇشىن ونىڭ جەكە شوتىن سۇراتقان. بۇل ءۇشىن ولار ۇستىنەن اقى تولەپ، ساتىلىمنىڭ پايىزىن بەرۋگە ۋادە ەتتى. ءبىراز ۋاقىتتان كەيىن ونىڭ شوتى ارقىلى قاسكويلەر تەحنيكا ساتقانى بەلگىلى بولدى، ءبىراق تاۋاردى كليەنتتەرىنە بەرمەگەن.
“ولاردىڭ ءوتىنىشى بويىنشا بارلىق اقشانى كارتاعا اۋداردىم. كەلەسى كۇنى ماعان بىرەۋلەر قوڭىراۋ شالىپ، اقشانى قايتارۋدى تالاپ ەتەدى. مەن ولارعا اقشانى الماعانىمدى، ونداي نيەتىم جوق ەكەنىن، مەنى دە الداپ كەتكەنىن تۇسىندىرەمىن. ەكى ادام ادام اقشانى ءوندىرىپ الۋ ءۇشىن مەنى ازاماتتىق سوتقا بەردى”، – دەدى ەلوردالىق كاسىپكەر.
كاسىپكەردىڭ ايتۋىنشا، پوليسيادا ارىز قاراۋسىز قالعان. ايەل الاياقتاردى تاۋىپ، جازالاعىسى كەلەدى. زاڭگەرلەر ەشكىمگە جەكە شوتتارىن بەرمەۋگە كەڭەس بەرەدى.
“قۇرمەتتى دوستار، ەشقاشان ءوزىڭىزدىڭ جەكە اقپاراتىڭىزدى بەرمەڭىز، دەرەكتەرىڭىزدى جاريا ەتپەڭىز. قىزىق نارسە بولىپ كورىنەتىن، ءبىراق كۇماندى ۇسىنىستارعا كەلىسپەڭىز، سەبەبى ونىڭ ارتى جامان بولۋى مۇمكىن”، – دەدى زاڭگەر ەۆگەنيي ياۆورسكيي.
بۇل جاعدايدا كىناسىزدىگىڭىزدى دالەلدەۋ وڭاي ەمەس، دەيدى ساراپشى. سونداي-اق پوليسەيلەر جەكە مالىمەتتەر مەن شوتتارىن بەلگىسىز ادامدارعا، ءتىپتى جاقىن ادامدارعا بەرمەۋگە ەسكەرتەدى